Read KIMERU BIBLE PROTESTANT EDITION Isa 61 Bible Online

Isa 61 - KIMERU BIBLE PROTESTANT EDITION bible

Isa 61

¹ Roho wa MWATHANI Mûrungu arî ndeene yaakwa, nîûntû MWATHANI nî arîîkîtie kûnthuura, antûma kûretera barîa barî thîîneene nteto injega. Antûmîte mbîja kûboreria barîa bakuîte nkoro, na kwîra barîa barî ûkomboone atî barî na ûciathi, na kûrugûrîra barîa batheeki ncheera.

² Antûmîte gûtûmîîria atî îgiita rîa MWATHANI rîa kwigîîrua antû baawe kîaao nîrîkinyîte, na kuuga atî îgiita rîa Mûrungu rîa kûrîîria antû baawe nîrîkinyîte, na kûboreria barîa barî na kwithikîîra.

³Antûmîte ndeetera barîa barî na kwithikîîra Zaiûni wega bwaawe; mbaretera kûgwîrua antû a kîeba; mboojûria gîkeno antû a kîrîro; boojûrwa nî nkerû antû a gûkua nkoro. Nabo bagaatua gwîtagwa miuuru ya waagîru, îrîa MWATHANI aandîte, nîkenda MWATHANI akumagua.

⁴Bagaaka gûntû kûrîa gwakoborangîrwe karaaja, bacokanîîrie kûrîa kwînyangîtue; bagaaka ntûûra irîa ciathûûkangîrue, irîa itwîre ithûûkangîtue mîaka îmiingî.

⁵Akîrîîndî nîbo bakaarîîthagia nyomoo cieenu; antû ba mîgongo îngî nîbo bakaabûrîmagîra miuunda yeenu na bakamenyeera mîzabibû yeenu.

⁶Bûgeetagwa athînjîri-Mûrungu ba MWATHANI antû bakaabwîtaga atûngatîri Mûrungu weetû. Into bia mîgongo îngî nîbio bûkaarîîjaga, bûkanankaaraga na mootonga jaao.

⁷Antû a kûmenagwa, bûkaaeewa ûtonga marîkanîîra; antû a kûthûmbagua, bûkaagwîragua bûrî nthîgûrû yeenu. Tontû bûû, bûkeethîrwa bûrî na into bibingî nthîgûrûûne yeenu, na gîkeno kîeenu gîtîkorothira.

⁸MWATHANI ariuga atîrî, “Ûûni MWATHANI mpendeete mma; nî nthwîre ûtuunyani na kûthithanîria ûrîa gûtîagîrîte. Nkaathithîria antû baakwa ûûma mbae kîrîa kîbaagîrîte, na mbîîke kîrîkanîro nabo gîa gûtûûra.

⁹Nchiarwa ciaao ikaamenyekana ndeene ya mîgongo yonthe; aana baao bakaagîa îgweta gatîgatî ga antû bangî bonthe. Barîa bonthe bakaaboonaga bakaabaeejaga gîtîîo na bakoonaga atî nî antû batharimi nî MWATHANI.”

¹⁰ Nî ngwîrîtue mono nîûntû bwa MWATHANI, nkoro yaakwa yûjûri gîkeno nîûntû bwa Mûrungu waakwa. Tontû nî ambîkîrîte nguû cia wonokio, angemia na rwambambio rwa waagîru, ta ûrîa mûjûkania eekagîra nguû inthongi; ta ûrîa mûgûrwa aigemagia na tuiga twa goro.

¹¹Nîkwîthîrwa, o ta ûrîa imera biumaga nthî mûthetuune, kana ta ûrîa mbeeû yaandagwa muundeene îkauma, no ta û MWATHANI Mûrungu agaatûma ûûma na ûkumio bwaawe bionekana kîrî mîgongo yonthe.