Read KIMERU BIBLE PROTESTANT EDITION Isa 62 Bible Online

Isa 62 - KIMERU BIBLE PROTESTANT EDITION bible

Isa 62

¹Tontû bwa kwenda Zaiûni, ntîkira; nîûntû bwa kwenda Jerusalemu, ntînogoka, o mwanka weerû bwa kûûmbanîîrwa kwaayo kwonekane; mwanka wonokio bwaayo bwakane ta rûmûrî rwa mwanki.

²Mîgongo îngî îkoona kûûmbanîîrwa gwaaku na anene bonthe bamenye nkuma yaaku. Naagwe ûgaatua gwîtagwa riîtwa rîrîerû, rîrîa ûkaaeewa nî MWATHANI wengwa.

³Ûkethagîrwa ûkari ta thirû înthongi ya MWATHANI, kana ta rwano rwa ûnene rwa Mûrungu waaku.

⁴Ûtîkorocoka gwîtagwa “Ûrîa ûtiganîrîtue” kaîrî, nthîgûrû yaaku îtîkorocoka gwîtagwa “Ûrîa ûtî mwene” kaîrî. Ûgeetagwa “Ûrîa MWATHANI agwîragua nîwe,” nayo nthîgûrû yaaku îgeetagwa “Ûrîa mûgûre nî MWATHANI.” Tontû MWATHANI nî agwîragua nîgwe, na nthîgûrû yaaku îkethagîrwa îrî yaawe ta ûrîa mûka ûmûgûre eethagîrwa arî wa mûkûrû waawe.

⁵Nîkwîthîrwa, o ta ûrîa mûthaka agûraga mwarî karaiti, no ta u ûrîa ûbûûmbîte akaabûgûra. Ningî o ta ûrîa mûgûrani agwîragîrua mûgûrwa, no ta û Mûrungu weenu akaagwîragua nî buî.

⁶Nîmbîkîte akaria nthingoone ciaaku îgûrû gwe Jerusalemu; nabo menya beeja gûkira noo rî, kûrî mûthenya kana ûtukû. Buî barîa bûkaraga bûkîririkanagia MWATHANI irîîkanîro biaawe, menya bwîja kûnogoka noo rî,

⁷Menya bûreka MWATHANI anogoka noo rî, o mwanka aake Jerusalemu na amîîkîre inya, na atûme îgîe na îgweta ndeene ya nthîgûrû.

⁸MWATHANI nî aeejanîte wîrane bwa mma, na akaabûûjûria na inya yaawe. Augîîte atîrî, “Ntîkorocoka kûrekeeria irio bieenu birîîwa nî anthû beenu kaîrî, kana ndekeeria akîrîîndî banyua ndibei yeenu îrîa bûthithinîrîte.

⁹Barîa barîmîte irio naabo bakaarîîjaga irio biaao na bagakumithia MWATHANI nabio. Nabo barîa bathuranîrîte ndibei noobo bakaanyunyaga ndibei yaao; bakaamînyunyagîra biaragoone bia kîûrû gîaakwa.

¹⁰Umagareni! Umagareni na mpingîro, bûthuranîre njîra îmbariî îrîa antû bakeeja nayo. Ambîîrieni kwînja! Înjangeni barabara na bûrite maiga ku; ambeni bendera bûmenyithie antû.”

¹¹ Atîrî, ntûmîîri ya MWATHANI nî îkinyîte mwanka ituri bia nthî îkiugaga atîrî, “Îreni antû ba Zaiûni atîrî: Mwonokia weenu nî eejîte. Arî na kîewa kîrîa eejîte kûbwaa; eejîte abûreeterete îrîi rîeenu.”

¹²Nabo bageetagwa “Antû babatheru, barîa boonoketue nî MWATHANI.” Naagwe Jerusalemu ûgeetagwa “Ntûûra îrîa yendi, îrîa îtîtiganagîrua.”