Read KIMERU BIBLE PROTESTANT EDITION Isa 63 Bible Online

Isa 63 - KIMERU BIBLE PROTESTANT EDITION bible

Isa 63

¹ Antû barîûria atîrî, “Nûû ûûjû wîjîte kuuma Bozra, nthîgûrû ya Edomu, eekîrîte nguû intuune? Nûû ûûjû wîkîrîte nguû inthongi, ûûjû wîjîte na inya yaawe yonthe?” “Nî ni MWATHANI; mbîjîte gûtûmîîria ûûmbani bwaakwa na inya ya kwonokania.”

²Nîkî tontû rwambambio rwaaku rûrî rûrûtuuune na nguû ciaaku ikari ta cia muntû ûrîa ûkinyangaga nzabibû kîmiiriine kîa ndibei?

³ MWATHANI ariuga ûjû: “Nîka nkinyangîte antû ba mîgongo îngî ndî ninka, na gûtî muntû noo ûmwe wangwatia. Mbakinyangîte na mûthûûro, ndaabatûgûta na marûrû. Tharike yaao nîyo îminyûkangîrîte mwanka nguû ciaakwa cionthe ciojûra tharike ciatuunîa.

⁴Tontû rîrîa ntwîre mbangîte rîa kwonokia antû baakwa na rîa gûkanûkia anthû baao nîrîkinyîte.

⁵ Ndaacûîre wa gûnteethia ndîraaga, ndîrarigara nî kwaga noo ûmwe wa kûmbigîka. Tontû bûû, marûrû jaakwa nîjo jambîkîrîte ûchamba, na mpûûmbanîte na inya yaakwa ningwa.

⁶Nkinyangîrîte antû ba mîgongo îngî nthî ndî na mûthûûro; mbakanûkîtie na marûrû mwanka beetîkîra, ndeetûûra tharike yaao mûthetuune.”

⁷Nînkwaria mbîîrane mantû jegiî wendo bwa MWATHANI bûrîa bûtîthiraga; Ngaakumia MWATHANI nîûntû bwa mantû jarîa jonthe atûthithîrîtie na wega bûbûnene bûrîa oonetie antû ba Israeli. Abathithîrîtie mantû jamanene nîûntû bwa kîaao kîaawe kîrî bo, na nîûntû nî abeendeete na wendo bûbûnene bûrîa bûtîthiraga.

⁸Nîkwîthîrwa MWATHANI augaga atîrî, “Baba nî antû baakwa ba mma; aana baakwa batîûmba gûmpayia.”

⁹Atwîre kûthangîka amwe nabo mîthangîkoone yaao yonthe, akîbatûmagîra mûraîka waawe kûbateethia. Atwîre aboonokagia nîûntû bwa wendo bwaawe na kîaao kîaawe. Atwîre kûbamenyeera wengwa îgiita rîonthe rîrîa rîkûrûkîte.

¹⁰Îndî bo nî baaregere kûmwathîkîra barathûûria Roho Ûmûtheru waawe. Kîu nîkîo gîatûmîre MWATHANI abagarûka atuîka mûnthû waao, na acoka kûrwaa nabo wengwa.

¹¹Nabo nî baacokere bararirikana mantû ja karaaja, jarîa jaathithîkaga îgiiteene rîa Musa, nthûûmba ya MWATHANI, barooria atîrî, “Arî kû MWATHANI ûrîa woonokerie antû baawe kuuma îrieene?” Arî kû MWATHANI ûrîa waabaeete Roho Ûmûtheru waawe akaranagia nabo?

¹² Arî kû MWATHANI ûrîa weekagîra Musa inya ya kûringa biama? Arî kû MWATHANI ûrîa waabathûranîre rûûjî nîkenda nkuma yaawe îtûûra mwanka kenya na kenya?

¹³Arî kû MWATHANI ûrîa watongeeretie antû baawe nîkenda bakûrûkîîra îrieene gatîgatî? Kinya kûu rwanda, beetagîîra ku ta mbarathi, gûtî gîntû kîabagiitaragia.

¹⁴Ta ûrîa ng'ombe imaaragîra irîîthîtue mûuroone, nîu Roho wa MWATHANI aabaeere kînogoko. Ûu nîu MWATHANI aatongeererie antû baawe nîkenda nkuma yaawe îtamba.

¹⁵Raitha kuuma kûu îgûrû, woone ûrîa gûkari gûkû nthîgûrû; tegeera ûrî gîkaroone gîaaku kîu kîtheru na kîrî mwago. Bûrîkû wendo bwaaku na inya yaaku? Gûtwenda kûrîa ûtwendeete na kîaao kîrîa ûtwigagîîrua, nîka bithiri?

¹⁶Gwe nîgwe Baaba weetû. Kinya këethîra Abrahamu atîtwijî, na kinya këethîra Israeli atiijî tûrî baawe, Gwe MWATHANI ûrî Baaba weetû; kuuma karaaja, ûtwîre wîtagwa Mwonokia weetû.

¹⁷MWATHANI nîmbi îtûmîte ûreka twatia tuumauma njîreene ciaaku, na ûûmia nkoro cieetû mwanka tutiga gûgûkîra? Cokeera nîûntû bwa nthûûmba ciaaku, antû baaku barîa withuurîrîte.

¹⁸Kîûrû gîaaku kîîthîrîtwe kîrî njareene cia antû baaku barîa ûthuurîte kagiita gagakai, îndî nandî anthû beetû nî bakîthûûkangîtie buru.

¹⁹Tûkarîte ta antû bataatongeerua nîgwe noo rî, kana ta antû bateetwa antû baaku.