Read KIMERU BIBLE PROTESTANT EDITION Isa 64 Bible Online

Isa 64 - KIMERU BIBLE PROTESTANT EDITION bible

Isa 64

¹Kaaba ûtûrîte îgûrû ûkeenama gûkû nthîgûrû, irîma bigateetema.

²Ta ûrîa mwanki jûtaambaga jûgwete kîthaka, kana ta ûrîa mwanki jûtûmaga rûûjî rûtherûka, kaaba ûtûme anthû baaku bamenye gwe ûrî û; weeja mîgongo yonthe îkainaina yakwona.

³Rîrîa ûthithagia mantû ja kûrigaria tûtîîrîgîrîte, wînamaga nthî, irîma bigateetema.

⁴ Kuuma kîambîrîria mwanka nandî tûrî, gûtaigîîwua kana kwonekana Mûrungu ûngî taagwe, ûteethagia barîa baamwîtîkîtie.

⁵Barîa bagwîragîrua kûthithia mantû jarîa jaagîrîte; barîa batîûragîrua nî ûrîa gwe wendaga bakaraga mîtûûrîreene yaao; gwe nî ûboonagia wega bwaaku. Nî twijî atî tuî nîtweeîrie, naagwe ûrathûûra. Tûkarîte meeyiene jeetû îgiita rîrîraaja mono, nandî tûtîkûmenya këethîra woomba gûtwonokia.

⁶Twinthe tûkari ta antû barî na mûgiro; tûkinyangîte mathithio jarîa jonthe twathithia ja waagîru mwanka jaatiga kwonekana ta nguû întuku nî rûko. Twinthe tûnyaarîte twoomagara ta mabûûra, najo meeyia jeetû jatuurutaga ta ruuo jagatûta kûraaja.

⁷Gûtî we ûkûthaathagia; gûtî we ûririkanaga gûkûromba ûteethio, nîûntû gwe nî waatwiciithîîre na ûratûrekanîîria na meeyia jeetû.

⁸Îndî amwe na bûu, gwe MWATHANI nîgwe Baaba weetû. Tuî tûrî mûthetu jwa yûmba, naagwe nîgwe mûtûûmbi; twinthe tûrî yûmba rîa njara ciaaku.

⁹Tiga kûthûûra mono gwe MWATHANI, kana ûtûûra ûririkanaga meeyia jeetû mwanka kenya. Itû twigîîrue kîaao, nîûntû twinthe tûrî antû baaku.

¹⁰Ntûûra ciaaku irîa wathûrîte nî ciaeere ithaka; Zaiûni nî rwanda rûrûtheri; Jerusalemu nî îgaanjo.

¹¹Kîûrû gîeetû gîkîtheru na gîkîthongi, kûrîa biûjûjû bieetû biagûkumithagîria nî kîaîîthîrue na mwanki, ningî gûntû gwetû kunthe kûrîa kwaarî gûkûthongi mono nî kwamomorangîrwe.

¹²Kinya mantû jakari ûu itû MWATHANI woomba kûrega kûthithia noo atîa? No wîte na mbere gûtûkirîra na gûtûkanûkia nkûrûki?