Read KIMERU BIBLE PROTESTANT EDITION Isa 65 Bible Online

Isa 65 - KIMERU BIBLE PROTESTANT EDITION bible

Isa 65

¹ MWATHANI ariuga atîrî, “Barîa ntwîre mbeteereete bancwa, kinya kûbûûrithîria batîmbûûrithagîria; barîa ntwîre mpendeete bambona, kinya gûncwa batîncûaga. Mûgongo jûrîa ntwîre kwîra ‘Ndî aja, ndî aja,’ nî mûgongo jûtînthaathagia.

² Antû barîa ntûûraga mpendeete beeja kîrî ni nî antû ndemi, beetaga mîîtîre îtî îmîega bagîtongagîîrua nî mathûgaanio jaao bongwa.

³Nî antû bathithagia mantû ja kûnthûûria batîkwigua noo nthoni magiita jonthe. Baritagîra mîrungu ya mîng'uanano igongwana miuundeene yaao na bakamîîthîria ubaani iritîroone bia maturubarî.

⁴Beetaga mbîrîreene ûtukû bakaraara ku baiciithîte bagîcwa kîrîra kîrî roho cia antû baakuû. Barîîjaga nyama cia ngûrwe na bakaruga mîthûri ya into birîa bikaanîtue kûrîîwa na nyongû ciaao.

⁵Beeraga bangî, ‘Kara kûraaja; menya wîjaîja akuî naanî nîûntû ndî ûmûtheru, ntîkari taagwe.’ Banthangîkagia ta ûrîa muntû athangîkaga arî toogiine, aagîte mîrukî ya gûkuucia; batûmaga ngatûûra mbakanîtwe nî mûthûûro ta ûrîa muntû athîînagua nî kîrugutîra atindîte mwankiine.

⁶Îndî nî barîîkîtie gûtuîrwa, na îkanûkia rîaao nî rîrîandîke. Naani ntîkira kaîrî, no mwanka mbakanûkie. No mwanka mbakanûkie îkanûkia rîng'aneene na mantû jarîa banthithîrîtie,

⁷Mbakanûkie nîûntû bwa meeyia jaao amwe na meeyia ja biûjûjû biaao. Batwîre kûîîthîria mîrungu ya mîng'uanano ubaani irîmeene îgûrû na kûmbagîra nthoni tûrîmeene îgûrû. Tontû bûû, nkaabakanûkia îkanûkia rîng'aneene na mantû jarîa batwîre kûthithia.”

⁸MWATHANI ariuga atîrî, “Rîrîa antû bakûthithia ndibei, bakoona rûûjî rûûjî rûtîthiri nzabibûûne baugaga, ‘Menya bûciînyangia, nîûntû irî na gîntû kîrî na gîtûmi.’ Kinya ni no ta u nkaathithia nîûntû bwa nthûûmba ciaakwa; ntîbathiria bonthe.

⁹Ngaatigaria nchiarwa imwe kuuma rûrîîjoone rwa Jakubu, na kuuma rûrîîjoone rwa Juda, irîa nkaa nthîgûrû yaakwa ya irîma îrî kiigai kîaao; îgaatuîka kiigai kîa nthuure ciaakwa; nthûûmba ciaakwa igaatûûra ku.

¹⁰ Antû baakwa bagaacoka kûnthaathagia, nabo bakaarîîthagia ng'ondu ciaao kûu Sharoni na ng'ombe ciaao imamage kûu mûgwanthîîne jwa Akori.

¹¹Îndî buî bûregeete MWATHANI; buî bûûrîrîtue nî Zaiûni, kîrîma gîaakwa gîkîtheru; buî bûthaathagia Gadi na Meni, mîrungu ya mîng'uanano, ya munya na ya bûrîa bwîranîri.

¹²Nkaabûrekeeria ndweene, bûûragwe bwinthe bûthire; nîûntû rîrîa ndaabwîtîre, bûteetîka; rîrîa ndaabwarîîrie, bûtaathikîîra; buî bweetîre na mbere kûthithia mantû jamaaî meethoone jaakwa, bûrathuura mantû jarîa jatîngwîragia.”

¹³Tontû bûû, ûûni MWATHANI Mûrungu ndiuga atîrî, “Barîa bambathîkagîra bakoonaga biakûrîa naabuî bûkîrîîjagwa nî mpara; barîa bambathîkagîra bakoonaga gîa kûnyua naabuî bûgîkuujaga nî nyoonta; barîa bambathîkagîra bakaagwîragua îndî buî no nthao ikaabûcokagîra.

¹⁴Barîa bambathîkagîra bakainaga nîûntû bwa kûgwîrua kûrîa gûkethagîrwa barî naku nkoroone ciaao, îndî buî nî kûrîra bûkaarîraga bûgîtuuragwa nî nkoro; no mbu bûkaugaga bûûjûrîtwe nî mîthangîko nkoroone.

¹⁵Riîtwa rîeenu rîgaatumagîrwa nî antû baakwa barîa nthuurîte rîrî kîrumi MWATHANI Mûrungu akaabûûraga, îndî akaa nthûûmba ciaawe riîtwa rîrîerû.

¹⁶Barîa bakwenda kîtharimo nthîgûrûûne bagaakîrombaga kuuma kîrî Mûrungu wa mma, na barîa bageekanagîra mîciîtio nthîgûrûûne îîjî bageekanagîra na riîtwa rîa Mûrungu wa mma, nîûntû mathîîna ja mbere jakeethîrwa jarîkîtie gûkûrûka; nkaajeebia joorîrie buru.”

¹⁷ MWATHANI ariuga ûjû: “Nkoomba îgûrû rîrîerû na mpûûmbe nthîgûrû înjerû; mantû jarîa makûrû jakoorîria buru na jatîkororirikanwa kaîrî.

¹⁸Îndî buî bûkaagwîragua, bûkenagîre mantû jarîa nkaathithia; nîûntû rî, Jerusalemu îrîa ndaathithia îkethagîrwa yûjûri kûgwîrua, ningî atûûri baayo bakethagîrwa barî na gîkeno.

¹⁹ Nkaagwîragîrua Jerusalemu na nkenage nîûntû bwa antû baakwa. Kîrîro gîtîkoroigîîgua ku kaîrî. Kana kwigîîgua muntû ûgwikaîra.

²⁰Gûtî kaana ga ntûûra îîu gagaakua kaîrî karî na ntukû inkai, kana muntû ûmûkûrû akua atîûjûrîtie matukû jaawe. Muntû wa mîaka îgana agaataragwa arî muntû ûmwîthî; wa gûkua atîkinyîtie mîaka îgana nî nkeethîrwa nkîmûkanûkia.

²¹Muntû agaakaga nyomba yaawe na akamîtûûra muntû akaandaga mîzabibû yaawe na akarîa matuunda jaayo.

²²Batîtua gwakaga îtûûrwa nî bangî; batîtua kwaandaga birîîwa nî bangî. Nîkwîthîrwa antû baakwa bagaatûûra ûtûûro bûbûraaja ta mîtî; antû baakwa bagaatûûraga ûtûûro bûbûraaja bakîgwîragîrua rûûya rwaao.

²³Mînoga yaao îtîtua kûûraga ûtheri, kana batua kûgîîjaga na twaana tûgîkuujaga; nîkwîthîrwa bo bakethagîrwa barî antû batharimi nî MWATHANI o amwe na aana baao.

²⁴Nkaabeetîkaga mbere ya bambîta, nkaigua maromba jaao kinya batîrîîkîtie kûmbarîria.

²⁵ Mbwee îkaarîîjaga amwe na tûng'ondu; ngatûnyi ikaarîîjaga nyaki ta ng'ombe, nabio irio bia njoka bikethagîrwa birî mûthetu. Gûtî gîntû gîkooragia kîngî kana gîkîthithîria ûthûûku kûu kunthe kîrîmeene gîaakwa gîkîtheru.”