Read KIMERU BIBLE PROTESTANT EDITION Isa 66 Bible Online

Isa 66 - KIMERU BIBLE PROTESTANT EDITION bible

Isa 66

¹ MWATHANI ariuga atîrî, “Îgûrû nîkîo gîtî gîaakwa kîa ûnene, nayo nthîgûrû nîo antû arîa nkinyithagia magûrû. Bariuga bwoomba kûmbakîra nyomba kana kûnthithîria gîkaro?

²Into bibi bionthe nî ni mbithithîtie na njara ciaakwa, tontû bûû, bionthe nî biaakwa,” nîu MWATHANI akuuga. “Muntû ûrîa ngwîragua nîwe nî ta ûûjû: nî muntû ûrîa winyiîtie na akairira nkoroone yaawe; ûrîa winainaga nî kiugo gîaakwa na agakîathîkîra.

³Gûtî mwanya jwa muntû ûrîa ûritaga kîgongwana kîa ndeegwa na ûrîa ûûragaga muntû; ûrîa ûritaga kîgongwana kîa gatûrûme nî ûmwe na ûrîa uunaga kurû nkingo. Gûtî mwanya jwa muntû ûrîa ûritaga kîgongwana kîa irio na ûrîa ûritaga tharike ya ngûrwe; ûrîa wîîthagia ubaani ya kîririkano nî ûmwe na ûrîa ûthaathagia mûrungu jwa mûng'uanano. Antû ta bau ka beethagîrwa baithuurîrîte mantû jarîa bakwenda kûthithia, nacio nkoro ciaao ikagwîrîrua mantû jau bathithagia jamathûûku.

⁴Kinya bo nkaamenya îkanûkia rîrîa nkabareetera; nkabareetera îkanûkia rîrîa bakîrîte mono; nîûntû ndeetanîre na gûtî we weetîka; ndaabaarîîrie, bararega kûmbigua. Bo no mantû jamathûûku beetîre na mbere kûthithia, barathuura mantû jarîa jatîngwîragia.”

⁵Buî barîa bwathîkagîra nteto cia MWATHANI, thikîîreeni bwigue ûrîa akuuga. “Antû ba ndûgû cieenu baabûthûûrîre na barabûta nîûntû nî bûmbîtîkîtie. Babûcikûûraga bakiugaga, ‘Îndî MWATHANI atoonania inya yaawe twoone bûkîgwîrua,’ îndî bo nîbo bagaacokerwa nî nthao.

⁶Thikîîreeni bwigue ûrîa gîtuma kîûjûri ntûûreene; igueni mûgambo jûu jûkuuma kîûrûûne Jûu nî mûgambo jwa MWATHANI Nîka akwirîîria kîrî anthû baawe.

⁷ Ntûûra îîjî îkari ta mûka ûgîîte na mwana mbere ya ûrûrû bûmûgwata akaeewa mwana mbere ya rwakaî rûmwîjîîra.

⁸Nûû waigua ûntû ta bûu? Nûû woona mantû ta jau? Kwoombîka nthîgûrû îgîa o na ntukû îmwe? Kwoombîka mûgongo jwonora o rîmwe? Zaiûni îkoojûria antû ntûti ta mûka ûrîa ûgîîjaga na twaana mbere ya ûrûrû bûmûgwata.

⁹Bûriuga ndoomba gûkinyithia gîntû îgiita rîa gûciarwa îndî nkagiria gîciarwa?” Nîu MWATHANI akuuga. “Ni mpûûmbithagia jau rî, ndomba kwiinga kîu mwana atîgaciarwe?” Nîu Mûrungu weenu akûûria.

¹⁰“Gwîrueni amwe na Jerusalemu nîûntû bwaawe, barîa bonthe bamwendeete, gwîrueni amwe nawe bûkeneete, buî bwinthe bwithikagîîra nîûntû bwaawe.

¹¹Buî bûgakenera kûtharimwa kwaawe o ta ûrîa kaana gakenaga karî kîrî nyonto ya ng'ina, buî bûkaanyua na bûkene nîûntû bwa mwago jwaawe jûrîa jûtîthiraga.”

¹²Tontû MWATHANI ariuga atîrî, “Ni nkongeera thîîrî Jerusalemu, na ûtonga bwa mîgongo nkabûreeta ku ta mûuro jûrî na îkondoria, Gwe ûgakara ta kaana karîa kamenyeeri nî ng'ina njareene ciaawe na agakoonia wendo bûbwingî.

¹³O ta ûrîa mûciari aboragîria mwana waawe, ûu noo u nkabûboreria bûrî Jerusalemu.

¹⁴Rîrîa bûkoona mantû jau, nkoro cieenu ikagwîrua, bûkagîa inya kaîrî o ta nyaki na gûkaamenyeka atî njara ya MWATHANI îrî amwe na nthûûmba ciaawe na anthû baawe bagacokerwa nî mûthûûro jwaawe.

¹⁵Tega! MWATHANI akeeja na mwanki, na ngaarî ciaawe cia ndwaa ikari ta kabubani, nîkenda agakanûkia anthû baawe na abagondokeere na mwanki jûmûnene.

¹⁶Nîkwîthîrwa MWATHANI agatuîra antû îgamba na mwanki na rûchiû rwaawe, na antû babaingî bakathirua nîwe.

¹⁷Mûthiro jûrî akuî kîrî barîa baitheragia nîûntû bwa kûthaathayia mîrungu îngî, barîa beetaga bathingateene miuundeene îrîa yamûrîtwe, bakaria ngûrwe, mbea na biakûrîa bingî birîa bitîtheri.” Nîu MWATHANI akuuga.

¹⁸“Nîkwîthîrwa ni nî mbijî ngûgî ciaao na mathûgaanio jaao; na nî mbîjîte nîkenda nkoongania mîgongo yonthe na nthiomi cionthe; bo bakeeja na bakoona ûkumio bwaakwa,

¹⁹na ngeeka rwano mbere yaao; na ngatûma barîa bakoonoka mîgongoone ya Tarishishi, na Lîbia na Lîdia, na Tubali, na Griki na tûthigûrû tûrîa tûrî îrieene kûraaja, barîa bataigua nkuma yaakwa kana boona ûnene bwaakwa; bo bakeeranaga mantû ja ûkumio bwaakwa kîrî mîgongo.

²⁰Bo bakareeta antû beetû kuuma mîgongoone yonthe beeje kîrîmeene gîaakwa kîrîa kîtheru takîo Jerusalemu, bakari ta biewa kîrî MWATHANI. Bakeeja na mbarathi, na ngaarî cia ndwaa na makûmbî na nkamîîra o amwe na nyombû,” nîu MWATHANI akuuga. “O ta ûrîa Aisraeli bakareeta irio biaao bia biewa nyomba yaakwa îrîa ntheru.

²¹Bamwe baao nkabathuura mbaeethie Alawi na bangî athînjîri-Mûrungu.” Nîu MWATHANI akuuga.

²² “O ta ûrîa îgûrû rîrîerû na nthîgûrû înjerû îrîa nkathondeka îgakaraga mbere yaakwa, ûu nou nchiarwa cieenu na riîtwa rîeenu rîgaakaraga mbere yaakwa,” nîu MWATHANI akuuga.

²³“Kuuma kîathoone kîa mweri jûkîguûka, mwanka jûngî; O na kuuma sabatû ingî, antû bonthe bakeejaga kûnthaathayia” Nîu MWATHANI akuuga.

²⁴ “Nabo bakiumagara, bageeta bakîonaga mîîrî ya antû barîa batambathîkagîîra; nîkwîthîrwa mang'inyo jarîa jakabarîa jatîkorothira, na mwanki jûrîa jûkabaîîthia jûtîkoroora kinya rî. Ûntû bûu bûkamakia antû bonthe ba nthîgûrû.”