Read KIMERU BIBLE PROTESTANT EDITION Isa 7 Bible Online

Isa 7 - KIMERU BIBLE PROTESTANT EDITION bible

Isa 7

¹ Îgiita rîa Ahazi mûtaana wa Jothamu, Jothamu mûtaana wa Uzia, aathanaga Juda, Rezini mûnene wa Aramu[3] na Peka mûnene wa Israeli mûtaana wa Remalia, nî beetîre kwithûkîra Jerusalemu îndî bataamîûmbîre.

²Rîrîa nteto iu ciaakinyîîre antû ba nja ya Daudi baraigua atî “Njûûrî ya Sîria nî îgwatanîrîte na njûûrî ya Efuraimu,” [4] mûnene Ahazi amwe na antû baawe nî baamakîre mono barainaina ta ûrîa mîtî iinainagua nî ruuo.

³MWATHANI nî eerîre Isaya atîrî, “Umagara na mûtaana waaku Sheari-jashubu bûgatirimane na Ahazi mûthia jwa mûberethi jûrîa jwînîkaga rûûjî kuuma karieene karîa karî bwa rûgûrû, akuî na njîra îmbariî îrîa îîtaga kîeniine kîa Mûûri wa Nguû.

⁴Naabuî bûmwîre atîrî, ‘Kara wimenyeerete, na ûborerete, na ûkáigua ûguaa. Menya ûkûa nkoro nîûntû bwa mûthûûro jûmûnene jwa Rezini na antû baawe ba Sîria na jwa Peka mûtaana wa Remalia barîa bakari ta inyinga biîrî bigûtoga birî akuî kûthira.’

⁵Antû ba Sîria na ba Efuraimu na Peka mûtaana wa Remalia nî batuireberete bauga atîrî,

⁶‘Twîteni twithûkîre nthîgûrû ya Juda, tûmîûûre na twigwatîre yo, na twîke mûtaana wa Tabeeli ku arî mûnene.’”

⁷Îndî MWATHANI Mûrungu augîîte ûjû, “Bûu bûtîûjûra, na gûtî ûntû ta bûu bûgaakarîka.

⁸Nîûntû Sîria îtî inya nkûrûki ya Damaski ntûûra yaayo îrîa nene nayo Damaski îtî inya nkûrûki ya Rezini. Ningî mîaka mîrongo îtaantatû na îtaano îkiuga yathira, Efuraimu îkeethîrwa yarageenue mwanka îkaremwa nî gwicokanîîria kaîrî ta mûgongo jûmwe.

⁹Efuraimu îtî inya nkûrûki ya Samaria ntûûra yaayo îrîa nene nayo Samaria îtî inya nkûrûki ya mûnene Peka. Îndî waaga wîtîkio ûmenye ûtîûmbana.”

¹⁰MWATHANI nî aarîîrie Ahazi o kaîrî aramwîra atîrî,

¹¹“Romba MWATHANI, Mûrungu waaku rwano rwa ûntû bûrîa bûgaakarîka, kinya bweethîrwa bûrî nthîgûrû gwa akuû, kana bûrî îgûrû buru.”

¹²Îndî Ahazi arauga atîrî, “Ntîmûromba; ntîgeria MWATHANI.”

¹³Rîu Isaya arauga atîrî, “Thikîîreeni nandî gwe nchiarwa ya Daudi. Ka-ûtîng'anîtie kûnogia antû tontû bûkwenda kûnogia Mûrungu waakwa kinya we?

¹⁴ Tontû bûû, MWATHANI wengwa agakwaa rwano: mwarî karaiti akaagia îu, aciare kaîjî, na amwîte Imanueli.[5]

¹⁵Mwana ûu akaanyunyaga îria rîrîmatu na arîîjage nainchû mwanka rîrîa akamenya kwathûrana wega na ûthûûku.

¹⁶Nîkwîthîrwa kinya mbere ya mwana ûu amenya kwathûrana ûthûûku na wega-rî, nthîgûrû cia anene bau baîrî babwîkîrîte ûguaa itîîthîrwa irî na muntû noo ûmwe.

¹⁷“MWATHANI akaabûreetera buî amwe na antû beenu, na antû bangî ba rûrîîjo rweenu matukû ja thîîna înene nkûrûki ya îrîa yonthe bwoona kuuma rîrîa Efuraimu yaathûkanîre na Juda. Akaabûreetera mûnene wa Asîria abwithûkîre.”

¹⁸Îgiita rîu rîakinya, MWATHANI akaaringa kîthiori, nabo antû ba Misri bakeeja ta ngi kuuma tûrûûjîîne twa Misri, tûrîa tûrî kûraaja. Ningî akaringîra antû ba Asîria kîthiori, nabo beeje ta njûkî kuuma nthîgûrû yaao.

¹⁹Nabo bakeeja bonthe boojûre mîguuruune îrîa yorokeri mono, na makurunguune ja maiga, na ithakeene bionthe na bienine bionthe.

²⁰Îgiita rîu rîakinya, MWATHANI agaatumîra mûnene wa Asîria kuuma rwongo rwa Eufurate ta ûrîa mwenji atumagîra wembe, nawe akeenja Juda mûtuundu jwa mûtwe, na nchiûri cia mwîrî na akûrûre kinya nchiûri cia kîreru.

²¹Îgiita rîu, muntû eethîrwa atigeere na kamwari ka ng'ombe kamwe na tûng'ondu twîrî,

²²nîûntû bwa îria rîrîa tûkoonaga akaanyunyaga îria rîrîmatu. Nabo bonthe barîa bagatigara nthîgûrûûne bakanyunyaga îria rîmatu na bakaarîîjaga nainchû.

²³Îgiita rîu rîakinya, kûrîa kunthe kwëethîrwa kûrî na mîzabibû ngiri îmwe îrî na ûgûri bwa shekeli ngiri îmwe cia fetha, gûkoojûra nkonko na matî ja miigua.

²⁴Antû nabo bakeejaga kûthooga ku na moota na mîgwî nîûntû nthîgûrû yonthe îkeethîrwa yûjûri nkonko na miigua.

²⁵Ningî kinya tûrîmeene kûrîa kunthe gûtwîre kûrîmagwa na machembe, bûtîtua gûkinyaga ku bûgîkîra kûmuntangwa nî nkonko na miigua. Nî ng'ombe na ng'ondu ikaarekagîîrua igeeta kûrîa ku.