Read KIMERU BIBLE PROTESTANT EDITION Isa 8 Bible Online

Isa 8 - KIMERU BIBLE PROTESTANT EDITION bible

Isa 8

¹MWATHANI nî aambîrîre atîrî, “Jûkia rûgîo rûrûnene waandîke na mwandîko jûmûûthû, ‘Maaheri-shalali-hashi-bazi.’”[6]

²Naani ndîreeta antû baîrî eetîkua batuîke akûûjî baakwa, tabo mûthînjîri-Mûrungu Uria, na Zekaria mûtaana wa Jeberekia.

³Ndîracoka ndîrathengeera mûka-kîroria, nawe aragîa îu, araciara kaîjî. MWATHANI arambîîra atîrî, “Mwîte Maaheri-shalali-hashi-bazi.

⁴Nîkwîthîrwa mûnene wa Asîria agaataa Damaski na Samaria eete na into bia ntûûra iu bionthe na ûtonga bwaacio bunthe mbere ya mwana ûu amenya gwîtana ‘Baaba’ kana ‘Maami.’”

⁵MWATHANI nî aambarîîrie kaîrî arambîîra atîrî,

⁶“Nîkwîthîrwa antû baba nî baaregete rûûjî rwa Shiloa rûrîa rwînamaga rûboorerete, îndî boojûrwa nî ûguaa nîûntû bwa Rezini na mûtaana waawe Remalia,

⁷nî bamenye atî nandî MWATHANI arî akuî kûbaunûkîîria rûûjî rwa Eufurate rûrwingî rûbakondorie, naru nî mûnene wa Asîria na inya yaawe yonthe. Naru rûkoojûra mîguuruune yonthe. Naru rûkoojûra mîguuruune yaaru yonthe mwanka ruunûke,

⁸rûkûrûkîîre Juda rûkîmîkondoragia, rûmîrimanie mwanka nkingo. Ningî rûgaatamba rûûjûre nthîgûrû yaaku yonthe; Mûrungu aroethîrwa arî amwe naatuî.”

⁹Ûkieni thaanga buî mîgongo, îndî bûkaaûûrwa bûmake. Thikîîreeni buî nthîgûrû cia kûraaja; ithuranîreni nîûntû bwa ndwaa, îndî bûkaaûûrwa bûmake.

¹⁰Baangeni mîbango yeenu mma, îndî îtîkinya noo kû. Arieni ûrîa bûkwenda, îndî gûtî bu bûkaabua, nîkwîthîrwa Mûrungu arî amwe naatuî.

¹¹MWATHANI nî aambarîîrie agînkinyagîîria ntîkeeje kûthingata mantû jarîa antû bathithagia arambîîra atîrî,

¹² “Ûkaugaga kîrîa kîonthe antû baba beetaga gûkunyanîrwa nî gûkunyanîrwa; ûgáakîra kîrîa kîonthe bakîraga kana wigua ûguaa nîkîo.

¹³MWATHANI Mweneinya, ûmenyage atî nî ûmûtheru. Ûû akî nîwe ûbuîrîte gûkîraga.

¹⁴ We akaa giiciitho gîaaku, na iiga rîa kûgwîthania kîrî mîîrîga yo-îîrî ya Israeli. Akaa mûtego Jerusalemu.

¹⁵Antû babaingî bakaagwa ku, baunîkange; bagaategua bagwatwe.”

¹⁶Thithia kîrîkanîro, ûringe nteto ciaakwa mûûri athingati baakwa bakîonaga.

¹⁷ Ngeeteera ûteethio bwa MWATHANI; ngeeka wîrîgîîro bwaakwa ndeene yaawe kinya këethîra nî eekîrithîtue nthao nî nchiarwa cia Jakubu.

¹⁸ Nîbûkûmbona ûûni na aana barîa MWATHANI ampeete. MWATHANI Mweneinya ûrîa ûtûûraga kîrîmeene kîa Zaiûni nî tuî atûmîte kîrî antû ba Israeli tûmûkûûjîîra na tûtuîka bionanîîria.

¹⁹Bamwe bakeeranaga atîrî, “Tûkoorieni aringia na antû barîa baranagîria na roho cia antû barîa baakuîre, barîa bagambaga ta tûnyoni na baciaragîria bongwa ûrîa tûbuîrîte kûthithia.” Îndî ûrîa nkûbwîra nî atî antû babuîrîte gûcwaa ûteethio kuuma kîrî Mûrungu waao. Ka antû barîa barî mwoyo babuîrîte gûcwaa ûteethio kuuma kîrî barîa akuû?

²⁰Thingatageni nteto cia MWATHANI na maathana jaawe. Nteto cia barîa baringagia kana cia barîa baaragia na antû baakuû itîbûteethia nîûntû tî cia mma.

²¹Antû bagaakûrûkîîra nthîgûrû îîu bathangîkîte mono na barî na mpara. Baigua mpara bakaathûûra mono, batege bwa îgûrû, barume mûnene waao na Mûrungu waao.

²²Bakeerîgîîra ûteethio buuma nthîgûrû, îndî kîrîa bakoona no thîîna na muundu na mîthangîko. Nabo bagaakunîkanua nî muundu jûmûtumanu.