Read KIMERU BIBLE PROTESTANT EDITION Isa 9 Bible Online

Isa 9 - KIMERU BIBLE PROTESTANT EDITION bible

Isa 9

¹ Îndî rî, mîthangîko ya barîa baatwîre na thîîna îkaathira. Mbereene, Mûrungu nî eekîîre nthîgûrû ya Zebuloni na Nafutali nthao. Îndî nyumeene nthîgûrû îîu îkaaewa gîtîîo. Ikaewa gîtîîo kuuma barabarene îrîa îrî rûteere rwa îria rîa Mediterania, mwanka nthîgûrû îrîa îrî rwongo rwa Jorodani, na kinya Galili yongwa, kûrîa antû ba mîgongo îngî batûûraga.

² Antû barîa batwîre muunduune nî boonete weerû bûbûnene. Barîa batwîre nthîgûrû ya muundu jûmûtumanu nî bathaarîri nî weerû.

³Nî ûthegeetie mûgongo jûjû; nî ûtûmîte jûgîa na kûgwîrua gûkûnene. Bagwîrîtue nîûntû bwa mantû jarîa ûbathithîrîtie, ta ûrîa antû bagwîragua îgiita rîa maketha, kana rîrîa bakûgaana into birîa bataîte.

⁴Nîkwîthîrwa gwe nî ûbaaûrîte mûrigo jûrîa jûtwîre jûbaritûîrîte. Rûturo rûrîa batwîre kûûrwa naru makano, taju mûregi jwa barîa batwîre kûbaiinyîîria, gwe nî ûruunangîte o ta ûrîa wathithîrie, rîrîa waboombanîîre kîrî njûûrî ya Midiani.

⁵Iraatû bionthe bia asikarî barîa beejîte kwithûka, na nguû yonthe îîtîkîri nî tharike, nî biakîîrîtue na mwanki.

⁶Nîkwîthîrwa nî tûciarîri kaîjî; tuî nî tûnenkeri mûtaana nîwe ûkaathanaga na inya yaawe. We aageetagwa “Mweejani kîrîra wa Kûrigaria, Mûrungu Mweneinya,” “Baaba wa Kenya na Kenya,” “Mûnene wa Thîîrî.”

⁷ Ûnene bwaawe bûgaatûûra bwongeerekaga inya, nayo thîîrî îtîkorothira. Agaakarîra gîtî kîa ûnene kîa Daudi, aathane antû aawe. Akaarikithia waathani nthîgûrû, na îgîe inya. Akaathanaga agîtumagîra îota na waagîru kuuma nandî mwanka kenya na kenya. MWATHANI Mûrungu Mweneinya nî airitîte kûthithia ûu.

⁸MWATHANI nî aaugîîte agaakanûkia nchiarwa cia Jakubu, taju mûgongo jwa Israeli.

⁹Nabo antû bonthe barîa batûûraga Efuraimu na Samaria bakaaririkana ûrîa MWATHANI augîîte. Nîkwîthîrwa bo nî antû ba nkoro injûmo na baaragia na rwikumio bakiugaga atî,

¹⁰“Mîako ya maturubarî îkûmomorangwa, îndî tûgaaka na maiga ja kwaja; mîkûû nî îragiitîrwe îndî tûgaaka na mîtarakwa.”

¹¹Nîkîo gîtûmîte MWATHANI areka bagîa na anthû babaingî; nîkîo gîtûmîte ookaûkia anthû baao babaithûkîra.

¹²Antû ba Sîria bakauma bwa gaiti na Afilisti baume bwa rûgûrû batambûûrange Israeli. Îndî amwe na jau jonthe rî, MWATHANI atîthûûrûka, ageeta na mbere na îkanûkia rîaawe.

¹³Kinya këethîra akûbakanûkia antû nî baregete kwirira, kana bacokera MWATHANI Mûrungu Mweneinya.

¹⁴Kîu nîkîo gîtûmi MWATHANI agiitîte Israeli mûtwe na mûnyiritha. Agiita rwang'i rwa mûkîndû amwe na gîtina kîaaju o ntukû îmwe.

¹⁵Akûrû na antû barîa barî gîtîîo nîbo mûtwe, nabio iroria birîa biritanaga mantû ja ûrongo nîbio mûnyiritha.

¹⁶Nîkwîthîrwa barîa batongagîîria antû baba, nîka babaatithagia njîra, nabo barîa babathingataga ka baûraga.

¹⁷Tontû bûû, MWATHANI atîgwîragîrua nthaka ciaao, na atî kîaao na aana baao barîa batî aciari na ntigwa. Nîkwîthîrwa bonthe nî baregeete Mûrungu na nî eeyia, ningî bonthe baaragia mantû jarîa jatîagîrîte. Îndî amwe na jau jonthe rî, MWATHANI atîthûûrûka, ageeta o na mbere na îkanûkia rîaawe.

¹⁸Meeyia jaîîthagia ta mwanki, ûrîa jwambagîîria gîkambene, jûgataamba tûmîtîîne twa miigua, jûgacoka jûkaîîthia mwitû, na bionthe bikaya na toogi îgaitia bwa îgûrû.

¹⁹Tontû bwa marûrû ja MWATHANI Mûrungu Mweneinya, nthîgûrû îkaaya; antû nîbo bakeethîrwa barî nkû, na gûtî we ûgaateethia ûngî.

²⁰Bagaacwaa gîa kûrîa rûteere rwa ûrîo îndî batînyira; bacwee rwa ûmotho îndî mpara îtînyiia. Bakarîa kinya twaana twaao.

²¹Antû ba Manase bakaarwaa na antû ba Efuraimu, na antû ba Efuraimu barwee na ba Manase, ningî bonthe bakaarûa na Juda. Îndî amwe na jau jonthe rî, MWATHANI atîthûûrûka, ageeta na mbere na îkanûkia rîaawe.