Read KIMERU BIBLE PROTESTANT EDITION Ala 1 Bible Online

Ala 1 - KIMERU BIBLE PROTESTANT EDITION bible

Ala 1

¹MWATHANI nî eetîre Musa arî îemeene rîa gûtirimanîra aramwîra atîrî,

²“Arîria antû ba Israeli ûbeere ûjû: Rîrîa muntû kinya ûrîkû akandeetera kîgongwana kîa nyomoo rî; areetage kîgongwana kîa ng'ombe, kana kîa mbûri kana kîa ng'ondu.

³“Këethîra akareeta kîgongwana gîa gwakîîria kîa ng'ombe, nî areete ndeegwa îtî na antû noo amwe athûûku. Nawe amîreete mwariine jwa îema rîa gûtirimanîra nîkenda eetîkîrîka kîrî ni.

⁴Ningî akaarîkîîra njara yaawe mûtwe jwa nyomoo îîu ya kîgongwana gîa gwakîîria, nîkenda îîtîkîrîka îrî kîgongwana gîa kûthiria meeyia jaawe.

⁵Acoke ooragîre ndeegwa îîu mbere yaakwa. Nabo athînjîri-Mûrungu, tabo ataana ba Aaroni, bakaandeetera tharike îîu îrî kîgongwana bamîmiinye nteere cionthe cio-inya cia kîritîro kîa igongwana kîrîa kîrî akuî na mwari jwa îema rîa gûtirimanîra.

⁶Muntû ûu, akaathînja nyomoo îîu ya kîgongwana gîa gwakîîria, acoke amîgiitange.

⁷Ataana ba Aaroni, ûrîa mûthînjîri-Mûrungu, bageekîra nkû kîritîroone kîa igongwana na baakie mwanki.

⁸Nabo athînjîri-Mûrungu, tabo ataana ba Aaroni, bakaarîkîîra nyama iu îgûrû rîa nkû na barîîkîîre mûtwe na maguta îgûrû rîa nkû iu irî kîritîroone kîa igongwana.

⁹Îndî muntû ûu ûkûrita kîgongwana athaambie kîu na mara na mathagiro. Mûthînjîri-Mûrungu abirite bionthe au kîritîroone kîa igongwana birî kîgongwana gîa gwakîîria, kîrîa kîeeraga bwega kîrî ni MWATHANI.

¹⁰“Kîgongwana kîa muntû ûu kîëethîrwa nî kîgongwana gîa gwakîîria kiumîte ndîîthieene yaawe ya ng'ondu kana mbûri; no mwanka arite ntûrûme kana nthenge îtî na antû athûûku noo amwe.

¹¹Nawe akaamîûragîra bwa ûrîo bwa kîritîro kîa igongwana au mbere yaakwa. Nabo athînjîri-Mûrungu, tabo ataana ba Aaroni bajûkie tharike bamîmiinye nteere cio-inya cia kîritîro kîa igongwana.

¹²Ningî muntû ûu akaamîgiitanga. Nawe mûthînjîri-Mûrungu abaange nyama iu amwe na mûtwe na maguta jaayo îgûrû rîa nkû irîa irî kîritîroone kîa igongwana.

¹³Îndî athaambie kîu, na mara na mathagiro. Nawe mûthînjîri-Mûrungu abirite bionthe au kîritîroone kîa igongwana birî kîgongwana gîa gwakîîria kîrîa kîeeraga bwega kîrî ni MWATHANI.

¹⁴“Ningî muntû ûu akëethîrwa nî kîgongwana gîa gwakîîria kîa nyoni akûnditîra, no mwanka areete nkûngûthikû kana kîjea.

¹⁵Nawe mûthînjîri-Mûrungu ageeta na nyoni îîu kîritîroone kîa igongwana, amîthiore nkingo mwanka îgiitanûke na amîakîrîîrie au kîritîroone kîa igongwana. Arekeerie tharike yaayo îînamîîre rûteere rwa kîritîro kîa igongwana.

¹⁶Ningî arite ntûndî na birîa birî ku abigere arîa mûju jwîtûûragwa, rûteere rwa bwa gaiti rwa kîritîro kîa igongwana.

¹⁷Nawe muntû ûu akamîgwata mathagu amîatûrane, îndî akáamîathûrana. Rîu mûthînjîri-Mûrungu amîakîîrie kîritîroone kîa igongwana. Kîu nakîo gîkaa kîgongwana gîa gwakîîria, kîrîa kîeeraga bwega, kîrî ni MWATHANI.”