Read KIMERU BIBLE PROTESTANT EDITION Ala 10 Bible Online

Ala 10 - KIMERU BIBLE PROTESTANT EDITION bible

Ala 10

¹Ataana ba Aaroni tabo Nadabu na Abihu, nî baajûkîrie karaî ga kwîthîîria ubaani na bareekîra mwanki na ubaani ku. Rîu barabinenkanîra kîrî MWATHANI. Îndî MWATHANI ateetîkîrîrie ubaani îîu nîûntû ataugîîte îritwe.

²Tontû bûû, MWATHANI arabeenamîîria mwanki jûrabooragîra au.

³Musa areera Aaroni atîrî, “Ûntû bûu, bwakarîka nîbu MWATHANI aaugagîra rîrîa augîre atîrî, ‘Ngaacionanagia atî ndî ûmûtheru kîrî antû barîa bantumîkagîra. Naani ngaakumagua nî antû bonthe.’” Aaroni ataacokerie noo atîa.

⁴Musa areeta Mishaeli na Elizafani, barîa baarî ataana ba Uzieli. Uzieli aarî îthe mwanake wa Aaroni. Musa arabeera, “Njûûni buumagarie biimba bia ataana ba nyakwe oome ya îema rîa gûtirimanîra na oome ya kambî.”

⁵Nabo bareeta bagwete nguû cia biimba biu barabiumagaria oome ya kambî o ta ûrîa Musa augîîte.

⁶Ningî Musa areera Aaroni na ataana baawe bangî tabo Eleazari na Ithamari atîrî, “Bûkéeja kûrega gûcanûra mîtuundu kana bûtambûranga nguû kwonania kwithikîîra. Bwathithia ûu bûgaakua na bûtûme MWATHANI atûrîkîria kîûthûrano kionthe kîa antû ba Israeli mûthûûro. Nî antû bangî ba Israeli akî beetîkîrîîtue kwithikîîra nîûntû bwa gîkuû kîa antû bau MWATHANI ooragîte na mwanki.

⁷Ningî bûkáumagara oome ya îema rîa gûtirimanîra bûtîkëeje gûkua, nîûntû nî bûthuuri bwathûrwa na njîra ya gwîtûûrîrua maguta.” Nabo barathithia o ûu Musa aabeerîre.

⁸MWATHANI nî aarîîrie Aaroni aramwîra atîrî,

⁹“Gwe na ataana baaku bûtîbuîrîte gûtonya îemeene rîa gûtirimanîra bûnyuîte ndibei kana kîogitia kîîngî bûtîkéeje gûkua. Waatho bûu nî bûthingatagwe nî nchiarwa ciaaku cionthe.

¹⁰No mwanka bûmenyage mwanya jwa into birîa biathûrîri Mûrungu na birîa bitîathûri; na mwanya jwa birîa bitheri na birîa bitîtheri.

¹¹Ritanageeni antû ba Israeli mawaatho jonthe jarîa ndeerîre Musa abwîre.”

¹² Musa nî aarîîrie Aaroni na ataana baawe barîa baatigeere, tabo, Eleazari na Ithamari arabeera atîrî, “Jûkieni kîgongwana kîa irio kîrîa gîtigeere, kuuma kîrî kîgongwana kîa irio kîrîa MWATHANI aritîri. Naabuî bûkaande mîgaate îtîîkîri mûtheega jwa kwimbithia. Bûrîîre mîgaate îîu au rûteere rwa kîritîro kîa igongwana, nîûntû nî îmîtheru.

¹³Bûmîrîîre antû aatheru. MWATHANI ambîrîte atî kîgongwana kîu nî gîaaku amwe na ataana baaku.

¹⁴ Îndî nyama ya kîbara îrîa yûûkagîîrua îkaritwa îrî kîgongwana na nyama ya kûgûrû kwa nyuma yoomba kûrîîwa nîgwe na ataana baaku na aarî baaku. Biu nîbio bûnenkeri kuuma igongwaneene birîa biritagwa nî antû ba Israeli bia gûcwaa thîîrî na MWATHANI.

¹⁵Nyama cia kîbara, na kûgûrû kwa nyuma, na maguta jarîa jakaritagwa nî antû ba Israeli; bigookîîrua biritwe birî kîgongwana gîa gûkîîrua kîrî MWATHANI. Nabio bikaa biaaku amwe na aana baaku o ta ûrîa MWATHANI augîîte.”

¹⁶Musa nî oorithîrie mantû jegiî mbûri îrîa yaariti îrî kîgongwana gîa kûthiria meeyia. Aramenya atî nî yaakîrîîrue kîritîroone kîa igongwana. Tontû bûû, arathûûra nî mantû jau jaathithîtue nî Eleazari na Ithamari, barîa baarî ataana ba Aaroni, barîa baatigeere. Musa arabooria atîrî,

¹⁷ “Nîmbi îtûmîte bûrega kûrîîra mbûri ya kîgongwana gîa kûthiria meeyia ja antû ba Israeli antû arîa kîbuîrîte kûrîîrwa nîûntû nî gîkîtheru? Kîgogwana kîu bûnenkagîrwa nîûntû bwa kîûthûrano kîa antû ba Israeli kûthirîrua meeyia jaao nî MWATHANI.

¹⁸Tharike ya nyomoo ya kîgongwana îkarega gwikua îemeene rîa gûtirimanîra o ta ûrîa mbwîrîte nyama ciaayo ibuîrîte kûrîîrwa antû atheru.”

¹⁹Aaroni aracokeria Musa aramwîra atîrî, “Mantû jarîa jambîjîîrîre naarua jatîngî gûtûma MWATHANI agwîrua nî ni ndîngî kûrîa kîgongwana gîa kûthiria meeyia. Ataana baakwa nîbo baritîre naarua kîgongwana gîa kûthiria meeyia ja kîrîndî na kîgongwana kîaao gîa gwakîîria.”

²⁰Rîrîa Musa aigîrue ûu, arang'anîrwa.