Read KIMERU BIBLE PROTESTANT EDITION Ala 11 Bible Online

Ala 11 - KIMERU BIBLE PROTESTANT EDITION bible

Ala 11

¹MWATHANI nî aarîîrie Musa na Aaroni arabaa Waatho arabeera atîrî,

²“Arîrieni antû ba Israeli bûbeere nyamû irîa boomba gwîtîkîîrua kûrîa, kuuma kîrî nyamû irîa itûûraga nthîgûrû.

³No barîîjage nyamû irîa irî nchaaû ciathûkeene na irîa ithagumagia.

⁴Îndî batîbuîrîte kûrîîjaga nkamîîra nîûntû kinya këethîra nî ithagumagia itî nchaaû ciathûkeene. Tontû bûû, itîtheri.

⁵Batîbuîrîte kûmîrîîjaga nîûntû kinya këethîra nî îthagumagia, îtî nchaaû ciathûkeene.

⁶Ningî bûtîbuîrîte kûrîîjaga kîthînu, nîûntû kinya këethîra nî ithagumagia gîtî nchaaû ciathûkeene. Tontû bûû, gîtîtheri.

⁷Batîbuîrîte kûrîîjaga ngûrwe, nîûntû kinya këethîra irî nchaaû ciathûkeene itîthagumagia. Tontû bûû, îtîtheri.

⁸Batîbuîrîte kûrîa nyama cia nyomoo iu kana batonga biimba biaacio.

⁹“Bûbeere nî beetîkîrîîtue kûrîîjaga makûyû ja mîthemba yonthe, kinya jëethîrwa jarî îrieene kana mûuroone.

¹⁰Îndî batîbuîrîte kûrîîjaga nyamû ingî cia rûûjî, kinya ciethîrwa irî îrieene kana mûuroone. Iu nî inthûûku itîbuîrîte kûrîîjagwa.

¹¹Nyamû cionthe irîa itûûraga rûûjîîne ciethîrwa tî makûyû itî buîrîte kûrîîjagwa na kinya biimba biaacio bitîbuîrîte kûringithua, nîûntû nî nyama inthûûku.

¹²Batîbuîrîte kûrîîjaga nyamû cionthe irîa itûûraga rûûjîîne ciethîrwa tî makûyû. Nyamû îîu nî înthûûku îtîbuîrîte kûrîîwa.

¹³“Bûbeere batîbuîrîte kûrîîjaga nyoni irîa itîtheri. Batîbuîrîte kûrîîjaga rwîgî kana ndiiû, kana nkoru,

¹⁴kana mpûngû, kana nderi,

¹⁵kana nkûngûrû cia mîthemba yonthe,

¹⁶kana thirai, kana ntuuntuguru, kana mîkunî kana mûthemba noo jûrîkû jwa ntuuntuguru,

¹⁷kana mîtuutu, kana mpûng'au,

¹⁸kana ntuuntuguru injerû, kana nyange, kana ndiiû irîa itûûraga rwanda,

¹⁹kana namîtoori, kana mîthemba yonthe ya njûû, kana ntûmbî mîrurî, kana kîreere.

²⁰“Tûnyamû tunthe tûrîa tûrî mathagu na magûrû nkûrûki ya jaîrî tûtîbuîrîte kûrîîjagwa.

²¹Îndî kîrî tûnyamû tûu, tûnyamû tûrîa tûkaarîîjagwa nî tûrîa tûthûngathûngûthaga.

²²Kîrî tûnyamû tûu, no bûrîîjage ngigî cia mîthemba yonthe, na mpaara cia mîthemba yonthe na mpaandi cia mîthemba yonthe.

²³Îndî tûnyamû tûngî tunthe tûrîa tûrî mathagu na tûrî magûrû nkûrûki ya jaîrî tûtîbuîrîte kûrîîjagwa.

²⁴“Nyamû ingî irîa irî mûgiro na itîbuîrîte kûrîîjagwa igûtarîîrua aja. Muntû ûrîa ûkaaringithia biimba biaacio akethagîrwa atîtheri mwanka ûgoro.

²⁵Muntû ûrîa wonthe ûgaakamataga kînuku kîa biimba bia nyomoo ta iu, abuîrîte kûûra nguû. Nawe agaakaraga atî ûmûtheru mwanka ûgoro.

²⁶Nyamû cionthe irîa irî nchaaû itîathûkeene na itîthagumagia itîbuîrîte kûrîîwa. Muntû ûrîa ûkaaringithia nyamû ta îîu akeethîrwa atîtheri.

²⁷Nyamû cionthe irîa îrî magûrû nkûrûki ya jaîrî na mathu itîbuîrîte kûrîîwa. Muntû ûrîa ûkaaringithia kiimba kîa nyamû ta iu akethagîrwa atîtheri mwanka ûgoro.

²⁸Muntû ûrîa ûgaakamataga kiimba kîa nyamû ta iu, no mwanka aûûre nguû ciaawe. Nawe agaakaraga atîtheri mwanka ûgoro. Nyamû iu itîtheri, na itîbuîrîte kûrîîwa.

²⁹“Nyamû ingî irîa irî mûgiro na itîbuîrîte kûrîîjagwa nî irîa ciîtaîtaga na nthî ta mpuko, na mbea, na ngaara na mîûrûûrû ya mîthemba yonthe,

³⁰na kîangara kûûmû, na nchwana, na kagaciûki, na kîthîînî na kiumbu.

³¹Tûnyamû tûu tûtîtheri, na muntû ûrîa ûkaaringithia biimba biaatu agaakaraga atîtheri mwanka ûgoro.

³²Gîntû kîrîa kîonthe gîkagwîrwa nî kiimba kîa tûnyamû ta tûu, gîkethagîrwa gîtîtheri. Gîntû kîrîa gîkethagîrwa gîtîtheri nî kîrîa kîthithîtue na mîtî, kana nguû, kana mûgûûta, kana nkunia, kana gîntû kîîngî kîrîa kîûmba gûtumîrwa. Gîntû kîu gîgeekîrwa rûûjîîne na gîkare mwanka ûgoro gîtîtheri. Rîu nîrîo gîkaathera.

³³Gîntû kîa yûmba gîkëeja kûgwîrwa nî kiimba gîa kanyamû ta kau gîntû kîu kîa yûmba kîbuîrîte kûûragwa nîûntû gîtîîthîrwa kîtheri.

³⁴Biakûrîa bikeeja gwîtîkîrwa nî rûûjî ruumîte gîntûûne kîu kîa yûmba, biakûrîa biu bitîîthîrwa bitheri. Ningî gîntû kîonthe gîa kûnyua gîkëeja kuungana na rûûjî ruumîte gîntûûne kîu kîa yûmba, gîntû kîu gîa kûnyua gîkeethîrwa gîtîtheri.

³⁵Gîntû kîa yûmba kana riiko rîa yûmba rîkëeja kûgwîrwa nî kiimba kîa kanyamû ta kau, gîntû kîu kîa yûmba kana riiko rîu rîa yûmba rîtîîthîrwa rîtheri, na rîkooragwa.

³⁶Gîntû kîonthe kîrîa gîkaaringithagia kiimba gîa tûnyamû ta tûu, gîkeethîrwa gîtîtheri. Îndî kiimba kîa kanyamû ta kau gîkëeja kûgwa kîthimeene kana gîtangiine kîrî na rûûjî, rûûjî rûu rûkëethîrwa rûrî rûrwega rwa gûtumîra

³⁷Kiimba gîa kanyamû ta kau, gîkëeja kûgwîra mbeeû ya kwaanda, mbeeû îîu îkeethîrwa îrî întheru.

³⁸Îndî mbeeû îkëethîrwa îriindi rûûjîîne, na îkagwîrwa nî kiimba kîa kanyamû ta kau, mbeeû îîu îgaatiga kwaa întheru.

³⁹“Muntû akëeja kûringithia kiimba kîa nyomoo irîa irîîjawa, muntû ûu agaakaraga atîtheri mwanka ûgoro.

⁴⁰Muntû akëeja kûrîa nyama cia kiimba cia kanyamû ta kau, abuîrîte kûûra nguû ciaawe. Nawe agaakaraga atîtheri mwanka ûgoro. Ningî muntû ûngî akëeja gûkamata nyama cia kiimba kîa kanyamû ta kau, muntû ûu no mwanka aûûre nguû ciaawe na akethagîrwa atîtheri mwanka ûgoro.

⁴¹“Tûnyamû tunthe tûrîa twîtaîtaga na nthî tûtîbuîrîte kûrîîwa nîûntû tûtîtheri.

⁴²Tûnyamû tunthe tûrîa twikuuragia na nthî, na tûrîa tûrî magûrû nkûrûki ya jaîrî, na tûrîa tûrî magûrû jamaingî tûtîbuîrîte kûrîîjagwa nîûntû tûtîtheri.

⁴³Bûtîbuîrîte kûrîîjaga tûnyamû tûu bûtîkeeje gûciîkîra mûgiro.

⁴⁴ Ni nî ni MWATHANI Mûrungu weenu. Tontû bûû, ciathûreeni bwinenkanagîre kîrî ni, bwee babatheru nîûntû kinya ni ndî ûmûtheru. Bûkaarîîjageeni tûnyamû tûu bûtîkeeje gûciîkîra mûgiro.

⁴⁵Nîkwîthîrwa ni nî ni MWATHANI ûrîa waabûritîre nthîgûrûûne ya Misri, nîkenda mbîthagîrwa ndî Mûrungu weenu. Tontû bûû, îthagîrweni bûrî babatheru nîûntû ni ndî ûmûtheru.”

⁴⁶Bûu nîbu Waatho bwegiî nyamû cia kîthaka na nyoni, na biûmbe bionthe birîa bikaraga rûûjîîne, na tûnyamû tunthe tûrîa twîtaîtaga nthîgûrûûne.

⁴⁷Waatho bûu nî bwa kûmenyithanagia nyamû irîa ntheru na irîa itîtheri. Ningî nî bwa kûmenyithanagia nyamû irîa ibuîrîte kûrîîwa na irîa itîbuîrîte kûrîîwa.