Read KIMERU BIBLE PROTESTANT EDITION Ala 13 Bible Online

Ala 13 - KIMERU BIBLE PROTESTANT EDITION bible

Ala 13

¹MWATHANI nî aarîîrie Musa na Aaroni arabeera atîrî,

²“Muntû akëeja kwimba gîkoondeene kana akaimba îûtî, kana akauma kîthainya, na mûrimo jûu jûgeeta na mbere kûnenea, muntû ûu agaikagua kîrî Aaroni, kana kîrî mûthînjîri-Mûrungu wa rûrîîjo rwa Aaroni.

³Rîu mûthînjîri-Mûrungu agaatega antû arîa kwajîîtie muntû ûu. Akëeja kwona nchiûri irîa irî antû au igarûkîte ikeerûa, na akoona mûrimo jûu jûtonyete gîkoondeene ndeene, rîu akaamenyithania atî muntû ûu arî na mûrimo jûmûthûûku jwa gîkoonde. Ningî amenyithanie atî muntû ûu atîtheri.

⁴Îndî mûthînjîri-Mûrungu akëeja kwona atî mûrimo jûrîa jwajîtie muntû ûu gîkoondeene jûtîtonyete ndeene, na akoona atî nchiûri irîa irî o itîgarûkîte cierûa, mûthînjîri-Mûrungu akauga muntû ûu aingîrwe antû aawe wenka ntukû mûgwanja.

⁵Ntukû ya mûgwanja, mûthînjîri-Mûrungu akaamûraitha kaîrî. Oona atî mûrimo jûtîkûnenea jûtaamba, rîu mûthînjîri-Mûrungu akauga muntû ûu eete na mbere kwingîrwa ntukû ingî mûgwanja.

⁶Mûthînjîri-Mûrungu akamûraitha kaîrî ntukû ya mûgwanja yakinya. Oona atî mûrimo jûu nî jûkwora na jûtîgûtaamba gîkoondeene, rîu akaamenyithania atî muntû ûu nî ûmûtheru. Mûrimo jûu arî naju tî jûmûthûûku jwa gîkoonde. Muntû ûu, abuîrîte kûûra nguû ciaawe rîu ae ûmûtheru.

⁷Îndî maûûtî jakëeja gwîta na mbere kwongeereka gîkoondeene, muntû ûu wajîtue no mwanka eete agacionanie kîrî mûthînjîri-Mûrungu, kinya këethîrwa nî aacionanîtie rîa mbere na akeerwa atî nî ûmûtheru.

⁸Nawe mûthînjîri-Mûrungu akaamûtega gîkoonde oone këethîra maûûtî nî jagwîta na mbere kwongereka gîkoondeene. Këethîra nî jakwongeereka amenyithanie atî muntû ûu atîtheri na atî arî na mûrimo jûmûthûûku jwa gîkoonde.

⁹“Muntû akëeja kûgwatwa nî mûrimo jûmûthûûku jwa gîkoonde, aikue kîrî mûthînjîri-Mûrungu.

¹⁰Nawe mûthînjîri-Mûrungu akaamûtega gîkoonde. Akëeja kwona maûûtî jau jarî na maira, na nchiûri irîa irî akuî najo cierûi, na jeerîîtue jagatunea,

¹¹mûthînjîri-Mûrungu akaamenya atî jûu nî mûrimo jûmûthûûku jwa gîkoonde jûrîa jûtîthiraga. Nawe mûthînjîri-Mûrungu akaamenyithania atî muntû ûu atîtheri. Îndî atiuga aathûranwe na antû bangî nîûntû bwa kwîthîrwa atîtheri.

¹²Îndî mûrimo jûu jûmûthûûku jwa gîkoonde kîa mwîrî, jûkëeja gûtaamba jûkoojûra mwîrî jûnthe; kuuma kîongo mwanka makinya, kûrîa kûnthe mûthînjîri-Mûrungu oomba kwona.

¹³Rîu mûthînjîri-Mûrungu agaatega muntû ûu bwega, na oona mûrimo jûu nî jûgwete mwîrî kunthe, akauga muntû ûuu nî ûmûtheru, nîûntû gîkoonde kîonthe nî kîthirîtie kwerûa. Tontû bûû, muntû ûu akeethîrwa arî ûmûtheru.

¹⁴Îndî akëeja kwambîrîria gûtûrîkanga ironda, muntû ûu agaatiga kwaa ûmûtheru.

¹⁵Mûthînjîri-Mûrungu akamûtega bwega, na oona atûrîkangi ironda, akamenyithania atî muntû ûu tî ûmûtheru. Gûtûrîkanga ironda nî kwonania atî jûu nî mûrimo jûmûthûûku.

¹⁶Ironda bikëeja kûgarûka kaîrî bikeerûa, muntû ûu ageeta kaîrî kîrî mûthînjîri-Mûrungu.

¹⁷Mûthînjîri-Mûrungu akaamûtega bwega, na oona kûrîa kwajîtue nî kwerûîte, akaamenya atî muntû ûu wajîtue nî ûmûtheru. Nawe amenyithanie atî muntû ûu nî ûmûtheru.

¹⁸“Muntû akëeja kwîthîrwa arî na îûtî na rîkoora,

¹⁹na antû au gûkëeja kwiimba ntûndwa igûtunîa, muntû ûu nî abuîrîte gwîta gûtegwa nî mûthînjîri-Mûrungu.

²⁰Nawe mûthînjîri-Mûrungu akamûtega bwega, na oona mûrimo jûu nî jûtonyete ndeene na nchiûri irîa antû au nî ithirîtie kwerûa, akauga muntû ûu atîtheri. Nîkwîthîrwa muntû ûu arî na mûrimo jûmûthûûku jwa gîkoonde jumîîrîte arîa îûtî rîraarî.

²¹Rîu mûthînjîri-Mûrungu agatega îûtî rîu. Akëeja kwona nchiûri irîa irî antû au igarûkîte cierûa, na akoona mûrimo jûtîtonyete gîkoondeene ndeene, na îûtî rîîrîîtue rîgatunea, rîu mûthînjîri-Mûrungu akauga athûranwe na antû bangî ntukû mûgwanja.

²²Naju mûrimo jûu jûkëeja gûtaamba gîkoondeene, rîu mûthînjîri-Mûrungu akaamenyithania atî jûu nî mûrimo jûmûthûûku jwa gîkoonde, na amenyithanie atî muntû ûu tî ûmûtheru.

²³Îndî îûtî rîkëethîrwa rîrî antû amwe akî na rîtîgûtamba, kîu nî kîrema kîa îûtî. Nawe mûthînjîri-Mûrungu akaamenyithania atî muntû ûu nî ûmûtheru.

²⁴“Muntû akëeja kwîthua nî mwanki, naku antû au kwîte gûkëeja kweroa kana gûkaungania kweroa na gûtunea,

²⁵rîu mûthînjîri-Mûrungu agatega antû au kwîte. Akëeja kwona nchiûri irîa irî o igarûkîte ikeroa, na akoona kwîte mwanka ndeene, rîu akaamenya atî jûu nî mûrimo jûmûthûûku jwa gîkoonde, jûkuumîte au kûîîte. Nawe akaamenyithania atî muntû ûu atîtheri.

²⁶Îndî mûthînjîri-Mûrungu akëeja gûtega antû au kwîte na akoona nchiûri irîa irî o itîerûi, na atî gûtîîte mwanka ndeene, îndî ga kwîrîîtue gwatunea, mûthînjîri-Mûrungu akauga muntû ûu aathûranwe na antû bangî ntukû mûgwanja.

²⁷Ntukû ya mûgwanja, mûthînjîri-Mûrungu akamûtega antû au kaîrî, na oona mûrimo jûgîtaamba na gîkoonde, akaamenya atî jûu nî mûrimo jûmûthûûku jwa gîkoonde. Rîu akaamenyithania atî muntû ûu atîtheri.

²⁸Îndî antû au gwîîte gûkëethîrwa gûtîgûtamba, kîu nî kîrema kîa antû au kwîte. Nawe mûthînjîri-Mûrungu akaamenyithania atî muntû ûu nî ûmûtheru.

²⁹“Ntomûrûme kana mûka akëeja kuuma ironda kîongo kana rûthîa,

³⁰mûthînjîri-Mûrungu akamûtega au kwajîtue. Akëeja kwona mûrimo jûtonyete bwa ndeene, na nchiûri irîa irî o igarûkîte rangi na igacekea, rîu mûthînjîri-Mûrungu akaamenya atî jûu nî mûrimo jûmûthûûku jwa gîkoonde jwa kwithoa. Nawe akaamenyithania atî muntû ûu atîtheri.

³¹Îndî mûthînjîri-Mûrungu akëeja gûtega muntû ûu ûrî na mûrimo jwa kwithoa, na akoona jûtîtonyete bwa ndeene, na antû au gûtî nchiûri injirû, rîu mûthînjîri-Mûrungu akauga muntû ûu aathûranwe na antû bangî ntukû mûgwanja.

³²Ntukû ya mûgwanja, mûthînjîri-Mûrungu akamûtega kaîrî. Akëeja kwona mûrimo jûu jwa kwithoa jûtîtaambîte na gîkoonde, na akoona atî nchiûri irîa irî o itîgarûkîte rangi na itîcekei, na atî mûrimo jûu jûtî bwa ndeene,

³³muntû ûu wajîtue, akeenjwa, îndî atîenjwa antû au kwajîtue. Nawe mûthînjîri-Mûrungu akaathûrana muntû ûu ûrî na mûrimo jwa kwithoa na antû bangî, ntukû ingî mûgwanja.

³⁴Ntukû ya mûgwanja, mûthînjîri-Mûrungu akaamûtega antû au kwajîtue. Akëeja kwona mûrimo jûu jwa kwithoa jûtîtaambîte kana jûtonya bwa ndeene, rîu akaamenyithania atî muntû ûu nî ûmûtheru. Nawe muntû ûu, akaûûra nguû ciaawe na ae ûmûtheru.

³⁵Îndî mûrimo jûu jwa kwithoa jûkëeja gûtaamba na gîkoonde nyuma ya kûtherua,

³⁶mûthînjîri-Mûrungu akaamûtege antû au kaîrî. Naju mûrimo jûu jwa kwithoa jûkëethîrwa jûtaambîte na gîkoonde, mûthînjîri-Mûrungu atîbuîrîte kwinogia gûcwaa këethîra nchiûri irîa irî o nî igarûkîte rangi ciacekea, nîûntû gûtî nkaanja atî muntû ûu atîtheri.

³⁷Îndî mûthînjîri-Mûrungu akëeja kwona mûrimo jûu jwa kwithoa jworeete, na nchiûri injirû nî ciumîte arîa kûraajîtue, akamenyithania atî mûrimo jwa kwithoa nî jworeete, na atî muntû ûu nî ûmûtheru.

³⁸“Ntomûrûme kana mûka akëeja kuuma mathainya,

³⁹mûthînjîri-Mûrungu akamûtega antû au kwajîtue. Akëeja kwona mathainya jagarûkîte rangi jagatuka, rîu mûthînjîri-Mûrungu akaamenya nî mathainya akî jaumîte na atî muntû ûu nî ûmûtheru.

⁴⁰“Ntomûrûme akëeja kûthira mûtuundu kîongo, kîu nî kîmencû aumîte îndî we nî ûmûtheru.

⁴¹Ningî ntomûrûme akëeja gûkûûka mûtuundu au kiongo bwa mbere, kîu nî kîmencû aumîte îndî we nî ûmûtheru.

⁴²Îndî muntû ûu akëeja kuuma tûronda tungeenie weerû na ûtuune, kîmenchûûne, jûu nî mûrimo jûmûthûûku jwa gîkoonde jûkuuma.

⁴³Nawe mûthînjîri-Mûrungu akamûtega au kwajîtue. Akëeja kwona tûroonda tûrîa tûrî kîmenchûûne tuungeenie weerû na ûtuune, ta tûrîa tuumaga muntû arî na mûrimo jûmûthûûku jwa gîkoonde,

⁴⁴akaamenya muntû ûu arî na mûrimo jûmûthûûku jwa gîkoonde kîongo na atî atîtheri. Tontû bûû, mûthînjîri-Mûrungu akaamenyithania atî muntû ûu atîtheri na arî na mûrimo jûmûthûûku jwa gîkoonde kîongo.

⁴⁵“Muntû ûrîa ûkëethagîrwa arî na mûrimo jûmûthûûku jwa gîkoonde ageekagîra matani, na arekagîîrie mûtuundu jûgakara jûtîcanûri. Ningî ageetaga aikunîkîte kanyua agîtûmagîîria, Îî ni ntîtheri! Îî ni ntîtheri!”

⁴⁶Nawe muntû ûu, agaakaraga arî wenka oome ya kambî nîûntû atîtheri, rîrîa rîonthe akeethîrwa arî na mûrimo jûu.

⁴⁷Nguû ya guee, kana ya bamba,

⁴⁸kana îtumi na mîtumi, kana îtumi na ndigi cia bamba, kana mûgûûta, kana gîntû kîonthe kîthithîtue na mûgûûta, gîkëeja kwîthîrwa kîrî na uumu,

⁴⁹uumu bûu, bûkëeja kûgîa rangi ya matî jameethî, kana rangi întuune, jûu nî mûrimo jûmûthûûku jwa uumu. No mwanka into biu bionanue kîrî mûthînjîri-Mûrungu.

⁵⁰Nawe mûthînjîri-Mûrungu agaatega gîntû kîu oone këethîra kîrî na uumu. Akëeja kwona kîrî na uumu rî, agagîîka antû aakîo gîonka, ntukû mûgwanja.

⁵¹Ntukû ya mûgwanja agaatega gîntû kîu kaîrî. Uumu bûkëeja kwîthîrwa bûtaambîte na nguû; nguû îîu yëethîrwa îrî ya gûtuma na mîtumi, kana ya ndigi cia bamba, kana ya mûgûûta, kana gîntû kîrîa gîtumi na mûgûûta, jûu nî mûrimo jûmûthûûku jwa uumu na gîntû kîu kîrî na ju gîtîtheri.

⁵²Mûthînjîri-Mûrungu agaakîîria nguû îîu, îrî na uumu; yëethîrwa îtumi na mîtumi, kana ndigi cia bamba, kana guee, kana nguû ya mûgûûta, nîûntû nguû îîu îkeethîrwa îrî na mûrimo jûmûthûûku jwa uumu.

⁵³Îndî mûthînjîri-Mûrungu akëeja gûtega nguû îîu ya gûtuma na mîtumi kana ya guee, kana gîntû kîa mûgûûta, akoona uumu bûtîkwongeereka nguûûne,

⁵⁴Mûthînjîri-Mûrungu ûu akauga nguû îîu îrî na uumu yûûrwe. Nayo îgeekwa antû aayo mwanya ntukû ingî mûgwanja.

⁵⁵Mûthînjîri-Mûrungu agaatega nguû iu ciaûûrwa. Akëeja kwona atî uumu nî bûgarûkîte rangi kinya bûkëethîrwa bûtîtaambîte, nguû îîu îtîtheri. No mwanka îîthîîrue yëethîrwa îrî na uumu bwa mbere kana bwa nyuma.

⁵⁶Îndî mûthînjîri-Mûrungu akëeja gûtega nguû îîu, akoona rangi ya uumu îtîtheri buru, agaatambûra nguû îîu arîa kûrî na uumu; yëethîrwa îrî nguû ya mûgûûta kana ya gûtuma na mîtumi, kana ya ndigi cia bamba.

⁵⁷Nyumeene uumu bûkëeja kuumîra bûkaambîrîria gûtaamba nguûûne ya gûtuma na mîtumi, kana ya ndigi cia bamba kana ya gîntû kîa mûgûûta kîonthe, no mwanka îîthîîrue.

⁵⁸Îndî nguû îîu yëethîrwa îrî ya gûtuma na mîtumi, kana ya ndigi cia bamba, kana ya mûgûûta îbuîrîte yëethîrwa îkûthira uumu, îûûrwe rîa jaîrî nîkenda yaa întheru.

⁵⁹“Bûu nîbu Waatho bûbuîrîte kûthingatagwa nîkenda bûmenya këethîra nguû ya bamba, kana ya guee, kana ya gûtuma na mîtumi, kana ndigi cia bamba, kana gîntû kîa mûgûûta kîonthe, kîrî na uumu. Ningî Waatho bûû nîbu bûgaatumîrwa nîkenda bûmenya këethîra nguû nî îtheri kana îtîtheri.”