Read KIMERU BIBLE PROTESTANT EDITION Ala 14 Bible Online

Ala 14 - KIMERU BIBLE PROTESTANT EDITION bible

Ala 14

¹MWATHANI nî aarîîrie Musa aramwîra atîrî,

² “Bûbû nîbu Waatho bûrîa bûkaathingatagwa nîûntû bwa muntû rîrîa muntû ûraarî na mûrimo jûmûthûûku jwa gîkoonde, akareetagwa kîrî mûthînjîri-Mûrungu nîkenda kûmenyithanua atî nî ûmûtheru.

³Mûthînjîri-Mûrungu akaumaaraga oome ya kambî nîkenda atega oona këethîra muntû ûu nî ooreete mûrimo jûmûthûûku jwa gîkoonde.

⁴Mûthînjîri-Mûrungu akauga nyoni ijîîrî intheru iritwe, amwe na kamûti ka mûtarakwa, na mûrigi jûmûtuune na makuuû.

⁵Mûthînjîri-Mûrungu akauga nyoni îmwe yûragîrwe îgûrû rîa nyongûûne îrî na rûûjî rûrwega.

⁶Nawe mûthînjîri-Mûrungu akaajûkia nyoni îîu îngî, na kamûtî karîa ka mûtarakwa, na mûrigi jûmûtuune, na makuuû, abitombeke tharikeene îrîa ya nyoni îrîa îkûûragîri îgûrû rîa nyongû îrî na rûûjî rûrwega.

⁷Ningî aminyîrie muntû ûrîa ûkûtherua mûrimo jûmûthûûku jwa gîkoonde, tharike îîu mainda mûgwanja. Acoke atûmîîrie atî muntû ûu nî ûmûtheru. Rîu arekeerie nyoni îîu îtîkûûragi îbuurûûke îciîtîre.

⁸Nawe muntû ûu ûkûtherua akaaûûra nguû ciaawe, na eenjwe mwîrî junthe, na athambe. Rîu akaa ûmûtheru. Aarîîkia kûthithia mantû jau nîrîo agacoka kambîîne, îndî no mwanka akare oome ya îema rîaawe ntukû mûgwanja.

⁹Ntukû ya mûgwanja yakinya, akeenja mwîrî junthe kaîrî; eenje mûtuundu jwaawe junthe, na eenje kîreru kîaawe, na eenje nchiûri cia meetho. Acoke aûûre nguû, na athambe mwîrî mwanka athere buru.

¹⁰“Ntukû ya inyaanya, muntû ûu agaikîria mûthînjîri-Mûrungu tûtûrûme twîrî tûtî na antû aathûûku noo amwe, na kamwatî kamwe ka mwaka jûmwe, gatî na antû aathûûku noo amwe. Ningî amwikîrie gîchunchî kîmwe kuuma kîrî îkûmi kîa kilo ithatû cia mûtu jûmwinyu juungeenue na maguta ja nzeituni birî kîgongwana kîa irio. Ningî aikie nusu lita ya maguta.

¹¹Nawe mûthînjîri-Mûrungu ûrîa ûkûtheria muntû ûu, akamwikia mwariine jwa îema rîa gûtirimanîra, mbere ya MWATHANI, amwe na into biu.

¹²Ningî mûthînjîri-Mûrungu akaajûkia gatûrûme kamwe ga tûu tûriti, amwe na kîaû kîa maguta, abirite birî kîgongwana kîa kûthiria meeyia. Acoke abiûkîîrie abirite birî kîgongwana gîa gûkîîria kîrî MWATHANI.

¹³Nawe akooragîra gatûrûme kau antû arîa atheru arîa nyomoo cia igongwana bia kûthiria meeyia na arîa nyomoo cia igongwana bia gwakîîria bia kûthiria maatia, ciûragagîrwa. Nîkwîthîrwa kîgongwana gîa kûthiria maatia, na kîgongwana gîa kûthiria meeyia nî bibitheru na nî bia mûthînjîri-Mûrungu.

¹⁴Mûthînjîri-Mûrungu agaatombeka kîara kîaawe tharikeene îîu ya kîgongwana gîa kûthiria maatia, aake muntû ûrîa ûkûtherua ncuuruune ya gûtû kwaawe kwa ûrîo, na kîareene kîrîa kînene kîa njara yaawe ya ûrîo, na kîareene kîrîa kînene gîa kûgûrû kwaawe kwa ûrîo.

¹⁵Rîu mûthînjîri-Mûrungu ajûkie kîaû kîrîa kîa maguta, eekîre maguta jamwe rwîîne rwa njara yaawe ya ûmotho.

¹⁶Acoke atoombeke kîara kîa njara yaawe ya ûrîo maguteene jau, ajamiinye na kîara mainda mûgwanja mbere ya MWATHANI.

¹⁷Najo maguta jarîa jagaatigara rwîîne, mûthînjîri-Mûrungu agaaka muntû ûrîa ûkûtherua ncuuruune ya gûtû kwaawe kwa ûrîo, na kîareene kîrîa kînene kîa njara yaawe ya ûrîo, na kîareene kîrîa kînene gîa kûgûrû kwaawe kwa ûrîo, o ûrîa agwakîte tharike ya kîgongwana gîa kûthiria maatia.

¹⁸Najo maguta jau jangî jagaatigara rwîîne mûthînjîri-Mûrungu agaaka muntû ûrîa ûkûtherua mûtwe. Ûu nîu muntû ûu ûkûtherua akaathirîrua meeyia mbere ya MWATHANI.

¹⁹“Mûthînjîri-Mûrungu akaaritîra muntû ûrîa ûkûtherua kîgongwana gîa kûthiria meeyia nîûntû bwa kûtherua kwaawe. Mûthînjîri-Mûrungu acoke oorage nyomoo ya kîgongwana gîa gwakîîria.

²⁰Ningî mûthînjîri-Mûrungu akaarita kîgongwana gîa gwakîîria amwe na kîa irio au kîritîroone kîa igongwana. Ûu nîu mûthînjîri-Mûrungu akaarita kîgongwana gîa kûthiria meeyia nîûntû bwa muntû ûu.

²¹“Îndî muntû akëeja kwîthîrwa arî nkîa, na atîona into biu bionthe; no arite gatûrûme kamwe karî kîgongwana kîa gûûkîîrua nîkenda kîthiria maatia na kîthiria meeyia ja muntû ûu. Ningî muntû ûu, arite kilo îmwe ya mûtu jûmwinyu buru, juungeenue na maguta ja nzeituni, na arite kîaû kîa maguta birî kîgongwana kîa irio.

²²Ningî areete nkûngûthikû ijîîrî kana ijîa biîrî bitîkûri. O nkûngûthikû kana kîjea kîritwe kîrî kîgongwana gîa kûthiria meeyia, kîngî kîîthîrwe kîrî kîgongwana gîa gwakîîria.

²³Ntukû ya inyaanya nîrîo muntû ûu akaareeta into biu kîrî mûthînjîri-Mûrungu au mbere ya MWATHANI, mwariine jwa îema rîa gûtirimanîra nîkenda atherua.

²⁴Nawe mûthînjîri-Mûrungu akaajûkia gatûrûme ga kîgongwana gîa kûthiria maatia na kîaû kîa maguta, abiûkîîrie birî igongwana bia gûkîîria mbere ya MWATHANI.

²⁵Mûthînjîri-Mûrungu akooraga kang'ondu kau ga kîgongwana gîa kûthiria maatia, acoke ajûkie tharike îmwe yaako aake muntû ûrîa ûkûtherua ncuuruune ya gûtû kwaawe kwa ûrîo, na kîareene kîrîa kînene kîa njara yaawe ya ûrîo, na kîareene kîrîa kînene gîa kûgûrû kwaawe kwa ûrîo.

²⁶Mûthînjîri-Mûrungu acoke eekîre maguta jamwe rwîîne rwa njara yaawe ya ûmotho,

²⁷amiinye maguta jamwe jarîa jarî rwîîne rwa njara yaawe ya ûmotho, na kîara kîaawe kîa njara ya ûrîo mainda mûgwanja mbere ya MWATHANI.

²⁸Mûthînjîri-Mûrungu agaaka muntû ûrîa ûkûtherua maguta jamwe ja jau jarîa jakeethîrwa jarî njareene yaawe, nchuuruune ya gûtû kwaawe kwa ûrîo, na kîareene kîrîa kînene kîa njara yaawe ya ûrîo, na kîareene kîrîa kinene gîa kûgûrû kwaawe kwa ûrîo, o arîa agwakîte tharike ya kîgongwana gîa kûthiria maatia.

²⁹Najo maguta jau jangî jagaatigara rwîîne, mûthînjîri-Mûrungu ajaake mûtwe jwa muntû ûrîa ûkûtherua. Ûu nîu muntû ûu akaathirîrua meeyia mbere ya MWATHANI.

³⁰Rîu mûthînjîri-Mûrungu akaarita nkûngûthikû, kana ijîa bitîkûri, birîa muntû ûu akeethîrwa akîûmbaga kûrita.

³¹Arite kîmwe kîrî kîgongwana gîa kûthiria meeyia na kîngî kîrî kîgongwana gîa gwakîîria amwe na kîgongwana kîa irio. Ûu nîu muntû ûu ûkûtherua akaathirîrua meeyia nî mûthînjîri-Mûrungu mbere ya MWATHANI.

³²Bûu nîbu Waatho bûbuîrîte kûthingatagwa rîrîa muntû wajîtue nî mûrimo jûmûthûûku jwa gîkoonde na atîkûûmba into birîa bionthe biritagwa nîkenda muntû atherua.”

³³MWATHANI nî aarîîrie Musa na Aaroni arabeera atîrî,

³⁴“Bwäkinya nthîgûrû ya Kanaani îrîa nkabwaa, bûthingatage Waatho bûbû rîrîa ngeekagîra nyomba uumu.

³⁵Muntû ûrîa mwene nyomba îîu îrî na uumu ageetaga kîrî mûthînjîri-Mûrungu akamwîra atîrî, ‘Nî nkwona ta ka nyomba yaakwa îrî na uumu.’

³⁶Mbere ya mûthînjîri-Mûrungu atonya gûtega nyomba îîu, akaambaga kuuga îritwe into bionthe birîa birîku. Gûkaathithagua ûu nîkenda atîkëeje kuuga atî into bionthe birîa birî ku bitîtheri. Nyuma ya into biu biaritwa nîrîo mûthînjîri-Mûrungu agaatonyaga nyomba îîu.

³⁷Mûthînjîri-Mûrungu agaategaga nyomba îîu bwega. Oona atî îrî na uumu nthingoone, na atî uumu bûu nî bwa rangi ya matî jameethî na rangi întuune, kana bwethîrwa bûtonyete ndeene ya rûthingo,

³⁸rîu mûthînjîri-Mûrungu akaumagara na ainge nyomba îîu. Nayo îkare îingi ntukû mûgwanja.

³⁹Ntukû ya mûgwanja, nyuma ya kwiinga nyomba îîu, mûthînjîri-Mûrungu agaacokaga ku kaîrî nîkenda amîtega bwega oone këethîra uumu bûu nî bûgûtamba rûthingoone. Ona nî bûgûtaamba,

⁴⁰auge atî maiga jarîa jarî na uumu jaritwe jeete jagateewe oome ya ntûûra antû arîa gûtîtheri.

⁴¹Ningî akauga atî nyomba îng'arang'arwe bwa ndeene nteere cionthe, nabio birîa bikaang'arang'arwa biteewe oome ya ntûûra antû arîa gûtîtheri.

⁴²Maiga jangî jageekîrwa kûrîa maiga jarîa jarî na uumu jaarî bacoke bathinge rûthingo bwega kaîrî.

⁴³“Nabu uumu bûkëeja kwonekana nyomba îû kaîrî nyuma ya maiga kûritwa na nyomba kûng'arang'arwa na kûthingwa kaîrî,

⁴⁴mûthînjîri-Mûrungu ageeta atege nyomba îû kaîrî. Nabu uumu bwëethîrwa bûtaambîte, akaamenya atî, bûu nî uumu bûrîa bûtîthiraga bûrî nyomba. Tontû bûû, akauga atî nyomba îû îtîtheri.

⁴⁵Nyomba îîu no mwanka îmomorwe. Najo maiga jaayo, na mbaaû, na mûthuthurîka biumagarue oome ya ntûûra biteewe antû arîa gûtîtheri.

⁴⁶Nawe muntû akëeja gûtonya nyomba ta îîu rîrîa îkethagîrwa iingi nîûntû bwa kwîthîrwa îtîtheri agaatindaga atîtheri mwanka ûgoro.

⁴⁷Ningî muntû akëeja kûmama ku kana kûrîîra ku rîrîa îtîtheri no mwanka aûûre nguû ciaawe.

⁴⁸“Îndî mûthînjîri-Mûrungu ageeta atege nyomba îîu kaîrî, na akëeja kwona uumu bûtîtaambîte kuuma rîrîa nyomba îû yaathingîrwe kaîrî, akaamenyithania atî nyomba îîu nî întheru nîûntû îtî uumu.

⁴⁹Rîrîa mûthînjîri-Mûrungu akûtheria nyomba ta îîu, akaajûkagia nyoni ijîîrî na kamûtî ka mûtarakwa, na mûrigi jûmûtuune, na makuuû.

⁵⁰Nawe akooragîra nyoni îmwe îgûrû rîa nyongû îrî na rûûjî rûrwega.

⁵¹Acoke ajûkie kamûtî karîa ka mûtarakwa, na makuuû, na mûrigi jûu mûtuune, amwe na nyoni îîu îngî îrî mwoyo, abitoombeke tharikeene ya nyoni îrîa yûûragi na rûûjîîne rûu rûrwega. Nawe aminyîrie nyomba tharike îîu mainda mûgwanja.

⁵²Ûu nîu mûthînjîri-Mûrungu akaatheragia nyomba ta îîu. Akaamîtheragia na tharike ya nyoni, na rûûjî rûrwega, na nyoni îrî mwoyo, na kamûtî ka mûtarakwa, na makuuû, na mûrigi jûmûtuune.

⁵³Nawe akaarekagîîria nyoni îîu îtîûragi îbuurûûke îciîtîre. Ûu nîu mûthînjîri-Mûrungu akaatheragia nyomba ta îîu.

⁵⁴“Bûu nîbu Waatho bûrîa bûkaathingatagwa bwa kûthiria mûrimo jûmûthûûku jwa gîkoonde, mûrimo jwa kwithoa,

⁵⁵uumu bûrîa bûgwataga nguû, na bûrîa bûgwataga nyomba,

⁵⁶na mîrimo ya gîkoonde ya kwimba na mîrimo ya maûûtî na mûrimo ya mathainya.

⁵⁷Bûu nîbu Waatho bûkoonanagia këethîra muntû nî ûmûtheru kana tî ûmûtheru. Nîbu bûkoonanagia këethîra gîntû kana nguû kana nyomba nî întheru, kana îtîtheri.”