Read KIMERU BIBLE PROTESTANT EDITION Ala 16 Bible Online

Ala 16 - KIMERU BIBLE PROTESTANT EDITION bible

Ala 16

¹MWATHANI nî aarîîrie Musa nyuma ya gûkua kwa ataana barîa baîrî ba Aaroni. Ataana bau ba Aaroni baakuîre rîrîa baaregere kwathîkîra MWATHANI.

² MWATHANI areera Musa atîrî, “Arîria mûtaana wa nyakwe Aaroni ûmwîre atî atîbuîrîte gûtonyaga nyuma ya gîtambaa, antû arîa atheru buru, magiita jonthe. Nîkwîthîrwa au nîo ncionanagîria îgûrû rîa Îthandûkû rîa kîrîkanîro ndî îgûrû rîa gîtî gîa Kîaao nkari ta îtu. Athithia ûu agaakua.”

³ Îndî atonyaga antû au atheru, rîrîa akî akûrita kîngwana kîa ndeegwa îrî kîgongwana gîa kûthiria meeyia na ntûrûme îrî kîgongwana gîa gwakîîria.

⁴Mûthînjîri-Mûrungu eethagîrwe eekîrîte nguû îrîa ntheru; tacio curuarî îtumi na ndigi cia bamba, na aciogeete mûcibi jwa ndigi cia bamba na aoogeete kîremba. Aambage akathamba mwîrî na rûûjî rîu ageekîra nguû iu.

⁵Kîûthûrano kîa antû ba Israeli gîkaamûnenkagîra nthenge ijîîrî irî cia kîgongwana gîa kûthiria meeyia, na ntûrûme îmwe nîûntû bwa kîgongwana gîa gwakîîria.

⁶Aaroni akaarita ndeegwa îrî kîgongwana gîa kûthiria meeyia jaawe wengwa na ja antû ba nja yaawe.

⁷Nyuma ya ûu, akajûkagia nthenge irîa ijîîrî, akaireeta au mbere ya MWATHANI mwariine jwa îema rîa gûtirimanîra.

⁸Ningî Aaroni akaaringaga kuura nîkenda amenya nthenge îrîa îkaa ya MWATHANI na îrîa îkaa ya Azazeli; tayo Nkoma ya rwanda.

⁹Aaroni akaajûkia nthenge îkaa ya MWATHANI amîrite îrî kîgongwana gîa kûthiria meeyia.

¹⁰Nayo nthenge îrîa îkaa ya Azazeli; tayo Nkoma ya rwanda, îkaritwa mbere ya MWATHANI îrî mwoyo na îkaarekerua îîte bwa rwanda kîrî Azazeli; tayo Nkoma ya rwanda, nîkenda nthenge îîu îîta na meeyia ja kîrîndî.

¹¹Aaroni akaajûkagia ndeegwa akamîrita îrî kîgongwana gîa kûthiria meeyia nîûntû bwa meeyia jaawe wengwa na ja antû ba nja yaawe.

¹²Nawe akaajûkagia karaî ga kwîthîîria ubaani yûjûri makara ja mwanki, jariti kîritîroone kîa igongwana. Acoke ajûkie nkuundi ijîîrî cia ubaani îrîa njega îthiîtwe. Akûrûke nabio nyuma ya gîtaambaa kîrîa kiithîte antû arîa kûtheru mono.

¹³Agaakîîria ubaani au mbere ya MWATHANI, toogi iitie îkunîke gîtî gîa Kîaao, kîrîa kîrî îgûrû rîa Îthandûkû rîa kîrîkanîro. Nîkwîthîrwa Aaroni ona gîtî kîu nîka agaakua.

¹⁴Ningî Aaroni akaajûkia tharike îmwe ya ndeegwa. Nawe amiinyîrie gîtî gîa kîaao bwa mbere, tharike îîu mainda mûgwanja, na kîara kîaawe. Acoke amiinye tharike îîu mbere ya gîtî gîa kîaao na kîara kîaawe, mainda mûgwanja.

¹⁵ Rîu acoke oorage nthenge îrîa ya kîgongwana kîa kûthiria meeyia ja kîrîndî. Ajûkie tharike îîu amîtonyithie nyuma ya gîtambaa, antû arîa atheru buru. Amiinyîrie gîtî gîa kîaao bwa mbere, na amiinye tharike îîu au mbere ya gîtî gîa kîaao o ta ûrîa akûthithîtie na tharike ya ndeegwa.

¹⁶Akaathithagia mantû jau nîkenda athiria mûgiro antû arîa atheru buru; athiria mûgiro jwa antû ba Israeli, na meeyia jaao. Ningî ûu nîu akaathithagîria îema rîa gûtirimanîra, nîûntû rîîthagîîrwa rîrî gatîgatîîne ga kambî ya antû ba Israeli. Kambî îîu îtîîthagîrwa îtheri.

¹⁷Gûtî muntû ûngî ûbuîrîte gûtonyaga îemeene rîa gûtirimanîra kuuma rîrîa Aaroni akaambagîîria kûrita kîgongwana gîa kûthiria meeyia jaawe wengwa, na ja nja yaawe, na ja antû bonthe ba Israeli. Kuuma rîrîa agaatonya ku mwanka rîrîa akauma ku gûtî muntû ûngî ûbuîrîte gûkûrûka ku.

¹⁸Auma îemeene rîa gûtirimanîra ageetaga kîritîroone kîa igongwana nîkenda akîtheria. Akajûkagia tharike îmwe ya ndeegwa îrîa ya igongwana na îmwe ya nthenge îrîa ya kîgongwana amîake kooneene cio-inya cia kîritîro kîa igongwana.

¹⁹Ningî akaaminyagîria kîritîro kîu kîa igongwana, tharike îîu mainda mûgwanja na kîara kîaawe, ûu nîu agaakîtheragia na gûkîathûrîra Mûrungu nîûntû bwa meeyia ja antû ba Israeli.

²⁰Aaroni athiria kûrita kîgongwana gîa kûtheria antû arîa atheru buru, amwe na kîritîro kîa igongwana, rîu akaajûkia nthenge îrî mwoyo mbere ya îema rîa gûtirimanîra.

²¹Aaroni akaamîrîîkagîîra njara ciaawe cio-ijîîrî mûtwe jwaayo. Ningî akaumbûragîra îgûrû rîaayo maatia ja antû ba Israeli jonthe, na moothûûku jaao jonthe, na meeyia jaao jonthe. Athiria kûrîkîîra nthenge îîu meeyia jau, akeera muntû ûrîa ûthuuri, amîîngîîrie rwanda.

²²Muntû ûu akeengîîria nthenge îîu rwanda gûntû gûtîtûûri îkamatîte meeyia jonthe ja antû ba Israeli.

²³ Rîu Aaroni agakûrûka îemeene rîa gûtirimanîra, arite nguû irîa cia mûthînjîri, iu agwîkîrîte, aitige antû au atheru buru.

²⁴Ningî athambîre mwîrî antû arîa atheru, eekîre nguû ciaawe ciongwa, rîu aumagare. Eete arite kîgongwana gîa gwakîîria gîa kûthiria meeyia jaawe, na arite kîgongwana kîngî gîa gwakîîria gîa kûthiria meeyia ja antû ba Israeli.

²⁵Acoke akîîrie maguta ja kîgongwana gîa kûthiria meeyia au kîritîroone kîa igongwana.

²⁶Nawe muntû ûrîa ûkeengagîîra nthenge kîrî Nkoma ya rwanda tayo Azazeli, akaûûraga nguû, na akathamba, rîu agacoka kambîîne.

²⁷ Nabio into birîa biatigarîre bia ndeegwa îrîa ya kîgongwa gîa kûthiria meeyia, na birîa biaatigarîre bia nthenge ya kîgongwa gîa kûthiria meeyia, nyuma ya tharike yaacio gwîkwa antû arîa atheru buru, biumagarue oome ya kambî. Nabio nî mûgûûta, na nyama, na mara biumagarue oome ya kambî biîthîrue.

²⁸Nawe muntû ûrîa ûkaabiakagîîria no mwanka aûûrage nguû ciaawe na athaambe mbere ya gûcoka kambîîne.

²⁹ “Bûbû nîbu Waatho bûrîa bûkaathingatagwa magiita jonthe: Ntukû ya îkûmi ya mweri jwa mûgwanja, taju Tishiri, bûciatage biakûrîa na bûkáritaga ngûgî noo îrîkû. Waatho bûu bûthingatagwe nî Ayahudi na ageni barîa batûûraga amwe nabo

³⁰Ntukû îîu nîyo bûkaatheragua na nkaabûthirîria meeyia jeenu.

³¹Îîu nî ntukû ya sabatû, ntukû ya kûnogoka, na gûciata kûrîa. Bûu nî Waatho bwa kûthingatagwa magiita jonthe.

³²Mantû jau jakathithagua nî mûthînjîri-Mûrungu ûrîa ûthuuri na aathûrîrwa Mûrungu, antûûne a îthe nîwe ûgeekagîra nguû irîa ibuîrîte gwîkîrwa nî mûthînjîri-Mûrungu.

³³Nawe akaaritaga kîgongwana gîa kûtheria antû arîa atheru, na gîa kûtheria îema rîa gûtirimanîra, na gîa kûtheria kîritîro kîa igongwana, na gîa kûthirîria athînjîri-Mûrungu meeyia, na gîa kûthirîria antû ba Israeli meeyia.

³⁴Kîgongwana gîa kûthiragîria antû ba Israeli meeyia kîritagwa o rîmwe ndeene ya mwaka. Waatho bûu bûthingatagwe magiita jonthe.” Musa arathithia o ta ûrîa MWATHANI aamwîrîte.