Read KIMERU BIBLE PROTESTANT EDITION Ala 17 Bible Online

Ala 17 - KIMERU BIBLE PROTESTANT EDITION bible

Ala 17

¹MWATHANI nî aarîîrie Musa aramwîra atîrî,

²“Arîria Aaroni na ataana baawe, na antû bonthe ba Israeli, ûbeere ûûni MWATHANI ndiuga ûjû:

³Mûisraeli wonthe akëeja kûûragîra ndeegwa, kana gatûrûme, kana nthenge îrî kîgongwana kambîîne kana oome ya kambî,

⁴na akarega gwikia kîgongwana kîu mwariine jwa îema rîa gûtirimanîra rîa MWATHANI, muntû ûu agaatarwa arî na maatia ja kûûraga nyomoo.

⁵Waatho bûu, nî bwa gûtûma antû ba Israeli baikagîria mûthînjîri-Mûrungu nyomoo cia igongwana au mwariine jwa îema rîa gûtirimanîra. Nabo baritage nyomoo iu îrî igongwana bia gûcwaa thîîrî naani, batige kûritagîra igongwana ithakeene.

⁶Mûthînjîri-Mûrungu akaminyîria kîritîro kîa igongwana tharike ya nyomoo iu, au mbere ya îema rîa gûtirimanîra. Acoke aîthîîrie maguta ja nyomoo iu, nîkenda jeethîrwa jarî na yeera rîrîega kîrî ni.

⁷Tontû bûû, antû ba Israeli, bagatiga kûritagîra Nkoma ikari ta mbûri igongwana bakîmîthaathayia. Waatho bûu bathingatage nthukîîne ciaao cionthe.

⁸“Ningî ûbeere ûjû: Mûisraeli wonthe, kana mûgeni ûrîa ûtûûraga amwe nabo, akëeja kûrita kîgongwana gîa gwakîîria, kana kîgongwana kîa mûthemba jûngî,

⁹na akarega gwikia nyomoo îrîa akûrita îrî kîgongwana mwariine jwa îema rîa gûtirimanîra nîkenda anditîra, muntû ûu atîtarwa arî ûmwe wa antû baakwa.

¹⁰ “Mûisraeli wonthe, kana mûgeni ûrîa ûtûûranagîra amwe nabo akëeja kûrîa nyama îrî na tharike îmbîthî, nkaamûmena na atige gûtaranagîrua na antû baakwa.

¹¹ Tharike nîyo îtûmaga gîntû kîîthîrwa kîrî mwoyo. Nîkîo gîtûmaga mbuga tharike îtûûragwe kîritîroone kîa igongwana nîkenda îbûthirîria meeyia. Tharike îthiragia meeyia nîûntû îrî mwoyo.

¹²Kîu nîkîo gîtûmîte mbîîra antû ba Israeli na ageni barîa baatûûranagîra amwe nabo, atî gûtî muntû ûbuîrîte kûrîa nyama îrî na tharike îmbîthî.

¹³Ningî muntû kinya ûrîkû wa Israeli kana mûgeni kinya ûrîkû wa barîa batûûraga amwe nabo, akëeja kûthooga nyomoo, kana nyoni ya irîa irîîjagwa, no mwanka amîûraga eetûûre tharike yaayo nthî na amîkunîkîre na mûthetu.

¹⁴Tharike nîyo îtûmaga biûmbe bionthe biîthîrwa birî mwoyo, nîûntû mwoyo jwa biûmbe biu jwîthagîrwa jûrî ndeene ya tharike yaabio. Kîu nîkîo gîtûmîte nkaania antû ba Israeli batîkaarie nyama irî na tharike îmbîthî. Muntû wonthe ûrîa ûkaarîîjaga nyama ta iu, agaatiga gûtaranagîrua na antû baakwa.

¹⁵Ningî muntû kinya ûrîkû wa Israeli kana wa ageni barîa batûûranagîra amwe nabo, akëeja kûrîa nyama ya nyomoo îkuîte na bwayo, kana nyomoo yûûragi nî îngî, muntû ûu, no mwanka aûûrage nguû, na athambe, îndî agaatinda atîtheri mwanka ûgoro. Rîu nîrîo akaathera.

¹⁶Îndî aarega kûûra nguû, na athamba, agaakanûkua nîûntû bwa ûthûûku bûu athithîtie.”