Read KIMERU BIBLE PROTESTANT EDITION Ala 18 Bible Online

Ala 18 - KIMERU BIBLE PROTESTANT EDITION bible

Ala 18

¹Ningî MWATHANI nî aarîîrie Musa aramwîra atîrî,

²“Arîria antû ba Israeli ûbeere ûjû: Ni nî ni MWATHANI Mûrungu waao.

³Bûkáthithagia mantû ta jarîa jathithagua nthîgûrûûne ya Misri kûrîa bwatwîîre. Ningî bûkáthithagia mantû ta jarîa jathithagua nthîgûrûûne ya Kanaani kûrîa mbwikîtie. Bûkáthingata mîîtîre yaao.

⁴Buî athîkagîreeni mawaatho jaakwa, na bûthingatage mooritani jaakwa. Ni nî ni MWATHANI Mûrungu weenu,

⁵ bûmenyagîîre mooritani jaakwa na mawaatho jaakwa nîûntû muntû aajamenyeera, agaatûûra mwoyo. Ni nî ni MWATHANI.

⁶“Gûtî muntû ûbuîrîte kûthenganîîra na muntû wa ndûgû ciaao. Ni nî ni MWATHANI.

⁷Muntû atîbuîrîte kûthenganîîra na ng'ina, aagîra îthe nthoni. Nîkwîthîrwa ûu nî ng'ina, na atîbuîrîte kûmwagîra nthoni.

⁸ Muntû atîbuîrîte kûthengeera mûka wa îthe. Kûu nî kwagîra îthe nthoni.

⁹ Muntû atîbuîrîte kûthengeera mwarî wa ng'ina, ëethîrwa arî mwana wa îthe, kana mwana wa ng'ina. Ëethîrwa aciarîri nja yeenu kana aciarîri kûngî.

¹⁰Muntû atîbuîrîte kûthenganîîra na mwarî wa mûtaana waawe, kana mwarî wa mwarî waawe. Kûu nî kûbaagîra nthoni na gûciagîra nthoni.

¹¹Muntû atîbuîrîte kûthenganîîra na mwarî wa ng'ina ûciari nî mûka ûngî wa îthe. Ûu nî mwarî wa ng'ina.

¹² Muntû atîbuîrîte kûthenganîîra na mwarî wa ng'ina wa îthe. Ûû nî mûka wa ndûgû ya abaagu.

¹³Muntû atîbuîrîte kûthenganîîra na mwarî wa ng'ina wa ng'ina. Ûu nî mûka wa ndûgû ya ng'ina.

¹⁴Muntû atîbuîrîte kûthenganîîra na mûka wa îthe mûkûrû kana îthe mwanake. Ûu nî nyakwe mûkûrû kana nyakwe mwanake.

¹⁵ Muntû atîbuîrîte kûthenganîîra na mûka wa mûtaana waawe. Ûu nî mûka wa mûtaana waaku na ûtîbuîrîte kûthenganîîra nawe.

¹⁶ Muntû atîbuîrîte kûthenganîîra na mûka wa mûtaana wa ng'ina. Ûîu nî mûka wa mûtaana wa nyakwe.

¹⁷ Muntû atîbuîrîte kûthenganîîra na mûka na acoka athenganîîra na mwarî waawe. Ningî atîbuîrîte kûthenganîîra na mwarî wa mûtaana wa mûka ûu, kana athenganîîra na mwarî wa mwarî wa mûka ûu. Bûu nî ûntû bûbûthûûku mono. Nîkwîthîrwa aarî bau nî ba ndûgû yaaku.

¹⁸Muntû atîbuîrîte kûgûra mwarî wa ng'ina wa mwekûrû waawe, kana athenganîîra nawe mwekûrû waawe arî mwoyo.

¹⁹ “Muntû atîbuîrîte kûthenganîîra na mûka akîonaga mweri, nîûntû atîtheri.

²⁰ Muntû atîbuîrîte kûthenganîîra na mûka wa muntû ûngî, aithûûkia nawe.

²¹ Muntû atîbuîrîte kûrita aana baawe igongwana bia gwakîîria kîrî mûrungu jwa mûng'uanano jwa Moleki. Kûu nî gwîkîra riîtwa rîaakwa îgi. Ni nî ni MWATHANI.

²² Ntomûrûme atîbuîrîte kûthenganîîra na ntomûrûme ûngî. Bûu nî ûntû bûbûtomoku bwa gûciîkîra mûgiro.

²³ Muntû atîbuîrîte kûthenganîîra na nyomoo; eethîrwa arî ntomûrûme kana mûka. Kûu nî kwangaratana gûkûnene.

²⁴“Bûtîbuîrîte gûciîkîra mûgiro na mantû ta jau, nîûntû mantû ta jau nîjo jathithagua nî antû ba mîgongo îngî îrîa nkûbwîngîra.

²⁵Mantû ta jau nîjo beekîîre nthîgûrû ciaao mûgiro najo. Naani ndîrakanûkia nthîgûrû nîûntû bwa meeyia jaao. Nayo nthîgûrû îrabataîka.

²⁶Îndî buî bûthingatage mawaatho jaakwa na kwathîkîra mooritani jaakwa. Bûtîbuîrîte kûthithagia mantû jamathûûku ta jau, bûrî Aisraeli kana ageni barîa batûûraga amwe naabuî.

²⁷Nîkwîthîrwa antû barîa baatûûraga nthîgûrûûne îîu mbere yeenu nî baathithîrie mantû jamatomoku. Tontû bûû, nthîgûrû îragîa mûgiro.

²⁸Buî menyagîîreeni bûtîgeekîre nthîgûrû mûgiro, îtîkeeje kûbûtaîka o ta ûrîa yaataîkîre barîa baatûûra ku mbere yeenu.

²⁹Menyeni atî muntû wonthe ûrîa ûkaathithia mantû jamatomoku ta jau, muntû ûu agaatiga gûtaranagîrua na antû ba Israeli.

³⁰Tontû bûû, thingatageeni Waatho bûu. Bûtîbuîrîte kûthithia ûntû noo bûmwe bwa mantû jau jamatomoku jathithagua nî antû barîa baatûûraga nthîgûrûûne iu mbere ya bwîta ku. Bûtîbuîrîte gûciîkîra mûgiro na mantû ta jau. Ni nî ni MWATHANI Mûrungu weenu.”