Read KIMERU BIBLE PROTESTANT EDITION Ala 19 Bible Online

Ala 19 - KIMERU BIBLE PROTESTANT EDITION bible

Ala 19

¹MWATHANI nî aarîîrie Musa aramwîra atîrî,

² “Arîria kîûthûrano kionthe kîa antû ba Israeli ûkîîre ûjû: Bûbuîrîte kwaa babatheru nîûntû ûûni MWATHANI Mûrungu weenu ndî ûmûtheru.

³ Muntû wonthe kîrî buî abuîrîte gwîkagîîra îthe na ng'ina, na kûthithia ûrîa kûbuîrîte kûthithua ntukû ciaakwa cia sabatû. Ni nî ni MWATHANI Mûrungu weenu.

⁴ Bûtîbuîrîte kwithithîria mîrungu ya mîng'uanano ya gûkerûra kana bûmîthaathayia. Ni nî ni MWATHANI Mûrungu weenu.

⁵“Rîrîa bûkaaritaga igongwana bia gûcwaa thîîrî naani, bûthingatage mawaatho jarîa mbweete nîkenda mbiîtîkagîîria.

⁶Nacio nyama cia nyomoo iu cia kîgongwana nî irîîjagwe ntukû îrîa yongwa kîgongwana gîkûritwa kana rûûnene. Îndî nyama iu ikëeja gûtigara igakinyia ntukû ya ithatû, no mwanka ciakîîrue.

⁷Nyama iu ikëeja gûkinya ntukû ya ithatû itîbuîrîte kûrîîwa nîûntû itîtheri. Naani ntîîtîkîîria kîgongwana kîu nîûntû gîkûgîa mûgiro.

⁸Muntû ûrîa wonthe ûkaarîîjaga nyama ta iu, agaakanûkua nîûntû bwa meeyia jau, nîûntû bwa gwîkîra gîntû kîathûrîri MWATHANI mûgiro. Muntû ta ûu, agaatiga gûtaranîrua na antû ba Israeli.

⁹ “Rîrîa bûgûketha miuunda yeenu bûgáketha bûkinyia mîankeene. Ningî bûtîbuîrîte gûcoka gûketha kûrîa bûthirîtie gûketha.

¹⁰Ningî bûtîbuîrîte gûcokaga kûûrûra nzabibû irîa itigeere nyuma ya gûketha kana bwojania nzabibû irîa igwîte nthî kûu miuundeene yeenu ya mîzabibû. Tigageeni nzabibû iu nîkenda itigagîrwa nkîa na ageni. Ni nî ni MWATHANI, Mûrungu weenu.

¹¹ “Bûkáiya, kana bwaria ûrongo, kana bwaîrania bwingwa.

¹² Ûgáciîtia na riîtwa rîaakwa ûkîmenyaga ûtîûjûria wîrane bûu, wîja kûmenithia riîtwa rîaakwa. Ni nî ni MWATHANI.

¹³ “Muntû atîbuîrîte kwinyîîria muntû ûngî amwiîra into biaawe. Muntû wa ngûgî wa ntukû abuîrîte kûrîagwa mûchaara jwaawe o ntukû îîu.

¹⁴ Muntû atîbuîrîte kûruma gîtaigua, kana agiitaria mûtumuumu. Îndî buî mbathîkagîreeni. Ni nî ni MWATHANI.

¹⁵ “Thingataga ûûma magambeene ûtîkwendeera muntû noo ûrîkû ëethîrwa arî nkîa kana gîtonga. Îndî ûgiitagîre antû bangî ûrîa kwagîrîte.

¹⁶Ûgéetaga ûkîguutaga antû bangî, kana ûrita ûkûûjî bûrîa bûûmbîkia gûtûma muntû ûngî atuîrwa kûûragwa. Ni nî ni MWATHANI.

¹⁷ “Ûtîbuîrîte kûthûûra muntû ûngî, îndî ûbuîrîte kwaranîria nawe ûtîkéeje gûtûma eeyia.

¹⁸ Ûtîbuîrîte kwirîagîria wengwa kana ûkaraga ûthwîre antû bangî. Îndî eendaga antû bangî ta ûrîa ûciendeete wengwa. Ni nî ni MWATHANI.

¹⁹ “Thingatageeni maathana jaakwa. Bûtîbuîrîte kûbandithania nyomoo itî cia mûthemba jûmwe. Bûtîbuîrîte kwaanda miuunda mbeeû cia mîthemba mwanya mwanya. Bûtîbuîrîte gwîkîra nguû itumi na itambaa mwanya mwanya.

²⁰“Ntomûrûme akëeja kûthenganîîra na mûka nkombo na mûka ûu akëethîrwa atîrîîri mbeecha cia kûmûkûûra ûkomboone, na akëethîrwa akîgambagua nî ntomûrûme ûngî, bobaîrî nî babuîrîte gûkanûkua. Îndî batîbuîrîte kûûragwa, nîûntû mûka ûu nî nkombo.

²¹Ntomûrûme ûu no mwanka aikie ntûrûme mwariine jwa îema rîa gûtirimanîra. Nditagîrwa ntûrûme îîu îrî kîgongwana gîa kûthiria maatia.

²²Mûthînjîri-Mûrungu akaarita ntûrûme îîu, îrî kîgongwana gîa kûthiria maatia, nîkenda mûrekera.

²³“Rîrîa bûgaakinya nthîgûrûûne ya Kanaani, na bwaande mîtî ya mîthemba yonthe, ya matuunda, matuunda jau jakethagîrwa jatîtheri. Naabuî bûtîbuîrîte kûjarîîjaga mîaka îîu îthatû nîûntû jatîîthagîrwa jatheri.

²⁴Naju mwaka jwa îna jwakinya bwathûrage matuunda jau jonthe jarî kîgongwana gîa nkaatho kîrî ni.

²⁵Îndî mwakeene jwa îtaano, no bûrîîjage matuunda ja mîtî îîu. Bwathithia ûu, mîtî îîu îgaaciaraga matuunda jamaingî. Ni nî ni MWATHANI Mûrungu weenu.

²⁶ Bûkárîîjaga nyama itîîte bwega, irî na tharike. Ningî bûtîbuîrîte kûringagîria antû bangî kana bûbaroga.

²⁷ Bûkéenjaga mariama kana bwenja ireru,

²⁸kana bwitemanga kana bûciananga kwonania kwithikîîra nîûntû bwa barîa bakuîte. Ni nî ni MWATHANI.

²⁹ “Bûgéetîkagîîria aarî beenu beekîrithagua nthao bûbeetîkîîria kwaa amaraya, nthîgûrû îtîkeeje kûûjûra ûmaramari yûûjûra ûthûûku.

³⁰ Menyagîîreeni ntukû ciaakwa cia sabatû na bwîkagîîre antû atheru arîa nthaathagîrua. Ni nî ni MWATHANI.

³¹ “Bûtîbuîrîte kwonagîrwa mantû nî aringia kana barîa baranagîria na roho cia antû barîa baakuîre, batîkéeje kûbwîkîra mûgiro. Ni nî ni MWATHANI.

³²“Gwatagîreeni antû babakûrû nthoni bûbaeejage gîtîîo. Ningî bûnkîrage ni Mûrungu weenu. Ni nî ni MWATHANI.

³³ “Bûtîbuîrîte kûthithagîria ageni barîa batûûraga nthîgûrûûne yeenu ûntû bûbûthûûku.

³⁴Bûbuîrîte kûthithagîria barîa batûûraga nthîgûrûûne yeenu mantû o ta jarîa bûthithagîria antû beenu. Bûbuîrîte kûbeenda o ta ûrîa bûciendeete bwingwa, nîkwîthîrwa kinya buî nî bwaarî ageni nthîgûrûûne ya Misri. Ni nî ni MWATHANI Mûrungu weenu.

³⁵ “Bûtîbuîrîte kwayia antû bangî bûgîtumagîra ithimi bitîagîrîte; birîa bithimaga ûraaja, kana birîa bithimaga ûrito kana birîa bithimaga mûng'ana.

³⁶Bûbuîrîte gûtumagîra ithimi birîa biagîrîte; ithimi bia kûthima ûrito, na itheti bia kûthima into bibiûmo, na ithimi bia kûthima into birîa binyûûrûkaga ta rûûjî. Ni nî ni MWATHANI Mûrungu weenu ûrîa waabûritîre nthîgûrû ya Misri.

³⁷No mwanka bwathîkagîre maathana jaakwa na mawaatho jaakwa. No mwanka bûjathingatage. Ni nî ni MWATHANI.”