Read KIMERU BIBLE PROTESTANT EDITION Ala 2 Bible Online

Ala 2 - KIMERU BIBLE PROTESTANT EDITION bible

Ala 2

¹Ningî MWATHANI nî eetîre na mbere kwîra Musa atîrî, “Rîrîa muntû akûnditîra kîgongwana kîa irio ni MWATHANI; nî aritage mûtu jûmwinyu, ajwîtûûrîrîîtie maguta na ajwîkîrîte ubaani.

²Nawe agaagiikia kîrî athînjîri-Mûrungu, tabo ataana ba Aaroni. Mûthînjîri-Mûrungu ûmwe waao ajûkie mûtu jûu na nkuundi, na ajûkie maguta, na ajûkie ubaani yonthe, abiakîrîîrie kîritîroone kîa igongwana. Into biu bikethagîrwa birî bia kûririkanagwa. Kîgongwana kîu gîa gwakîîria gîkethagîrwa kîrî na yeera rîrîega kîrî ni.

³Into birîa bigaatigaraga bia kîgongwana kîu kîa irio bikethagîrwa birî bia athînjîri-Mûrungu. Nabio nî into bibitheru mono nîûntû nî bia kuuma kîrî kîgongwana gîa gwakîîria kîrîa nditîri.

⁴“Muntû akëeja kûreeta kîgongwana kîa mîgaate, nî areete mîgaate îtîkaandi na mûtheega jwa kwimbithia. Mîgaate îîu îîthîrwe îrugi na mûtu jûmwinyu juungeenue na maguta ja nzeituni. Kana areete tûmîgaate tûtûûthû twaki maguta.

⁵Kîgongwana gîaaku kîethîrwa nî kîa mîgaate îkaandîri karaîîne, mîgaate îîu îîthagîrwe îrî mûtu jûmwinyu jûtîkîri mûtheega jwa kwimbithia juungeenue na maguta.

⁶Ûmîng'enyûrangage na ûmîîtûûrîrie maguta. Kîu nîkîo kîgongwana kîa irio.

⁷Ningî kîgongwana gîaaku kîa irio kîethîrwa nî kîa gîntû kîrugi na karaî, kîîthîrwe kîrî kîa mûtu jûmwinyu juungeenue na maguta.

⁸Naagwe ûndeetagîre kîgongwana kîu kîa irio. Wareeta ûnenkagîre mûthînjîri-Mûrungu, nawe agîîke kîritîroone kîa igongwana.

⁹Mûthînjîri-Mûrungu akaajûkia gîchunchî kîmwe gîa kîgongwana kîu kîee gîa kûririkanagwa. Nawe akîrite kîrî kîgongwana kîa irio kîîthîrîîtue kîritîroone kîa igongwana. Nakîo gîkeethîrwa kîrî na yeera rîrîega kîrî ni.

¹⁰Kîgongwana kîu kîa irio kîrîa gîgatigaraga, gikethagîrwa kîrî kîa athînjîri-Mûrungu. Nakîo nî gîkîtheru mono nîûntû nî bia kuuma kîrî kîgongwana gîa gwakîîria kîrîa nditîri.

¹¹“Ntîbuîrîte kûritagîrwa kîgongwana kîa irio kiungeenue na mûtheega jwa kwimbithia kana nainchû birî kîgongwana.

¹²No bûnditagîre mûtheega jwa kwimbithia na nainchû birî Kîgongwana kîa maketha ja mbere, îndî bitîbuîrîte kwîîthagîrua kîritîroone kîa igongwana.

¹³Îkagîreeni chumbî igongwaneene bieenu bionthe bia irio, nîûntû chumbî îkoonanagia kîrîkanîro kîeenu naani.

¹⁴“Muntû akëeja kûnditîra kîgongwana kîa irio bia mbere, areetage birîa biûûri birî bia mbere na biîthagîrwe biakîîtue.

¹⁵Ningî kîgongwana kîu gîkagîrwe maguta na gîkagîrwe ubaani. Kîu nîkîo kîgongwana kîa irio.

¹⁶Mûthînjîri-Mûrungu akaajûkia gîchunchî kîmwe kîa kîgongwana kîu kîee gîa kûririkanagwa. Nakîo kîgongwana kîu kîritanagîrue na maguta na ubaani. Kîu gîkeethîrwa kîrî kîgongwana kîa irio gîa gwakîîria kîriti kîrî ni MWATHANI.”