Read KIMERU BIBLE PROTESTANT EDITION Ala 20 Bible Online

Ala 20 - KIMERU BIBLE PROTESTANT EDITION bible

Ala 20

¹MWATHANI nî aarîîrie Musa aramwîra atîrî,

²“Arîria antû ba Israeli ûbeere ûjû: Muntû kinya ûrîkû wa antû ba Israeli, kana mûgeni ûrîa ûtûûraga Israeli, akëeja kûrita aana baawe barî kîgongwana kîrî mûrungu jwa mûng'uanano jûrîa jwîtagwa Moleki, muntû ûu abuîrîte kûûragwa na maiga nî antû.

³Naani nkaamûmena atige gûtaranagîrua na antû ba Israeli, nîûntû nî aritîte aana baawe kîrî mûrungu jwa mûng'uanano jûrîa jwîtagwa Moleki, na nîûntû bwa gwîkîra antû arîa nthaathagîrua mûgiro, na kûmenithia riîtwa rîaakwa rîrîtheru.

⁴Antû ba Israeli bakëeja gûcaîîra muntû ta ûu ûritîte aana baawe barî kîgongwana kîrî mûrungu jwa mûng'uanano taju Moleki, bakarega kûmûûraga,

⁵ûûni nkaamûmena amwe na antû ba nja yaawe, na ntige kûmûtaranagîria na antû ba Israeli, na ntige gûtaranagîria barîa bamûthingataga kûthaathayia mûrungu jwa mûng'uanano jûrîa jwîtagwa Moleki, amwe na antû ba Israeli.

⁶“Muntû akëeja gûcwaa kîrîra kuuma kîrî aringia na barîa baranagîria na roho cia antû barîa baakuîre, na akabathingata bakîthaathayia mîrungu ya mîng'uanano, nkaamûmena na ntige kûmûtaranîria na antû ba Israeli.

⁷Tontû bûû, ciathûrageni bwee babatheru nîûntû ûûni nî ni MWATHANI Mûrungu weenu.

⁸Athîkagîreeni mawaatho jaakwa, bûjoojûragie; nîkwîthîrwa ni nî ni MWATHANI ûrîa ûbweethetie babatheru.

⁹ Muntû wonthe ûrîa ûkaaruma îthe kana arume ng'ina, no mwanka ooragwe. Nîwe ûkeethîrwa aireteereete gîkuû wengwa nîûntû bwa kûruma îthe kana ng'ina.

¹⁰ “Ntomûrûme akëeja kûthûûngîîra na mwekûrû wa muntû ûngî, bobaîrî nî athûngîîri na no mwanka booragwe.

¹¹ Ntomûrûme ûrîa ûkaathengeera mwekûrû wa îthe, muntû ûu akethagîrwa aagîrîte îthe nthoni. Nawe amwe na mwekûrû ûu no mwanka booragwe. Nabo bakeethîrwa baireteereete gîkuû kîaao bongwa.

¹² Ntomûrûme akëeja kûthengeera mwekûrû wa mûtaana waawe, we na mwekûrû ûu no mwanka booragwe. Kûu nî kûthenganîîra na mûka wa mûtaana na nî ûntû bûbûthûûku mono. Nîbo bongwa bakeethîrwa baireteereete gîkuû kîu.

¹³ Ntomûrûme akëeja kûthengeera ntomûrûme ûngî bobaîrî bakeethîrwa bagûciîkîra mûgiro na no mwanka booragwe. Nîbo bakeethîrwa baireteereete gîkuû kîaao bongwa.

¹⁴ Ntomûrûme akëeja kûgûra mûka na akagûra mwarî wa mûka ûu, kinya ûntû bûu nî bûbûthûûku mono. Bonthe babuîrîte gwakîîrua nîkenda ûthûûku buuma kîrî buî.

¹⁵ Ntomûrûme akëeja kûthengeera nyomoo, no mwanka ooragwe, na kinya nyomoo îîu yûragwe.

¹⁶Mûka akëeja gûcwaa nyomoo îkamûthengeera, mûka ûu abuîrîte kûûragwa na kinya nyomoo îîu îbuîrîte kûûragwa. Mûka ûu nîwe wiretereete gîkuû kîaawe na areetera nyomoo îîu gîkuû.

¹⁷ “Ntomûrûme akëeja kûgûra mwarî wa ng'ina kinya bëethîrwa tî ba ng'ina ûmwe, akamûthengeera, bûu nî ûntû bûrî îgi mono. Nabo bakeengwa baume kîrî antû ba Israeli. Muntû ûtheengeereete mwarî wa ng'ina akëethîrwa athûûkîtie mono, eekîrithia mwarî wa ng'ina îgi.

¹⁸ Ntomûrûme akëeja kûthengeera mûka rîrîa mûka ûu akwona mweri, bobaîrî bakeengwa kuuma kîrî antû ba Israeli, bakeethîrwa baunîte mawaatho jarîa jatîbuîri kuunwa rîrîa mûka akwona mweri.

¹⁹ Muntû atîbuîrîte kûthenganîîra mwarî wa ng'ina kana athenganîîra na mwarî wa ng'ina wa îthe. Kûu nî kwagîra muntû wa ndûgû nthoni. Nabo antû bau bobaîrî bagakanûkua nîûntû bwa ûthûûku.

²⁰Muntû akëeja kûthengeera mûka wa mûtaana wa ng'ina wa îthe, kûu nî kwagîra îthe mûkûrû kana îthe mwanake nthoni. Muntû ûu na mûka ûu no mwanka bakanûkue. Nabo bagaakua barî mbûra tûû.

²¹ Muntû akëeja kûthengeera mûka wa mûtaana wa ng'ina rîu nî îgi. Nawe muntû ûu na mûka ûu bagaatûûra barî mbûra tûû.

²²“Tontû bûû, athîkagîreeni mawaatho jaakwa jonthe na bûthingatage maathana jaakwa jonthe, ntîkeeje kûbwînga kuuma nthîgûrûûne îrîa mbwikîtie bwîta gûtûûra ku.

²³Bûtîbuîrîte kûthingata wîthîre bwa mîgongo îrîa nkûbwîngîra, nîûntû mantû jau jonthe nîjo baathithagia ndîrabathûûra mono.

²⁴Îndî buî nî ndaabwîrîre atî bûkaigwatîre nthîgûrû yee yeenu, nayo nî nthîgûrû îrîa nthongi na îrî mûthetu jûmûnoru na ûtonga bûbwingî. Ni nî ni MWATHANI Mûrungu weenu ûrîa ûbûthuurîte abwathûra kuuma kîrî antû ba mîgongo îngî.

²⁵Tontû bûû, no mwanka bwathûranage nyomoo irîa itheri na irîa itîtheri, na nyoni irîa itîtheri na irîa itheri. Bûtîbuîri gûciîkîra mûgiro na nyomoo, kana na nyoni, kana na gîntû kinya kîrîkû, kîrîa gîîtaga na nthî kîrîa mbugîîte gîtîtheri na atî gîtîbuîri kûrîîwa.

²⁶No mwanka bwe babatheru nîûntû bwaakwa. Nîkwîthîrwa ni MWATHANI ndî ûmûtheru. Ndaabûthuurîre ndîrabwathûra kuuma kîrî antû ba mîgongo îngî nîkenda bwaa antû baakwa.

²⁷“Ntomûrûme, kana mûka ûrîa ûkaa mûringia kana wa kwaranagîria na roho cia antû barîa baakuîre, no mwanka ooragwe na maiga. Nîwe ûkeethîrwa aireteereete gîkuû kîaawe wengwa.”