Read KIMERU BIBLE PROTESTANT EDITION Ala 21 Bible Online

Ala 21 - KIMERU BIBLE PROTESTANT EDITION bible

Ala 21

¹MWATHANI nî aarîîrie Musa aramwîra arîrie athînjîri-Mûrungu, tabo nchiarwa cia Aaroni abeere ûjû, “Mûthînjîri-Mûrungu atîbuîrîte gwîta akuî na kiimba kîa muntû wa ndûgû ciaao atîkeeje gûciîkîra mûgiro.

²Oomba gwîta mathikoone këethîra muntû ûu ûkuîte nî ng'ina, kana îthe, kana mûtaana waawe, kana mwarî waawe, kana mûtaana wa ng'ina,

³kana mwarî wa ng'ina ûtîgûri îndî atwîîre nja ya mûthînjîri-Mûrungu ûu.

⁴Mûthînjîri-Mûrungu atîbuîrîte gûciîkîra mûgiro eeta mathikoone ja muntû wa ndûgû cia ba mwekûrû waawe.

⁵ Athînjîri-Mûrungu batîbuîrîte kwenjagwa mîtuundu yaao kana beenja ireru, kana baitemanga mîîrî yaao kwonania kwithikîîra.

⁶Babuîrîte kwîthîrwa barî babatheru na batîbuîrîte gwîkîrithia riîtwa rîa Mûrungu waao îgi. Nîkwîthîrwa nîbo banditagîra igongwana bia gwakîîria. Tontû bûû, babuîrîte kwîthîrwa barî babatheru.

⁷Athînjîri-Mûrungu batîbuîrîte kûgûra mûka mûmaraya, kana mûka wathengeerwa nî ntomûrûme ûngî, kana mûka wîngi nî mûkûrû waawe. Nîkwîthîrwa kîrî ni mûthînjîri-Mûrungu abuîrîte kwîthîrwa arî ûmûtheru.

⁸Athûrageeni athînjîri-Mûrungu bûkaboona barî babatheru, nîkwîthîrwa banditagîra igongwana birî irio biaakwa. Nîkwîthîrwa ûûni MWATHANI, nî mbwathûrîte, ndî ûmûtheru.

⁹Mwarî wa mûthînjîri-Mûrungu akëeja kwaa maraya agûciîkîra îgi na eekîra îthe îgi. Mwarî ûu abuîrîte kwîthîîrua.

¹⁰“Mûthînjîri-Mûrungu ûrîa mûnene ûrîa ûthuuri na aathûrwa na njîra ya gwîtûûrîrua maguta, na eetîkîîrua gwîkagîra nguû cia mûthînjîri-Mûrungu atîbuîrîte kûrega gûcanûra mûtuundu kana atambûranga nguû kwonania kwithikîîra.

¹¹Ningî atîbuîrîte gûciîkîra mûgiro eeta akuî na kiimba, kinya kiimba kîu kîethîrwa kîrî kîa îthe kana kîa ng'ina.

¹²Ningî atîbuîrîte gwîta mathikoone atîkeeje gûciîkîra mûgiro na eekîra kîûrû mûgiro. Nîkwîthîrwa we nî athuuri na aathûrwa. Ni nî ni MWATHANI.

¹³Ningî mûthînjîri-Mûrungu agatua kûgûrana abuîrîte kûgûra mwarî karaiti.

¹⁴Atîbuîrîte kûgûra mûka ntigwa, kana mûka wîngi nî mûkûrû waawe, kana mûka waathengeerwa nî ntomûrûme ûngî, kana mûka mûmaraya. Îndî abuîrîte kûgûra mwarî karaiti kuuma mwîrîgeene jwaao.

¹⁵Abuîrîte kûthithia ûu atîkeeje gwîkîra nchiarwa ciaawe mûgiro. Nîkwîthîrwa ni nî ni MWATHANI ûrîa ûmûtheretie.”

¹⁶MWATHANI nî aarîîrie Musa aramwîra atîrî,

¹⁷“Arîria Aaroni ûmwîre ûjû: Gûtî muntû wa rûrîîjo rwaawe nthukîîne ciaao cionthe, ûrî na antû aathûûku noo amwe mwîrîîne jwaawe, ûbuîrîte kûnditîra kîgongwana kîa irio.

¹⁸Gûtî muntû ûrî na antû athûûku ûbuîrîte gûkuîîria kîritîro kîa igongwana; ëethîrwa arî mûtumuumu, kana muntû ûkûthuûka, kana muntû ûthûûkangi ûthiû, kana muntû ûrî na magûrû jatîng'aneene,

¹⁹kana muntû woonji kûgûrû, kana muntû woonji njara,

²⁰kana muntû ûrî na thuruku mûgongo, kana mbee, kana muntû ûrî na riitho rîrîthûûku, kana muntû ûrî na were kana mûrimo jûmûthûûku jwa gîkoonde, kana muntû ûmwakûre.

²¹Gûtî muntû wa nchiarwa cia Aaroni mûthînjîri-Mûrungu, ûrî na antû athûûku ûbuîrîte gûkuîîria kîritîro kîa igongwana aritîra MWATHANI kîgongwana kîa irio.

²²Oomba kûrîa irio birîa biritîri Mûrungu birî kîgongwana. Akarîa irio birîa bitheri na birîa biritîri antû arîa atheru buru.

²³Îndî nîûntû arî na antû athûûku atîbuîrîte gûkuîrîîria rwambambio rûrîa rûrî antû atheru kana akuîrîîria kîritîro kîa igongwana, atîkeeje gwîkîra kîûrû mûgiro. Nî ni MWATHANI ûrîa ûbatheragia.”

²⁴Musa nî aarîîrie Aaroni na ataana baawe, na antû bonthe ba Israeli, arabeera mantû jau.