Read KIMERU BIBLE PROTESTANT EDITION Ala 22 Bible Online

Ala 22 - KIMERU BIBLE PROTESTANT EDITION bible

Ala 22

¹MWATHANI nî aarîîrie Musa aramwîra atîrî,

²“Arîria Aaroni na ataana baawe ûbeere bamenyagîîre igongwana birîa nditagîrwa nî antû baakwa ba Israeli nîkenda batîkéeje gwîkîrithia riîtwa rîaakwa mûgiro. Ni nî ni MWATHANI.

³Ûbeere ûjû: Muntû wa nchiarwa cieenu akëethîrwa atîtheri, atîbuîrîte gwîta akuî na igongwana birîa nditîri nî antû baakwa ba Israeli. Akëeja kûthithia ûu, atîîtîkîîrua kaîrî gûtumîkagîra kîritîroone kîa igongwana magiita jonthe. Ni nî ni MWATHANI.

⁴Gûtî muntû wa rûrîîjo rwa Aaroni ûbuîrîte kûrîa igongwana akëethîrwa arî na mûrimo jûmûthûûku jwa gîkoonde kana atîtheri, akëeja kûringithia kiimba kana airathîte mbeeû ya ûrûme,

⁵kana akaringithia nyamû îtîtheri kana muntû ûtîtheri, kana ûntû bûngî bûrîa bûtûmaga muntû eethîrwa atîtheri.

⁶Mûthînjîri-Mûrungu akëeja gûtongithia gîntû kinya kîmwe kîa biu agaatinda atîtheri mwanka ûgoro. Ningî atîbuîrîte kûrîa igongwana birîa nditîri atîambîte kûthamba.

⁷Riûa rîathûa nîrîo akaa ûmûtheru, na rîu oomba kûrîa igongwana nîûntû biu nîbio arîîjaga.

⁸Ningî mûthînjîri-Mûrungu atîbuîrîte kûrîa nyama ya nyomoo îkuîte na bwaayo kana yûragi nî nyamû ingî atîkeeje kûgîa îgi. Ni nî ni MWATHANI.

⁹Nabo babuîrîte kwathîkagîra mawaatho jarîa mbaeete batîkeeje kwîyia bakua. Ni nî ni MWATHANI ûrîa ûbatheragia.

¹⁰“Igongwana bibuîrîte kûrîîjagwa nî athînjîri-Mûrungu na antû ba nja ciaao akî. Gûtî muntû ûngî ûbuîrîte kûbirûma eethîrwa agîtûûraga amwe nabo kana arî mûriti wa ngûgî.

¹¹Îndî nkombo ya mûthînjîri-Mûrungu îrîa agûrîte na mbeecha, kana îrîa îciarîri nja ya mûthînjîri-Mûrungu no îrîe biakûrîa biu.

¹²Mwarî wa mûthînjîri-Mûrungu akëeja kûgûrwa nî muntû ûtî wa nchiarwa cia athînjîri-Mûrungu mwarî ûu atîbuîrîte kûrîîjaga igongwana.

¹³Îndî mwarî wa mûthînjîri-Mûrungu akëeja kwîthîrwa nî ntigwa, kana akeengwa nî mûrûme, kana akëethîrwa atî na kaana, na agacoka gûtûûra kwa îthe o ta rîrîa aatûûraga arî mwarî; rîu no arîe biakûrîa birîa biriti birî kîgongwana. Nî antû ba nja ya athînjîri-Mûrungu akî beetîkîrîîtue kûrîa.

¹⁴Muntû wonthe ûtî wa nchiarwa cia athînjîri-Mûrungu akëeja kûrîa kîgongwana atîkûmenya no mwanka arîee mûthînjîri-Mûrungu kîgongwana kîu arîte na oongeere ichunchî biîrî kîrî îkûmi bia kîgongwana kîu arîte.

¹⁵Athînjîri-Mûrungu batîbuîrîte gwîkîra igongwana birîa antû ba Israeli banditagîra mûgiro.

¹⁶Nîkwîthîrwa bakëeja kûrekeeria muntû ûtî wa nchiarwa cia athînjîri-Mûrungu akarîa kîgongwana, ûntû bûu bûgatûma muntû ta ûu eeyia na akanûkua. Ni nî ni MWATHANI ûrîa ûbatheragia.”

¹⁷Ningî MWATHANI nî aarîîrie Musa aramwîra atîrî,

¹⁸“Arîria Aaroni, na ataana baawe, na antû bonthe ba Israeli, ûbeere Waatho bûbû nîbu bûbuîrîte kûthingatwa muntû akîrita kîgongwana: Muntû Mûisraeli kana mûgeni ûrîa ûgatûûraga Israeli akëeja kûrîta kîgongwana gîa gwakîîria kîethîrwa kîrî gîa kûûjûria mûciîtio kana kîgongwana gîa gûciendera.

¹⁹Kîgongwana kîbuîrîte kwîthîrwa kîrî nyomoo îtî na antû athûûku no amwe nîkenda gîtîkîîrua. Nyomoo îîu îthîrwe îrî ndeegwa kana ntûrûme, kana nthenge.

²⁰ Bûtîbuîrîte kûrita nyomoo îrî na antû athûûku noo amwe nîkenda yûmba gwîtîkîîrua.

²¹Ningî rîrîa bûkûnditîra kîgongwana gîa gûcwaa thîîrî kana gîa kûûjûria mûciîtio kana gîa gûciendera, bûbuîrîte kûritaga nyomoo îtî na antû athûûku noo amwe nîkenda îtîkîîrua.

²²Bûtîbuîrîte kûnditagîra nyomoo yûrîte meetho, kana îkûthua, kana îrî na rworo, kana îrî na kîronda kana îrî na mware. Nyomoo ta îîu îtîbuîri kûreetwa kîritîroone kîa igongwana nditîrwa yo îrî kîgongwana gîa gwakîîria.

²³Ndeegwa kana ntûrûme îrî na kûgûrû gûgûkuî nkûrûki ya jangî no îritwe îrî kîgongwana gîa gûciendera, îndî îtîbuîrîte kûritwa îrî kîgongwana gîa kûûjûria mûciîtio.

²⁴Ntîbuîrîte kûritagîrwa kîgongwana kîa nyomoo îkabi, kana yaakûri.

²⁵Bûtîbuîrîte kûnditagîra kîgongwana kîa nyomoo îrîa bûgûrîte kuuma kîrî antû ageni batî Aisraeli. Nyomoo ta îuu îrî na mûgiro na nîo ûmwe na nyomoo ikabi.”

²⁶Ningî MWATHANI nî aarîîrie Musa aramwîra atîrî,

²⁷“Kareegwa kana gatûrûme kana kathenge gaaciarwa, gatîbuîrîte kwathûranagwa na ng'ina mwanka kathirie ntukû mûgwanja. Îndî kuuma ntukû ya inyaanya, no nditîrwe ko karî kîgongwana gîa gwakîîria.

²⁸Ningî bûtîbuîrîte kûthînjanagîria ng'ombe na njaû yaayo, kana ng'ondu na kang'ondu kaayo, kana mbûri na kabûri kaayo, ntukû îmwe.

²⁹Rîrîa bûkûnditîra kîgongwana kîa gûcokia nkaatho, no mwanka bûkîritage ûrîa kwagîrîte nîkenda gîîtîkîîrîka.

³⁰No mwanka igongwana birîîjagwe ntukû îrîa biriti yongwa, na bûtîbuîrîte gûkinya rûûnene rûkîîrî. Ni nî ni MWATHANI.

³¹“Tontû bûû, menyagîîreeni maathana jaakwa na bûjoojûragie. Ni nî ni MWATHANI.

³²Ningî bûtîbuîrîte gwîkîra riîtwa rîaakwa rîrîtheru îgi. Îndî mbuîrîte gûkumagua nî antû ba Israeli bakauga ndî ûmûtheru. Ni nî ni MWATHANI ûrîa ûbûtheretie.

³³Ningî nî ni ndaabûritîre nthîgûrûûne ya Misri nîkenda mbîthagîrwa ndî Mûrungu weenu. Ni nî ni MWATHANI.”