Read KIMERU BIBLE PROTESTANT EDITION Ala 23 Bible Online

Ala 23 - KIMERU BIBLE PROTESTANT EDITION bible

Ala 23

¹MWATHANI nî aarîîrie Musa aramwîra atîrî,

²“Arîria antû ba Israeli ûbeere ûjû: Biatho bibi nîbio bituui nîkenda bûbikûngwaagîra rîrîa bûkûnthaathayia bûûthûranîte.

³ Ritageeni ngûgî ntukû ithanthatû, îndî ntukû ya mûgwanja nî sabatû, ntukû îrîa antû babuîrîte kûnogoka. Ntukû îîu babuîrîte kûûthûranaga bakanthaathayia, na batîbuîrîte kûrita ngûgî. Ntukû îîu îkethagîrwa îrî sabatû yaakwa gûntû kunthe kûrîa bûtûûraga.

⁴Bibi nî bio biatho birîa ntuîte, birîa bûkanthaathayia bwothûrana, magiita jarîa nkabwîrîra.

⁵ “Mambura ja Pasaka ya MWATHANI jakambagîîria ûgoro bwa ntukû ya îkûmi na inya ya mweri jwa Nisani.[3]

⁶ Nayo ntukû ya îkûmi na ithaano ya mweri o jûu, nîrîo mambura jaakwa ja mîgaate îtiimbithîtue jakambagîîria. Najo jagakûngwagîrwa ntukû mûgwanja.

⁷Ntukû ya mbere ya mambura jau bûgaatigaanaga na ngûgî irîa bûritaga bûûthûranage bûkanthaathayia.

⁸Ntukû ithanthatû nditagîreeni kîgongwana gîa gwakîîria o ntukû o ntukû. Îndî bûtigage ngûgî irîa bûritaga ntukû ya mûgwanja, bûûthûranage bûnthaathagie.”

⁹Ningî MWATHANI nî aarîîrie Musa aramwîra atîrî,

¹⁰“Arîria antû ba Israeli ûbeere ûjû: Bwakinya nthîgûrû îrîa nkûbwaa, na bwambîrîria gûketha maketha ja miuunda yeenu ku, bwikagie imaanja bia mbere bia nkano cieenu kîrî mûthînjîri-Mûrungu.

¹¹Mûthînjîri-Mûrungu akaajûkia imaanja biu rûûneene rwa sabatû abiûkîîrie anditîre bio birî igongwana bia gûkîîria. Rîu igongwana biu bigeetîkîîrua nîûntû bweenu.

¹²O ntukû îîu bûkaaritaga imaanja bia nkano birî kîgongwana kîa gûûkîîria, nîrîo bûkaanditagîra gatûrûme ka mwaka jûmwe, karî kîgongwana gîa gwakîîria. Gatûrûme kau keethîrwe gatî na antû athûûku noo amwe.

¹³Ningî bûritage mûtu jwa kilo ijîîrî juungeenue na maguta ja nzeituni birî kîgongwana kîa irio. Yeera rîa kîgongwana kîu rîkeethîrwa rîrî rîrîega narîo rîngwîrie. Bûcoke bûrite lita îmwe ya ndibei îrî kîgongwana kîa gwîtûûrîria.

¹⁴Bwaketha maketha bûtîbuîrîte kûruga nkano, kana gwakia nkano, kana kûrîa nkano irî imbîthî, mbere bûtîranditîra kîgongwana kîa irio. Bûu nî Waatho bwa kûthingatagwa mwanka kenya, nthukîîne cieenu cionthe, gûntû kunthe kûrîa bûgaatûûraga.

¹⁵ “Nyuma ya kûrita kîgongwana gîa gûûkîîria, tarageeni biumia mûgwanja mwanka rûûneene rwa sabatû îîu îgûkinyia biuma mûgwanja.

¹⁶Rûûneene rwa sabatû îîu îkûûjûria biumia mûgwanja, nîrîo bûkaanditagîra kîgongwana kîa irio kîa maketha jarîa jakethi o rîo.

¹⁷Nditagîreeni mîgaate îîrîa kuuma nja cieenu irî kîgongwana gîa gûûkîîria. Mîgaate îîu îîthagîrwe îkandi na mûtu jûmwinyu jwa kilo ijîîrî juungeenue na mûtheega jwa kwimbithia. Kîgongwana kîu kîîthîrwe kîrî kîa maketha jeenu ja mbere.

¹⁸Amwe na mîgaate îîu, bûcoke bûnditîre tûtûrûme mûgwanja twa mwaka jûmwe, na kareegwa kamwe, na ntûrûme ijîîrî, birî kîgongwana kîa gwakîîria. Nyomoo iu ciîthîrwe itî na antû athûûku. Ningî bûnditîre kîgongwana kîa irio na gîa gwîtûûrîria. Yeera rîa igongwana biu rîkeethîrwa rîrî rîrîega naani nkaagwîrua nîrîo.

¹⁹Ningî bûritage nthenge îmwe ya kîgongwana gîa kûthiria meeyia na bûrite tûtûrûme twîrî twa mwaka jûmwe, twa kîgongwana gîa gûcwaa thîîrî.

²⁰Mûthînjîri-Mûrungu akaanditîra tûtûrûme tûu tu-twîrî tûrî kîgongwana gîa gûûkîîria. Acoke anditîre mîgaate ya maketha ja mbere. Igongwana biu nditîri nî bibitheru na nî kîewa kîa athînjîri-Mûrungu.

²¹O ntukû îîu yongwa bûtige kûrita ngûgî, bûûthûrane nîkenda bûnthaathayia. Bûu nî Waatho bwa kûthingatagwa mwanka kenya, nthukîîne cieenu cionthe, o kûrîa kunthe bûgaatûûraga.

²² Rîrîa bûgakethaga maketha ja miuunda yeenu bûgáakethaga bûkinyagia mîthia. Ningî bûgaacokageni kûringa rûûa kûrîa bûketheete. Bûtigaragîrie nkîa na ageni matigari jarîa jatîkethi. Ni nî ni MWATHANI Mûrungu weenu.”

²³MWATHANI nî aarîîrie Musa aramwîra atîrî,

²⁴“Arîria antû ba Israeli ûbeere ûjû: Ntukû ya mbere ya mweri jwa mûgwanja yakinya, tarumbeta nî îringagwe antû bakoothûrana nîkenda banogoka bakînthaathayia.

²⁵Ntukû îîu bûkáaritaga ngûgî indito, ningî bûnditagîre kîgongwana gîa gwakîîria.”

²⁶ Ningî MWATHANI nî aarîîrie Musa aramwîra atîrî,

²⁷“Ntukû ya îkûmi ya mweri o jûu jwa mûgwanja nîyo ntukû ya kûthirîrua meeyia. Ntukû îîu bûûthûranage amwe nîkenda bûnthaathayia na muntû akáarîîjaga no mbi. Ningî bûnditagîre kîgongwana gîa gwakîîria.

²⁸Ntukû îîu bûkáaritaga ngûgî noo îrîkû nîûntû nî ntukû ya kûthirîrua meeyia. Ntukû îîu nîyo nkabûthirîria meeyia jeenu.

²⁹Muntû wonthe ûrîa ûkarûma kana akunda gîntû ntukû îîu atîtaragwa arî ûmwe wa antû baakwa.

³⁰Ningî muntû ûrîa wonthe ûkaaritaga ngûgî ntukû îîu; nkamûûraga aume kîrî antû baakwa.

³¹Bûtîbuîrîte kûritaga ngûgî noo îrîkû, bûbû nî Waatho bûbuîrîte kûthingatagwa nthukîîne cionthe na gûntû kunthe.

³²Nogokageeni kuuma ûgoro bwa ntukû ya kenda mwanka ûgoro bwa ntukû ya îkûmi. Ntukû îîu bûkaaria kana bûnyua noo mbi nîûntû nî ntukû ya sabatû.”

³³ Ningî MWATHANI nî aarîîrie Musa aramwîra atîrî,

³⁴“Arîria antû ba Israeli ûbeere ûjû: Ntukû ya îkûmi na ithaano ya mweri o jûu jwa mûgwanja nîyo ntukû îrîa mambura ja tûgaanda jakambagîîria, najo jageetaga na mbere ntukû mûgwanja.

³⁵Ntukû ya mbere bûûthûranage nîkenda bûnthaathayia. Ntukû îîu bûkaritaga ngûgî noo îrîkû.

³⁶Bûnditagîre igongwana bia gwakîîria o ntukû o ntukû; ntukû iu mûgwanja. Ntukû ya inyaanya bûûthûranage nîkenda bûnthaathayia na bûnditagîra kîgongwana gîa gwakîîria. Ntukû îîu bûtîbuîrîte kûritaga ngûgî noo îrîkû.

³⁷“Jaja nîjo mambura jarîa bûbuîrîte kûûthûranaga amwe nîkenda bûnthaathayia na bûnditagîra igongwana bia gwakîîria. Igongwana bia irio na igongwana bia gwîtûûrîria. O kîgongwana kîritagwe ntukû îrîa îbuîrîte.

³⁸Mambura jau jongeeri kîrî mambura ja sabatû jarîa bûthithagia o kiumia o kiumia. Igongwana bia kûûjûria mîciîtio na igongwana bia gûciendera biongeeri kîrî birîa bûnditagîra bia wîthîre.

³⁹“Ntukû ya îkûmi na ithaano ya mweri jwa mûgwanja, rîrîa bûkeethîrwa bûgûketha irio kuuma miuundeene eenu, nîrîo bûkaambîrîria gûkûngûagîra mambura ja tûgaanda. Mambura jau jakathiragia ntukû mûgwanja. Ntukû ya mbere na ntukû ya inyaanya nî ntukû cia kûnogokaga.

⁴⁰Ntukû ya mbere ya mambura jau, bûtemage mpang'i cia mîtî ya matuunda jarîa mathongi na mpang'i cia mîkîndû na cia tûmîtî twa mûuro. Bûjûkie mpang'i iu bûnkûngûagîre ni MWATHANI, îgiita rîa ntukû mûgwanja.

⁴¹Kûngûagîreeni mambura jau ja tûgaanda ntukû mûgwanja o mwaka o mwaka. Bûu nîbu Waatho bûrîa bûkaathingatwa nthukîîne cionthe na gûntû kunthe.

⁴²Ntukû iu mûgwanja, antû bonthe ba Israeli bagaakaraga tûgaandeene twaao,

⁴³nîkenda nchiarwa cieenu ikaamenyaga atî nî ndaatûmîre bûkara tûgaandeene rîrîa ndaabûritîre Misri. Ni nî ni MWATHANI Mûrungu weenu.”

⁴⁴Tontû bûû, Musa nî aamenyithîrie antû ba Israeli magiita jarîa jatuui ja mambura ja gûkumia MWATHANI.