Read KIMERU BIBLE PROTESTANT EDITION Ala 24 Bible Online

Ala 24 - KIMERU BIBLE PROTESTANT EDITION bible

Ala 24

¹MWATHANI nî arîîrie Musa aramwîra atîrî,

²“Îîra antû ba Israeli bareetage maguta ja nzeituni jarîa makembûku buru, nîkenda taawa ikaraga ciakanîte magiita jonthe.

³Aaroni nî agwatagie taawa ûgoro yakanage mwanka rûkîîrî. Tawa îîu îîkagwe mbere yaakwa au îemeene rîa gûtirimanîra au oome ya gîtambaa kîa Îthandûkû rîa kîrîkanîro. Waatho bûu bûthingatagwe mwanka kenya nthukîîne cionthe.

⁴Aaroni nîwe ûkaagwatagia taawa na agaciîka itugîîne bia kûrîkîîra taawa bia thaabu birîa birî antû arîa atheru au mbere yaakwa.

⁵ “Ûjûkagie mûtu jûmwinyu ûkaruga mîgaate îkûmi na îîrî naju, o mûgaate jûtumagîre kilo îmwe ya mûtu.

⁶Ûmîbangage ndwari ijîîrî meetheene îîu ya thaabu întheru o rwari mîgaate îtantatû.

⁷Ningî kîrî o rwari wîkage ubaani nîkenda biritwa amwe na mîgaate birî kîgongwana gîa gwakîîria gîa kûriikanagwa au mbere yaakwa.

⁸Ntukû cionthe cia sabatû, Aaroni akaabangaga into biu ndeene ya antû arîa atheru au mbere yaakwa. Akathithagia ûu antûûne a antû ba Israeli. Kîu gîkaa kîrîkanîro gîa kenya na kenya.

⁹ Nayo mîgaate îîu îkethagîrwa îrî ya Aaroni na nchiarwa ciaawe. Nabo bakaamîrîîjagîra antû arîa atheru nîûntû kîrî bo kîu nî gîchunchî kîrîa kîtheru mono bagaîri kîa igongwana bia gwakîîria birîa biritîri MWATHANI, birî bia athînjîri-Mûrungu.”

¹⁰Nî kwaarî na mûtaana ûmwe ûrîa waatetere na muntû ûngî kambîîne ya antû ba Israeli. Îthe wa mûtaana ûu aarî Mûmisri na ng'ina aarî Mûisraeli.

¹¹Ng'ina wa mûtaana ûu eetagwa Shelomithi, mwarî wa Dibiri wa kuuma mwîrîgeene jwa Ndani. Mûtaana ûu nî aarumîre Mûrungu araikua kîrî Musa.

¹²Muntû ûu araingîrwa. Bareeteera nîkenda bamenya ûrîa MWATHANI akamûthithîria.

¹³Rîu MWATHANI araaria na Musa aramwîra atîrî,

¹⁴“Umagaria muntû ûu ûndumîte oome ya kambî. Muntû wonthe ûrîa waigîrue akînduma arîkîîre njara yaawe kîongo kîa muntû ûu kwonania arî na maatia. Rîu kîûthûrano kionthe kîa antû ba Israeli bamûûrage na maiga.

¹⁵Ningî wîîre antû ba Israeli ûjû: Muntû kinya ûrîkû ûrîa ûkaanduumaga agakanûkagua nîûntû bwa meeyia jaawe o ûu.

¹⁶Muntû wonthe ûrîa ûkaandumaga no mwanka ooragagwe na maiga nî kîûthûrano kionthe kîa antû ba Israeli.

¹⁷ Muntû akëeja kûûraga muntû ûngî, no mwanka ooragwe.

¹⁸Muntû akëeja kûûraga nyomoo ya ndîîthia ya muntû ûngî, no mwanka arîee na nyomoo. Nyomoo îrîwe na îngî.

¹⁹Muntû akëeja gwîkîra muntû ûngî rworo, athithagîrue o ta ûrîa athithanîrîtie.

²⁰ Muntû akëeja gwîkîra muntû ûngî rûgûma, no mwanka kinya we eekîrwe rûgûma. Aatûra riitho rîa muntû ûngî, no mwanka rîaawe rîtûrwe. Aakûûra îîgo rîa muntû ûngî, no mwanka rîaawe rîkûûrwe. Ûntû bunthe bûbûthûûku bûrîa muntû akaathithîria muntû ûngî no mwanka athithîrue o û.

²¹Muntû akëeja kûûraga nyomoo ya ndîîthia, amîrîage na îngî ta yo, îndî muntû akëeja kûûraga muntû ûngî no mwanka kinya we ooragwe.

²² Waatho bûu bûthingatagwe nî Aisraeli na ageni barîa batûûranagîra naabuî. Nîkwîthîrwa ni nî ni MWATHANI Mûrungu weenu.”

²³Musa nî eerîre antû ba Israeli mantû jau. Nabo baraumagaria muntû ûu waarumîte Mûrungu oome ya kambî, baramûûraga na maiga. Antû ba Israeli barathithia o ûrîa MWATHANI eerîte Musa.