Read KIMERU BIBLE PROTESTANT EDITION Ala 25 Bible Online

Ala 25 - KIMERU BIBLE PROTESTANT EDITION bible

Ala 25

¹ MWATHANI nî aarîîrie Musa kîrîmeene gîa Sinai aramwîra atîrî,

²“Arîria antû ba Israeli ûbeere ûjû: Bwakinya nthîgûrûûne îrîa nkûbwaa no mwanka bûtigage kûrîma miuunda yeenu mwaka jûmwe kîrî mîaka mûgwanja nîkenda înogoka.

³Aandageni miuunda yeenu na bûgacaaga mîzabibû yeenu na bûkoothûranagia maketha jaayo mîaka îtantatû.

⁴Îndî mwaka jwa mûgwanja nî îgiita rîa miuunda kûnogoka buru nîûntû bwa gûnkumithia ni MWATHANI. Bûkáandaga miuunda yeenu kana bûcaaga mîzabibû yeenu.

⁵Bûgáakethageni maciara ja miuunda yeenu jarîa jataandwa; ningî bûkoothûranagia nzabibû irîa igaakûragîra mîzabibûûne yeenu îrîa îtîcai. Jûu jwîthagîrwe jûrî mwaka jûmwathûre nîûntû bwa miuunda kûnogoka.

⁶Kîrîa miuunda yeenu îgaaciaraga mwakeene jûu jwa kûnogoka, nîkîo bûkaarîîjaga; buî na nkombo cieenu cia arûme na cia aka, na ariti-ngûgî beenu ba mûchaara, na ageni barîa batûûranagîra naabuî.

⁷Ningî jau nîjo jakarîîjagwa nî ndîîthia cieenu, na nyomoo cia kîthaka irîa irî nthîgûrû yeenu. Maciara jau jonthe jakaumaga miuundeene îîu no jarîjagwe.

⁸“Tarageeni mîaka, nayo yathira mîaka mîrongo îna na kenda (49),

⁹ntukû ya îkûmi ya mweri jwa mûgwanja, mwakeene o jûu jwa mîrongo îna na kenda, bûtûmage muntû nthîgûrûûne kunthe, eete akîringaga tarumbeta. Ntukû îîu nîyo ntukû ya kûthirîrua meeyia.

¹⁰Mwaka jwa mîrongo îtaano jûtûmagîîrue jûrî mwaka jwa gûcokeria o muntû o muntû kîthaka kîaawe na nja yaawe, na o muntû gûcoka mwîrîgeene jwaawe. Mwaka jûu jwîthagîrwe jûrî jwa antû gûkûngûîra.

¹¹Mwakeene jûu jwa mîrongo îtaano, bûtîkaandage kana bûketha birîa bikûrîte na bwaabio kana bûûthûrania nzabibû irîa îkûrîrîte mîzabibûûne îtîcai.

¹²Tontû mwaka jûu nî jûmûtheru na bûkarîîjaga maciara ja miuunda yeenu o na këethîra îtaandwa.

¹³“Mwakeene jûu muntû wonthe ûrîa wagûrîte gîntû kuuma kîrî muntû ûngî, akamûcokagîria kîo.

¹⁴Rîrîa bûkendanagîria ithaka bieenu, bûkáanagia.

¹⁵Rîrîa bûkwendanîria kana bûkagûranîra ithaka, tarageeni bwega mîaka îrîa îtigeere nîkenda mwaka jwa gûcokanîria jûkinya.

¹⁶Mîaka îrîa îtigeere yeethîrwa îrî îmiingî, ûgûri bwîthîrwe bûrî bûbûnene; na yeethîrwa îrî îmînini, ûgûri bwîthîrwe bûrî bûbûnini, nîûntû kîrîa bûkwendanîria nî maketha ja irio jarîa mûgûri agaaketha.

¹⁷Muntû akaîîragia muntû ûrîa ûngî. Bûnkîrage nîkwîthîrwa ni nî ni MWATHANI Mûrungu weenu.”

¹⁸“Bwathîkagîre mawaatho jaakwa na bûthingatage mooritani jaakwa, bûjoojûragie nîkenda bûtûûra nthîgûrû îîu bûrî thîîria.

¹⁹Nthîgûrû îîu nayo îkaumaga irio bibingî, naabuî bûkabirîîjaga bûkang'ania, na bûgaatûûra bûrî kiindajî.

²⁰Îndî bwoomba kûûria atîrî, ‘Nîmbi tûkaarîjaga Mwakeene jwa mûgwanja këethîra tûtîaandaga kana tûketha?’

²¹Nkaabwînîkagîra kîtharimo gîaakwa Mwakeene jwa îtantatû jwîthagîrwe jûrî na maketha ta ja mîaka îthatû.

²²Mwaka jwa înaana nîrîo bûkaandaga. Îndî bûkaarîjaga birîa bwaketheete mwakeene jwa îtaantatû mwanka bikinyie mwaka jwa kenda rîrîa bûgaakethaga birîa bûkethagîrwa bwaandîte.

²³“Bûkéendagia ithaka buru nîûntû nthîgûrû nî yaakwa. Nîkwîthîrwa buî bûrî ageni bûgatûûraga nthîgûrûûne yaakwa.

²⁴Rîrîa muntû eendia kîthaka na akenda gûgîkûûra nyumeene, nî eetîkagîîrue gûgîkûûra.

²⁵“Ûmwe wa antû beenu akëeja kûthîîna mwanka akeendia gîchunchî kîmwe gîa kîthaka kîaawe, muntû wa ndûgû ciaao ûrîa ûmûkuîrîrîtie mono nî eetage agakûûra kîthaka kîrîa mûtaana wa ng'ina eendeetie.

²⁶Muntû akëethîrwa atî na muntû wa ndûgû ciaao wa gûgîkûûra, îndî nyumeene agatonga ûntû oomba gûkûûra,

²⁷atare mîaka îrîa îkûrûkîte kuuma rîrîa aakîenderie. Rîu arîee muntû ûrîa eenderetie îrîi rîringeene na mîaka îrîa îkeethîrwa îtigeere mwaka jwa gûcokanîria into jûkinya. Aathithia ûu kîthaka gîkaa kîaawe kaîrî.

²⁸Ningî muntû akaaga ûtonga bwa kûmûûmbithia gûkûûra kîthaka kîrîa eendeetie, kîthaka kîu gîgaakaraga kîrî kîa muntû ûrîa eenderetie mwanka mwaka jwa gûcokeria antû into biaao jûkinye. Mwaka jwa gûcokanîria jwakinya, rîu kîthaka kîu gîgacoka kwaa kîa muntû ûrîa wakîendeetie.

²⁹“Muntû akëeja kwendia nyomba yaawe îrî ntûûreene iirigîri nthingo, akethagîrwa arî na mwaka jûmwe nîkenda amîkûûra.

³⁰Îndî mwaka jwathira atîmîkûûrîte, nooka îkaa ya muntû ûrîa ûmîgûrîte buru. Yee kiigai kîaawe na gîa nchiarwa ciaawe na îtiuma kîrî we kinya mwaka jwa gûcokeria antû into biaao jwaakinya.

³¹Îndî nyomba irîa irî tûtûûreene tûtiirigîri na nthingo ikethagîrwa îrî ûmwe na kîthaka kîgûri, na no ikûûrwe îgiita rîonthe. Ningî no mwanka icokague kîrî mwene ûrîa waakîendeetie mwakeene jwa gûcokeria antû into biaao.

³²Îndî Alawi bakëethagîrwa bendeetie into biaao ntûûreene irîa bagaîri, bakethagîrwa barî na rûûtha rwa kûbikûûraga o rîonthe.

³³Îndî Mûlawi akëeja kûrega gûkûûra nyomba îrîa endetie, nyomba îîu îbuîrîte gûcokerua Mûlawi ûu mwaka jwa gûcokeria antû into biaao jwaakinya. Nîkwîthîrwa nyomba irîa irî ntûûreene îrîa Alawi bagaîri nî ciaao.

³⁴Ningî ithaka bitî mwene birîa bithiûrûkîrîte ntûûra cia Alawi bitîbuîrîte kwendua. Ithaka biu nî kiigai kîaao kenya na kenya.”

³⁵ Muntû ûrîa bûtûûranagîra nawe akëeja kwîthîrwa atîgûciûmba, no mwanka ûmûteethagie. Ûmûteethagie o ta ûrîa ûthithagîria ageni barîa bagûtûûra amwe naagwe.

³⁶Ûkáajûkagia maciara ja mbeecha kuuma kîrî we kana ûmwîtia mpongeeri. Mbathîkagîreeni na bûkáarekeeria Aisraeli bangî bagatûûrania naabuî.

³⁷ Bwamûkoobithia mbeecha bûtîkaamwîtagie maciara jaacio, ningî bwamûrûmia irio bûtîkaamûrîagie nkûrûki.

³⁸Ni nî ni MWATHANI Mûrungu weenu, ûrîa ûbûritîte nthîgûrûûne ya Misri nîkenda mbîja kûbwaa nthîgûrû ya Kanaani, na nîkenda mbîthagîrwa ndî Mûrungu weenu.

³⁹ Mûisraeli mûtûûri waaku akëeja kûthîîna mwanka agaciendia kîrî gwe, ûkáamûritithia ngûgî ta nkombo.

⁴⁰Ûkaranie nawe akari ta mûriti wa ngûgî wa mûchaara kana ta mûgeni ûgûtûûra gwaaku. Nawe agaakûritîra ngûgî mwanka mwaka jwa gûcokeria antû into jûkinye.

⁴¹Jwakinya, we amwe na aana baawe, bakauma gwaaku, bacoke mwîrîgeene jwaao na kiigaine kîa beethe.

⁴²Nîkwîthîrwa antû ba Israeli nî nthûûmba ciaakwa, irîa ndaaritîre nthîgûrû ya Misri. Tontû bûû, batîkeendague ta nkombo.

⁴³Bûtîkáabaathage bûkîbaiinyagîîria; nkîrageni ni Mûrungu weenu.

⁴⁴Bwenda nkombo cia aka kana cia arûme, no bûgûre nkombo iu kuuma kîrî antû ba mîgongo îngî îrîa îbûthiûrûkîrîte.

⁴⁵Ningî no bûgûre nkombo kuuma kîrî ageni barîa batûûranagîra naabuî. Kinya aana baao barîa baciarîri nthîgûrûûne yeenu, no baee nkombo cieenu.

⁴⁶Ningî no bûtigîre aana beenu nkombo ta iu irî kiigai kîaao gîa kenya. Bau no baeethue nkombo; îndî gûtî Mûisraeli ûbuîrîte kwatha ûngî akûmwinyagîîria.

⁴⁷“Mûisraeli akëeja kûthîîna agaciendia kîrî muntû ûtî Mûisraeli îndî arî gîtonga, kana agaciendia kîrî muntû wa ndûgû cia muntû;

⁴⁸kinya agûri o ûu no akûûrwe. No akûûrwe nî ûmwe wa ataana-ba-ng'ina,

⁴⁹kana îthe-mûkûrû kana îthe-mwanake, kana mwana wa îthe-mûkûrû kana îthe-mwanake, kana muntû ûngî ûrîa ûmûkuîrîîtie wa ndûgû ciaao. Ningî muntû ûu ûciendetie akëeja gûtonga no aikûûre wengwa.

⁵⁰Eete kîrî muntû ûrîa ûmûgûrîte, batare mîaka îrîa îthirîte kuuma rîrîa aacienderie kîrî we. Ningî boone nî mîaka îng'ana îtigeere mwaka jwa gûcokeria antû into biaao jûkinya. Îrîi rîa gûtûma arekeerua rîîthîrwe rîringeene na mîaka îrîa îtigeere, narîo rîrîa akarîte na muntû ûu ûmûgûrîte rîtarwe ta rîa mûriti wa ngûgî wa mûchaara.

⁵¹Mîaka îrîa îtigeere yeethîrwa îrî îmiingî, îrîi rîa gûkûûrwa rîîthîrwe rîringeene nayo.

⁵²Ningî mîaka îrîa îtigeere mwaka jwa gûcokeria antû into biaao jûkinya yeethîrwa îrî îmîkai, bataranîre na ûrîa ûmûgûrîte, arîe mbeecha inkai cia kûmûkûûra.

⁵³Muntû ûrîa ûmûgûrîte athithagîrie Mûisraeli ûu o ta ûrîa mûriti ngûgî athithagîrua. Muntû ûu atîbuîrîte kwiinyîîrua.

⁵⁴Îndî akëeja kwîthîrwa atîkûûrwa na njîra îmwe ya iu, nî abuîrîte kûrekeerua amwe na aana baawe rîrîa mwaka jwa gûcokeria antû into biaao jûgakinya.

⁵⁵Nîkwîthîrwa antû ba Israeli nî nthûûmba ciaakwa ciongwa irîa ndaaritîre nthîgûrûûne ya Misri. Ni nî ni MWATHANI Mûrungu weenu.”