Read KIMERU BIBLE PROTESTANT EDITION Ala 26 Bible Online

Ala 26 - KIMERU BIBLE PROTESTANT EDITION bible

Ala 26

¹ Ningî MWATHANI nî aaugîre atîrî, “Bûkáaithithîria mîrungu ya mîng'uanano kana bûrûngîka itugî kana bwaja maiga bûjathaathayia kûu nthîgûrûûne yeenu. Nîkwîthîrwa ni nî ni MWATHANI Mûrungu weenu.

²Menyagîîreeni ntukû ciaakwa cia sabatû na bwîkagîîre antû aakwa atheru arîa nthaathagîrua. Nîkwîthîrwa ni nî ni MWATHANI.

³ “Bwatûûra bûkîthingataga Waatho bwaakwa na bûkîathîkagîra maathana jaakwa,

⁴rîu nkaabuurithagîria ngai rîrîa rîagîrîte. Nayo miuunda yeenu ikaumaga irio bibingî, na mîtî îgaaciaraga matuunda.

⁵Mîmera yeenu îkaumaga irio bibingî na mîzabibû yeenu îgaaciaraga mono. Bûgakethaga nzabibû kinya îgiita rîa maanda na bwîthagîrwe bûrî na bia kûng'ana na bûrî kiindajî magiita jonthe.

⁶Nkaabweejaga thîîrî nthîgûrûûne yeenu, bûmamage bûtî na ûguaa. Nkaabûritîra nyamû irîa nthûûku, na gûtîîthagîrwa kûrî na ndwaa nthîgûrûûne yeenu.

⁷Bûkoombaga anthû beenu ndweene.

⁸Asikarî ba Israeli bataano bakoombaga asikarî ba anthû îgana, na Asikarî îgana ba Israeli bakoombaga asikarî anthû ngiri îkûmi ndweene.

⁹Nkaabûtharima ntûme bûthegee. Mbûjûrie kîrîkanîro gîaakwa kîrîa ndeekanîre naabuî.

¹⁰Bûkaarîîjaga birîa bûkethagîrwa bwîkîte bia maketha jeenu mwanka bûkeeja kûbieberia nîkenda maketha jangî joona gwa gwîkwa.

¹¹Ngaatûûranagia amwe naabuî na gûtî rîo nkabûthûûra.

¹² Ngeetanagia naabuî mbîthagîrwe ndî Mûrungu weenu, naabuî bûkeethîrwa bûrî antû baakwa.

¹³Ni nî ni MWATHANI Mûrungu weenu ûrîa ûbûritîte nthîgûrû ya Misri bûtiga kwaa nkombo ciaao. Nî ni ndagitaangîre ichooki birîa bwatheeki nabio ndatûma bwoona ûciathi.”

¹⁴Ningî MWATHANI nî aaugîre atîrî, “Bwarega kûmbigua na bwethîrwa bûtîathîkîra maathana jau jonthe;

¹⁵bwajûkia mawaatho jaakwa na rûûgo, na bwamena mooritani jaakwa, bwarega kwathîkîra maathana jaakwa jonthe na bwathûûkia kîrîkanîro gîaakwa kîrîa mbîkîte naabuî;

¹⁶ûjû nîu nkaabûthithîria: Nkabûkanûkîa, mbûreetere kîmako na mîrimo îrîa îthûûkagia meetho na îkoorûra mwîrî. Ningî ntûme ûtûûro bweenu bwage gîtûmi. Ningî îkethagîrwa îrî ngûgî ya ûtheri kwaanda mbeeû cieenu nîûntû anthû nîbo bakaarîîjaga birîa bwaandîte.

¹⁷Nkabuutatîra bûûmbwe nî anthû beenu ndweene. Ningî bwathwe nî barîa babûthwîre bûtue kûmatûkaga kinya gûtî gîntû kîîngeene naabuî.

¹⁸Bûkëeja gwîta na mbere kûrega kûmbigua kinya nyuma ya ûu, ni nkaabûkanûkia mainda mûgwanja nkûrûki nîûntû bwa meeyia jeenu.

¹⁹Nkaathiria rwikumio rweenu inya, ntûme îgûrû rîûme ta chuuma kwage ngai, nayo nthîgûrû yeenu yûmagare ta îturutia.

²⁰Nacio ngûgî cieenu irîa bûkaaritaga ikaa cia ûtheri. Nîkwîthîrwa miuunda îtiuma noo mbi na mîtî îtîciara matuunda.

²¹Ningî bweta na mbere kwaa ndemi na bwarega kûmbathîkîra, naani nkaabûreetera moothûûku mainda mûgwanja nkûrûki, kûringana na ûrîa meeyia jeenu jang'ana.

²²Ningî nkaarekeeria nyamû inthûûku ciîje kîrî buî, ibûrîîre twaana tweenu, na ciûrage nyomoo cieenu cia ndîîthia. Naabuî bûgatigara antû babakai mwanka njîra cieenu ciage antû ba gwîtîîra ku.

²³“Ningî nyuma ya îkanûkia rîu, bwarega gûncokeera, bweta na mbere kûrega kûmbathîkîra,

²⁴rîu kinya ni nkaabûkanûkia. Mbûûre mpûûrwa ya katheti na nyanje nîûntû bwa meeyia jeenu.

²⁵Ngaatûma bûûmbwe ndweene nîûntû bwa kûthûûkia kîrîkanîro. Kinya bwothûrana ntûûreene cieenu, nkaabûtûmîra mîrimo îmîthûûku ku mwanka bûûmbwe nî anthû beenu.

²⁶Ngaatûma biakûrîa bieenu binyiie ûrîa aka îkûmi bakarugagîra mîgaate riiko rîmwe, ningî bakabûgaîra na kîthimi. Bûmîrîîjage îndî bûtînyire.

²⁷Bwethîrwa bûtîmbigua kinya nyuma ya ûu, bûmbathîkîra,

²⁸ningî bweeta na mbere kwaa ndemi na bwarega kûmbathîkîra, naani nkaabûreetera moothûûku mainda mûgwanja nkûrûki kûringana na ûrîa meeyia jeenu jang'ana.

²⁹Bûkethagîrwa bûrî na mpara înene mwanka bwambîîrie kûrîa twaana tweenu.

³⁰Nkaathûûkangia irombero bieenu birîa birî tûrîmeene, na momorange iritîro bieenu bia igongwana bia kwîîthîria ubaani. Ningî ncoke ndûndanîîre biimba bieenu îgûrû rîa mîrungu ya mîng'uanano yeenu, ningî mbûmene buru.

³¹Nkaathiria ntûûra cieenu ciee maganjo, na momorange irombero bieenu. Ningî mbage bata ya mînyinko ya igongwana bieenu.

³²Nkaathûûkangia nthîgûrû yeenu buru mwanka kinya anthû beenu barîa bakeeja gûtûûra ku barigare nî ûrîa îkeethîrwa îkari.

³³Nkaabûreetera ndwaa na ntûme bûnyaganue nthîgûrûûne ingî, nayo nthîgûrû yeenu îtigwe îtî gîntû na ntûûra cieenu itigwe irî maganjo.

³⁴“Nayo nthîgûrû yeenu îkagwîrîrua mîaka ya kûnogoka rîrîa bûkeethîrwa bûrî nthîgûrû cia anthû beenu. Rîu nthîgûrû yeenu îkaanogoka o ta ûrîa îrîngî nogoka mwaka jwa mûgwanja rîrîa bwaarî ku.

³⁵Rîrîa nthîgûrû yeenu îgaakara îîrûkîri, nîrîo îkoomba kûnogoka ûrîa îtîngîûmba kûnogoka mîaka îrîa yathûri ya kûnogoka rîrîa bwatûûraga ku.

³⁶Nabo antû beenu barîa bagaatigara barî mwoyo, nkaabeekîra ûguaa bwa nkoro barî nthîgûrû cia anthû baao. Bakaigagua îbûûra rîkiurutwa nî ruuo bakaumbuthûka, bakamatûka ta antû beengani nabo ndweene mwanka bakagwa batîîngi nî gîntû.

³⁷Bûkaagiitaranagia bwingwa ta antû bamatûkîte bakiithara ndweene, o na këethîra bûtîîngi nî muntû. Ningî bûtîûmagîîria inya ya anthû bwirwîîra.

³⁸Bûgaakua bûrî nthîgûrûûne cia anthû beenu. Bûthirîre nthîgûrûûne iu buru.

³⁹Barîa beenu bagaatigara barî mwoyo bakaarîa thîîna bainye barî nthîgûrûûne cia anthû. Barie thîîna nîûntû bwa meeyia jaao bongwa na nîûntû bwa meeyia ja biûjûjû biaao.

⁴⁰“Îndî bûkëeja kwirira meeyia jeenu na meeyia ja biûjûjû bieenu jarîa baathithîrie nîntû bwa kûrega kûmbathîkîra

⁴¹baratûma kinya ni mbautatîra na mbanyagania nthîgûrûûne cia anthû baao; bûkëeja gûtiga kûrema na bakainyiiyia na bageetîkîra kûgarûka bagatiga kwîyia,

⁴² rîu nkaaririkana kîrîkanîro gîaakwa na Jakubu, na Isaaka, na Abrahamu, na nkaririkana nthîgûrû yeenu.

⁴³Îndî no mwanka bwaambe bwîrûkîre nthîgûrû yeenu îtigwe înogoke bûtî ku. Naabuî no mwanka bûgarûke bûtige kwîyia nîûntû bwa kwamba kûregana na mooritani jaakwa na kûmena Waatho bwaakwa.

⁴⁴Îndî kûnarî gûkari ûu, rîrîa bûkeethîrwa bûrî nthîgûrû cia anthû beenu, ntîbûtiganîîria kana mbûthiria buru. Ntîtharia kîrîkanîro gîaakwa naabuî, nîûntû ni ndî MWATHANI Mûrungu weenu.

⁴⁵Tontû bwa kûbwigîîrua kîaao, nkaaririkana kîrîkanîro gîaakwa na biûjûjû bieenu birîa ndaaritîre nthîgûrûûne ya Misri antû ba mîgongo îngî bakîonaga, nîkenda mbîthagîrwa ndî Mûrungu na MWATHANI weenu.”

⁴⁶Jau nîjo mawaatho na mooritani na maathana jarîa MWATHANI eerîre Musa eere antû ba Israeli rîrîa baarî kîrîmeene gîa Sinai agîtumagîra Musa.