Read KIMERU BIBLE PROTESTANT EDITION Ala 3 Bible Online

Ala 3 - KIMERU BIBLE PROTESTANT EDITION bible

Ala 3

¹Ningî MWATHANI nî eetîre na mbere kwîra Musa atîrî, “Rîrîa muntû akaaritaga kîgongwana kîa gûcwaa thîîrî naani, nî aritage ng'ombe kana ndeegwa îtî na antû athûûku noo amwe.

²Muntû ûu, akaarîkîîra njara yaawe mûtwe jwa nyomoo îîu, acoke amîûragîre mwariine jwa îema rîa gûtirimanîra. Nabo athînjîri-Mûrungu bakaajûkia tharike bamîmiinye nteere cio-inya cia kîritîro kîa igongwana.

³Muntû ûu anditîre kîgongwana gîa gûcwaa thîîrî gîa gwakîîria. Aakîîrie maguta jonthe ja kîu.

⁴Arite mpigo cio-ijîîrî amwe na maguta jaacio na arite gachunchî karîa keega buru ga îtema.

⁵Nabo athînjîri-Mûrungu bagaakîîria into biu bionthe amwe na kîgongwana gîa gwakîîria, au kîritîroone kîa igongwana nabio biîthîrwe birî na yeera rîrîega kîrî ni.

⁶“Rîrîa muntû akaanditagîra kîgongwana gîa gûcwaa thîîrî naani, nî aritage mbûri kana nthenge, kana aritage ng'ondu kana ntûrûme. Nyomoo iu no mwanka ciîthîrwe itî na antû athûûku.

⁷Kîgongwana kîrîa akûnditîra kîëethîrwa nî gîa kang'ondu, nî arite andeetere.

⁸Muntû ûu, arîîkîîre njara yaawe, mûtwe jwaako, acoke akooragîre au mwariine jwa îema rîa gûtirimanîra. Nabo athînjîri-Mûrungu bajûkie tharike bamîmiinye nteere cio-inya cia kîritîro kîa igongwana.

⁹Kuuma kîrî nyomoo îîu ya kîgongwana gîa gûcwaa thîîrî naani, muntû akaaritaga kîgongwana gîa gwakîîria. Aakîîrie maguta jaayo jonthe na aritage kînyanya kîonthe kîgiitîîri nkanakaneene, na maguta jaakîo jonthe na maguta jonthe jarîa jagwateene na into bia kîu,

¹⁰na arite mpigo cio-ijîîrî amwe na maguta jaacio, na arite gachunchî karîa keega buru ka îtema.

¹¹Mûthînjîri-Mûrungu akaanditîra into biu birî kîgongwana kîa irio na abiakîîrie au kîritîroone kîa igongwana.

¹²“Muntû akëethîrwa nî kîgongwana kîa mbûri akwenda kûnditîra nî arite andeetere.

¹³Nî arîîkîîre njara yaawe mûtwe jwaayo, acoke amîûragîre au mbere ya îema rîa gûtirimanîra. Nabo athînjîri-Mûrungu bajûkie tharike bamîmiinye nteere cio-inya cia kîritîro kîa igongwana.

¹⁴Kuuma kîrî nyomoo îîu, muntû akanditagîra kîgongwana gîa gwakîîria. Anditagîre maguta jaayo jonthe,

¹⁵na mpigo cio-ijîîrî amwe na maguta jaacio, na arite gachunchî karîa keega buru ka îtema.

¹⁶Mûthînjîri-Mûrungu akaanditîra into biu birî kîgongwana kîa irio na abiakîîrie au kîritîroone kîa igongwana, nabio biikeethîrwa birî na yeera rîrîega kîrî ni. Maguta jonthe nî jaakwa.

¹⁷Tontû bûû, gûtî Mûisraeli ûbuîrîte kûrîa maguta kana anyua tharike. Bûu nî waatho bûbuîrîte kûthingatagwa nthukîîne cionthe na gûntû kunthe.”