Read KIMERU BIBLE PROTESTANT EDITION Ala 4 Bible Online

Ala 4 - KIMERU BIBLE PROTESTANT EDITION bible

Ala 4

¹MWATHANI nî aarîîrie Musa aramwîra atîrî,

²“Arîria antû ba Israeli ûbeere ûrîa bakaathithagia rîrîa muntû eeyia atîkwenda.

³“Mûthînjîri-Mûrungu ûrîa mûnene akëethîrwa eeîîtie na agatûma kîrîndî gîaatia, nî abuîrîte kûnditîra kîgongwana nîûntû bwa meeyia jarîa athithîtie. Kîgongwana kîu gîkeethîrwa kîrî gîa kareegwa gatî na antû athûûku noo amwe.

⁴Mûthînjîri-Mûrungu ûu mûnene akaareeta kareegwa kau mwariine jwa îema rîa gûtirimanîra. Akarîîkîîre njara mûtwe jwaako rîu akooragîre au mbere yaakwa.

⁵Ningî mûthînjîri-Mûrungu ûu mûnene akaajûkia tharike îmwe atonye nayo îemeene rîa gûtirimanîra.

⁶Acoke atoombeke kîara tharikeene îîu, amîmiinye tharike îmwe mainda mûgwanja îthandûkûûne rîa kîrîkanîro, au mbere ya gîtambaa kîrîa gîcuurîîtue antû arîa atheru.

⁷Ningî ajûkie tharike îmwe amîake kooneene cio-inya cia kîritîro kîa igongwana bia ubaani kîrîa kîrî îemeene rîa gûtirimanîra. Acoke ajûkie tharike îngî îrîa îtigeere amîtûûrîrie au nthîgûrû kîritîroone kîa igongwana bia gwakîîria, kîrîa kîrî akuî na mwari jwa îema rîa gûtirimanîra.

⁸Ningî akaajûkia maguta jonthe ja kareegwa karîa ga kîgongwana kîa kûthiria meeyia: maguta jonthe jarîa jagwateene na into bia kîu,

⁹mpigo cio-ijîîrî amwe na maguta jaacio, na gachunchî karîa keega buru ga îtema.

¹⁰Mûthînjîri-Mûrungu akaajûkia maguta jau ajaakîîrie au kîritîroone kîa igongwana bia gwakîîria. Ajarite o ta ûrîa maguta ja kîgongwana kîa thîîrî jaritagwa.

¹¹Îndî akaajûkia mûgûûta jwa kareegwa kau, na nyama cionthe, na mûtwe, na mathagiro, na into bia kîu, na mara.

¹²Nawe abikamate abiumagarie oome ya kambî, abiîke antû arîa atheretue nîûntû bwa igongwana, kûrîa mûju jwîtûûragwa. Au nîo into biu bikaîîthîîrua.

¹³“Kîûthûrano kionthe kîa antû ba Israeli gîkëeja kwîyia gîtîkûmenya; gîkathithia mantû jarîa MWATHANI akaanîtie, kinya kîëethîrwa kîthithîtie meeyia jau gîtîkûmenya, gîkeethîrwa kîatîîtie.

¹⁴Rîrîa antû ba Israeli bakamenya nî beeîîtie, bakaarita kareegwa karî kîgongwana gîa kûthiria meeyia. Nabo bagakareeta mwariine jwa îema rîa gûtirimanîra.

¹⁵Nabo atongeeria ba kîûthûrano kîa antû ba Israeli bagaakarîkîîra njara kooragîrwe au mbere yaakwa.

¹⁶Mûthînjîri-Mûrungu ûrîa mûnene akaajûkia tharike îmwe atonye nayo îemeene rîa gûtirimanîra.

¹⁷Mûthînjîri-Mûrungu agaatoombeka kîara tharikeene îîu amîmiinye mainda mûgwanja îthaandûkûûne rîa kîrîkanîro au mbere ya gîtambaa kîrîa gîacuurîîtue.

¹⁸Ningî akaajûkia tharike îmwe amîmiinye kooneene cio-inya cia kîritîro kîa igongwana bia ubaani kîrîa kîrî îemeene rîa gûtirimanîra.

¹⁹Akaarita maguta ja kareegwa kau jonthe ajaîîthîîrie kîritîroone kîa igongwana.

²⁰O ta ûrîa aathithîîrie kareegwa karîa ga kîgongwana gîa kûthiria meeyia nîu akaathithia na kareegwa kau. Nawe mûthînjîri-Mûrungu akabathirîria meeyia barekerwe.

²¹Nawe agaakamata nyama cia kareegwa kau aciumagarie. Nawe agaciakîîria o ta ûrîa aakîrîîrie kîgongwana gîa kûthiria meeyia jaawe wengwa. Kîu nîkîo kîgongwana gîa kûthiria meeyia ja antû bonthe.

²²“Mûtongeeria akëeja kwîyia atîkûmenya; akathithia mantû jarîa ûûni MWATHANI Mûrungu waawe akaanîtie, mûtongeeria ûu akeethîrwa arî na maatia.

²³Rîrîa akaamenyithua meeyia jarîa athithîtie, akaarita nthenge îrî kîgongwana. Nthenge îîu îîthîrwe îtî na antû athûûku noo amwe.

²⁴Nawe akaarîkîîra njara mûtwe jwa nthenge îîu, acoke amîûragîre rûteere rwa bwa ûrîo rwa kîritîro kîa igongwana arîa nyomoo cia igongwana bia gwakîîria ciûragagîrwa. Kîu nîkîo kîgongwana gîa kûthiria meeyia.

²⁵Nawe mûthînjîri-Mûrungu agatoombeka kîara tharikeene îîu amîake kooneene cio-inya cia kîritîro kîa igongwana bia gwakîîria. Ningî ajûkie tharike îrîa îgatigara amîîtûûrîrie nthîgûrû ya kîritîro kîa igongwana.

²⁶Nawe akaaîthîîria maguta jonthe ja nthenge îîu au kîritîroone kîa igongwana o ta ûrîa aaîîthîtie maguta ja kîgongwana gîa gûcwaa thîîrî na Mûrungu. Tontû bûû, mûthînjîri-Mûrungu akarita kîgongwana kîa kûthiria meeyia ja mûtongeeria ûu, nawe akarekerwa meeyia.

²⁷ “Ûmwe wa antû ba Israeli akëeja kwîyia atîkûmenya; akathithia mantû jarîa ûûni MWATHANI nkaanîtie, arî na maatia.

²⁸Rîrîa akaamenyithua meeyia jarîa athithîtie, akaarita mbûri îrî kîgongwana. Mbûri îîu îîthîrwe îtî na antû aathûûku noo amwe.

²⁹Nawe muntû ûu, akaarîkîîra njara mûtwe jwa mbûri îîu, acoke amîûragîre rûteere rwa bwa ûrîo bwa kîritîro kîa igongwana bia gwakîîria.

³⁰Nawe mûthînjîri-Mûrungu agaatombeka kîara tharikeene, aake tharike îmwe kooneene cio-inya cia kîritîro kîa igongwana bia gwakîîria. Acoke ajûkie tharike îrîa îtigeere amîîtûûrîrie nthîgûrû kîritîroone kîa igongwana.

³¹Ningî arite maguta jaayo jonthe o ta ûrîa jaritagwa kîrî kîgongwana kîa thîîrî. Rîu mûthînjîri-Mûrungu akaajaakîrîria kîritîroone kîa igongwana jarî kîgongwana kîrîa kîeeraga bwega kîrî ni. Tontû bûû, mûthînjîri-Mûrungu akathiria meeyia ja muntû ûu, na arekerwe meeyia.

³²“Muntû ûu, ûreetete kîgongwana gîa kûthiria meeyia, abuîrîte kûrita ng'ondu îtî na antû athûûku noo amwe.

³³Nawe akaamîrîkîîra njara mûtwe amîûragîre rûteere rwa bwa ûrîo bwa kîritîro kîa igongwana bia gwakîîria arîa biritagîrwa.

³⁴Nawe mûthînjîri-Mûrungu agaatombeka kîara tharikeene, aake tharike îmwe kooneene cio-inya cia kîritîro kîa igongwana bia gwakîîria. Acoke ajûkie tharike îrîa îtigeere amîîtûûrîrie nthîgûrû kîritîroone kîa igongwana.

³⁵Ningî arite maguta jaayo jonthe o ta ûrîa maguta ja kang'ondu ga kîgongwana gîa gûcwaa thîîrî jaritagwa. Nawe mûthînjîri-Mûrungu akaajaakîrîîria kîritîroone kîa igongwana, jarî kîgongwana gîa gwakîîria kîrî ni. Mûthînjîri-Mûrungu akathiria meeyia ja muntû ûu, na arekerwe meeyia.”