Read KIMERU BIBLE PROTESTANT EDITION Ala 5 Bible Online

Ala 5 - KIMERU BIBLE PROTESTANT EDITION bible

Ala 5

¹“Muntû akëeja gwîtwa îgambeene arita ûkûûjî bwa mantû jarîa aigîîtue kana oona, nawe akarega kûrita ûkûûjî bûu, muntû ûu agaakanûkua.

²Muntû akëeja kûringithia gîntû kîrî na mûgiro; kîeethîrwa nî kiimba kîa nyomoo, muntû ûu, akaagîa mûgiro na eethîrwe arî na maatia kinya këethîra aringithîtie atîkûmenya.

³Muntû akëeja kûringithia gîntû kîonthe gîtîtheri kiumîte mwîrî jwa muntû atîkûmenya, rîrîa akamenya akeethîrwa arî na maatia.

⁴Ningî muntû akëeja gûciîtia na kanyua kaawe kûthithia ûntû bûbûthûûku kana bûbwega atîambîte kûthûgaania bwega, o mûciîtio junthe jûrîa muntû oomba gûciîtia atîthûgaanîtie bwega, akëethîrwa atiijî nî ûthûûku, rîrîa akaamenya, akeethîrwa arî na maatia.

⁵Muntû akëethîrwa arî na mûgiro kuumania na bûmwe bwa mantû jau, no mwanka aumbûre meeyia jarîa athithîtie.

⁶Nawe akaaritîra MWATHANI kîgongwana gîa kûthiria maatia jaawe. Agaikia ng'ondu nka kana mbûri nka nîûntû bwa kîgongwana kîa kûthiria meeyia. Nawe mûthînjîri-Mûrungu akaarita kîgongwana nîkenda muntû ûu arekerwa meeyia.

⁷“Îndî muntû akëethîrwa atîûmba kwona ng'ondu kana mbûri, no aritîre MWATHANI kîgongwana kîa kûthiria maatia jaawe gîa nkûngûthikû ijîîrî kana biana biîrî bia ijîa, kîmwe kîrî kîgongwana kîa kûthiria meeyia na kîngî kîrî kîgongwana kîa gwakîîria.

⁸Nawe akaabiikia kîrî mûthînjîri-Mûrungu, nawe mûthînjîri-Mûrungu aambe arite nyoni îmwe îrî kîgongwana kîa kûthiria meeyia. Nawe akamîthiora nkingo îndî atîgiitanûra kîongo buru.

⁹Ningî akaminya tharike îmwe îînamanie na rûteere rwa kîritîro kîa igongwana. Nayo tharike îîu îngî amîîtûûre gîtina gîa kîritîro kîa igongwana. Kîu nî kîgongwana gîa kûthiria meeyia.

¹⁰Ningî agaacoka arite nyoni îîu îngî îrî kîgongwana gîa gwakîîria kûringana na ûrîa ûûni MWATHANI mbugîîte. Nawe mûthînjîri-Mûrungu akathiria meeyia ja muntû ûu, na arekerwe meeyia.

¹¹“Îndî muntû akëethîrwa atî na nkûngûthikû ijîîrî kana biana biîrî bia ijîa no arite kilo îmwe ya mûtu jûmwinyu buru jûrî kîgongwana gîa kûthiria meeyia. Îndî atîbuîrîte gwîkîra maguta kana ubaani mûtuune jûu nîûntû nî kîgongwana gîa kûthiria meeyia.

¹²Nawe akaajwîkia kîrî mûthînjîri-Mûrungu, nawe mûthînjîri-Mûrungu ajûrûme nkuundi îmwe îrî ngerekano amîakîîrie kîritîroone kia igongwana îgûrû rîa igongwana bia gwakîîria bia MWATHANI. Kîu nî kîgongwana kîa kûthiria meeyia.

¹³Nawe mûthînjîri-Mûrungu akamûrombera kweberua kwa meeyia jarîa athithîtie kîrî Mûrungu, jarîa akeethîrwa athithîtie kîrî jau jagweti, nawe akaarekerwa. Naju mûtu jûrîa jûgatigara jûkaa jwa mûthînjîri-Mûrungu o ta kîrî kîgongwana kîa irio.”

¹⁴MWATHANI nî aarîîrie Musa aramwîra atîrî,

¹⁵“Muntû akëeja kwîyia atîkûmenya nîûntû bwa kwîthîrwa atînenkanîrîte into birîa biathûrîri MWATHANI, akaaritîra MWATHANI kîgongwana gîa kûthiria maatia gîa ntûrûme îtî na antû aathûûku noo amwe nîûntû bwa gûtera kûrîa aterete. Nayo yaambe yoonwe këethîra nî îng'ani ya ntero îîu kûringana na ûgûri bwa Shekeli[1] cia fetha bwa ntûrûme ta îîu bwa kîrombero. Kîu nî kîgongwana gîa ntero.

¹⁶Ningî no mwanka arîee gîntû kîu atîranenkanîrîte kîa birîa biathûrîri Mûrungu, na oongeere gîchunchî kîa bitaano gîaakîo, anenkere mûthînjîri-Mûrungu. Nawe mûthînjîri-Mûrungu akaamûritîra kîgongwana gîa kûthiria maatia gîa ntûrûme îîu, nawe muntû ûu akaarekerwa.

¹⁷“Muntû kinya ûrîkû akëeja kwîyia, akathithia ûntû no bûmwe bwa jarîa MWATHANI akaananîtie kinya eethîrwa atîkûmenya nî eeîîtie arî na îgi, na mûrigo jwa meeyia jwaawe nî îgûrû rîaawe.

¹⁸Akaaretera mûthînjîri-Mûrungu ntûrûme îtî na antû aathûûku noo amwe îtaari kuuma ndîîthieene ya ng'ondu. Nayo îîthîrwe îringeene ûgûri na ntûrûme ya kîgongwana gîa ntero. Nawe mûthînjîri-Mûrungu akaamûritîra kîgongwana kîa kûthiria maatia jarîa athithîtie atîkûmenya, nawe muntû ûu akaarekerwa.

¹⁹Kîu nî kîgongwana gîa kûthiria maatia nîûntû nî aterete mbere ya MWATHANI.”