Read KIMERU BIBLE PROTESTANT EDITION Ala 6 Bible Online

Ala 6 - KIMERU BIBLE PROTESTANT EDITION bible

Ala 6

¹ MWATHANI nî aarîîrie Musa aramwaa mawaatho jaja:

²“Muntû akëeja kwaîria muntû ûngî, akarega kûmûcokeria into birîa anenkeri agwatagîîra nîûntû bwa îraandû, kana agatuunya muntû ûngî into, kana akainyîîria muntû ûngî, muntû ûu akeethîrwa eeîîtie kîrî ni.

³Ningî muntû akëeja gûciîtia atî atoona gîntû kîûrîte na akîoneete, muntû ûu akeethîrwa eeîîtie kîrî ni.

⁴Muntû akëeja kûthithia meeyia ta jau akeethîrwa arî na maatia. Abuîrîte gûcokia into birîa atuunyanîte, kana birîa ajûkîtie nîûntû bwa kwinyîîria bangî kana into birîa ajûkîtie agwatîîra nîûntû bwa îraandû, kana birîa oojeete biûrîte,

⁵kana birîa aaciîtîtie îndî arega kûûjûria mûciîtio. Ntukû ya kûthirîrua maatia, no mwanka muntû ûu acokie into bionthe kîrî mwene bio, birîa ajûkîîtie na waayia. Ningî oongeere into biu gîchunchî kîmwe kîrî bitaano mbere ya acokeria mwene.

⁶Muntû ûu akaarita ntûrûme kana mbûri îtî na antû athûûku noo amwe amiikie kîrî mûthînjîri-Mûrungu îrî îrîi rîa maatia jaawe kîrî MWATHANI. Ntûrûme îîu îîthîrwe îrî ya ûgûri bwa îrîa îritagwa nîûntû bwa kîgongwana gîa kûthiria maatia.

⁷Nawe mûthînjîri-Mûrungu akaarita kîgongwana gîa kûthiria meeyia nîûntû bwa muntû ûu. Naani nkaarekera muntû ûu, meeyia jonthe jarîa athithîtie.”

⁸MWATHANI nî aarîîrie Musa aramwîra atîrî,

⁹“Îîra Aaroni na ataana baawe ûrîa babuîrîte kûthithagia rîrîa bakûrita igongwana bia gwakîîria. Kîgongwana gîa gwakîîria kîbuîrîte kûraaraga gîgîakagîîrua ûtukû bunthe mwanka rûkîîrî au kîritîroone kîa igongwana.

¹⁰Nawe mûthînjîri-Mûrungu eekîrîte rwambambio na churubaarî îtumi na ndigi cia bamba, arite mûju kîritîroone kîa igongwana, ajûûmbie rûteere rwaakîo.

¹¹Acoke arite nguû irîa agwîkîrîte, eekîre ingî. Rîu ajûkie mûju jûu, ajuumagarie oome ya kambî, ajwîtûûre antû arîa kûthereetue a gwîtûûraga mûju ta jûu.

¹²Mwanki jûrîa jwîthagîrwa jûrî kîritîroone kîa igongwana bia gwakîîria jûtîbuîrîte kûrekeerua jwoora. Mûthînjîri-Mûrungu abuîrîte kûjwîkagîra nkû o rûkîîrî o rûkîîrî. Ningî mûthînjîri-Mûrungu aîîthagîrie maguta ja kîgongwana gîa gûcwaa thîîrî mwankiine jûu.

¹³Mwanki jûtîbuîri kûrekeerua jwoora kîritîroone kîa igongwana; jûbuîrîte gûkaraga jûgîakanaga magiita jonthe.”

¹⁴Ningî MWATHANI nî eetîre na mbere kwaria arauga atîrî, “Thithagieni ûjû rîrîa antû bakûrita igongwana bia irio. Mûthînjîri-Mûrungu wa rûrîîjo rwa Aaroni nîwe ûkaandeetagîra kîgongwana kîa irio, au kîritîroone kîa igongwana.

¹⁵Mûthînjîri-Mûrungu agakumbata mûtu jûmwinyu jwa kîgongwana kîu kîa irio, na ajûkie maguta, na ubaani îrîa îrî îgûrû rîa kîgongwana kîu. Akîîrie au kîritîroone kîa igongwana gîchunchî kîmwe kîrî gîchunchî gîa kûririkanagwa. Nakîo gîkethagîrwa kîrî kîgongwana kîrî na yeera rîrîega kîrî ni.

¹⁶Gîchunchî kîu kîngî gîa kîgongwana kîu kîa irio, gîkaarîîwa nî athînjîri-Mûrungu. Nakîo gîkaarîîwa gîtî na mûtheega jwa kwimbithia barî antû arîa atheru îemeene rîa gûtirimanîra.

¹⁷Kîgongwana kîu gîtîbuîrîte gûkaandwa na mûtheega jwa kwimbithia. Biu mbanenkerete kuumania na birîa bitigaraga ndaritîrwa igongwana bia gwakîîria. Nabîo nî kîgongwana gîkîtheru mono, o ta kîgongwana kîrîa nditagîrwa gîa kûthiria meeyia kana gîa kûthiria maatia.

¹⁸Gûtî muntû ûngî ûbuîrîte kûrûma kîgongwana kîu kîa irio nditîri, tiga arûme ba rûrîîjo rwa Aaroni akî. Muntû ûngî kinya ûrîkû ûrîa ûkaaringithia kîgongwana kîu kîa irio akoonua ndaaû nî ûtheru bwaakîo.”

¹⁹Ningî MWATHANI nî aaere Musa mawaatho aramwîra atîrî,

²⁰“Ntukû îrîa mûthînjîri-Mûrungu akathuuragwa na kwathûrwa, nîrîo akaaritaga kilo îmwe ya mûtu jûmwinyu buru jûrî kîgongwana kîa irio kîrî MWATHANI. Aritage mûtu jwa nusu kîlo îîu rûkîîrî na nusu îngî ûgoro.

²¹Mûtu jûu, jûkaunganua na maguta jûkaandwe na jûrugwe. Jûcoke jûng'enyûrangwe na jûritwe jûrî kîgongwana kîa irio. Narîo îeera rîaaju rîkaangwîria ni MWATHANI.

²²Mûthînjîri-Mûrungu ûrîa wonthe wa rûrîîjo rwa Aaroni ûrîa ûthuuri nîkenda amûrîa ûkua, nîwe ûkaritaga kîgongwana kîu. Ndaaritîrwa kîo, ûûni MWATHANI, kîîthagîîrue buru. Waatho bûu, bûthingatagwe magiita jonthe.

²³Kîgongwana kîa irio kîonthe kîrîa mûthînjîri-Mûrungu akaritaga kîbuîrîte kwîthagîîrua buru. Gîtîbuîrîte kûrîîwa.”

²⁴Ningî MWATHANI nî aarîîrie Musa aramwîra atîrî,

²⁵“Îîra athînjîri-Mûrungu ba rûrîîjo rwa Aaroni ûrîa bûbuîrîte kûthithagia rîrîa bakûrita kîgongwana gîa kûthiria meeyia. Kîgongwana kîu nî gîkîtheru mono. Nyomoo ya kîgongwana gîa kûthiria meeyia îbuîrîte kûûragîrwa rûteereene rwa bwa ûrîo rwa kîritîro kîa igongwana arîa nyomoo ya kîgongwana gîa gwakîîria yûûraagîrwa.

²⁶Mûthînjîri-Mûrungu ûrîa ûkaaritaga kîgongwana kîu, nîwe ûgakîrîa. Nawe agakîrîîra kîaragoone kîa îema rîa gûtirimanîra. Au nî antû atheru.

²⁷Gîntû kîonthe kana muntû wonthe ûrîa ûkaaringithia kîgongwana kîu, akeethîrwa arî ûmûtheru. Nguû îrîa îkaaminyûkîrwa nî tharike ya nyomoo ya kîgongwana kîu, no mwanka îûrîrwe antû atheru.

²⁸Nyama cia kîgongwana kîu ciarugwa na nyongû, no mwanka nyongû îîu yûragwe. Ningî ciarugwa na chuburia, no mwanka chuburia îîu îkurwe îthaambue buru.

²⁹Ntomûrûme wonthe wa rûrîîjo rwa athînjîri-Mûrungu oomba kûrîa nyama cia kîgongwana kîu. Kîgongwana kîu nî gîkîtheru mono.

³⁰Îndî nyama cia kîgongwana gîa kûthiria meeyia itîbuîrîte kûrîîwa nîûntû tharike nî îîthagîrwa îgwikua îemeene rîa gûtirimanîra, nîkenda îtumîrwa kûthiria meeyia. Tontû bûû, kîgongwana kîu kîbuîrîte kwîthîîrua buru.”