Read KIMERU BIBLE PROTESTANT EDITION Ala 7 Bible Online

Ala 7 - KIMERU BIBLE PROTESTANT EDITION bible

Ala 7

¹Ningî MWATHANI nî aaugîre ûrîa kûbuîrîte kûthithagua rîrîa muntû akûrita igongwana bia kûthiria maatia. Igongwana biu nî bibitheru mono.

²Nyomoo ya kîgongwana kîu, îbuîrîte kûûragîrwa rûteere rwa ûrîo bwa kîritîro kîa igongwana, arîa nyomoo cia kîgongwana gîa gwakîîria ciûragagîrwa. Tharike yaayo îmiinywe nteere cio-inya cia kîritîro kîa igongwana.

³Maguta jaayo jonthe jabuîrîte kûritwa kîritîroone kîa igongwana; tajo maguta ja kînyanya, na jarîa jagwateene na into bia kîu,

⁴na arite mpigo cio-ijîîrî amwe na maguta jaacio na arite gachunchî karîa keega buru ka îtema.

⁵Nawe mûthînjîri-Mûrungu agaakîîria maguta jau jonthe kîritîroone kîa igongwana jarî kîgongwana gîa kûthiria maatia kîrîa nditîri ni MWATHANI.

⁶Ntomûrûme wonthe wa rûrîîjo rwa athînjîri-Mûrungu oomba kûrîa nyama cia kîgongwana kîu. Nacio ibuîrîte kûrîîrwa antû atheru nîûntû nî kîgongwana gîkîtheru mono.

⁷Ûrîa kûbuîrîte kûthithua rîrîa muntû akûrita kîgongwana gîa kûthiria maatia, nîu kûbuîrîte kûthithagua rîrîa muntû akûrita kîgongwana gîa kûthiria meeyia. Mûthînjîri-Mûrungu ûrîa ûkaaritaga kîgongwana kîu, nîwe ûbuîrîte kûrîa nyama ciaakîo.

⁸Ningî nîwe ûbuîrîte kûjûkagia mûgûûta jwa nyomoo îîu.

⁹Igongwana bionthe bia irio birîa biritagwa nî bia mûthînjîri-Mûrungu ûrîa ûbiritaga; igongwana biu biethîrwa birî bia gûkaanda kana bia kûruga.

¹⁰Igongwana bionthe bia irio, biethîrwa biunganîtue na maguta kana biethîrwa birî bibiûmo nî bia athînjîri-Mûrungu ba rûrîîjo rwa Aaroni. Nabo bagaanage bio o ûrîa bakethagîrwa baang'ana.

¹¹MWATHANI nî eetîre na mbere kuuga ûrîa antû babuîrîte kûritaga igongwana bia gûcwaa thîîrî nawe. Arauga atîrî,

¹²“Rîrîa muntû akûnditîra kîgongwana gîa gûncokeria nkaatho, muntû ûu, abuîrîte kûreeta nyomoo ya kîgongwana amwe na mîgaate mîthemba îthatû: mîgaate îtîîkîri mûtheega jwa kwimbithia îndî îîkîri maguta ja nzeituni, na tûmîgaate tûtûûthû twaki maguta ja nzeituni, na kîîki îrugi na mûtu jûmwinyu juungeenue na maguta.

¹³Acoke arite mîgaate îîkîri mûtheega jwa kwimbithia, îrî kîgongwana gîa gûcwaa thîîrî.

¹⁴Muntû anditagîre mûthemba o jûmwe kuuma kîrî mîthemba îîu îna îrî kîgongwana kîrî MWATHANI. Nayo amînenkanîre kîrî mûthînjîri-Mûrungu ûrîa ûminyaga tharike îrîa ya gûcwaa thîîrî kîritîroone kîa igongwana.

¹⁵Nacio nyama cia kîgongwana kîa thîîrî naani, itîbuîrîte kûraara. Ibuîrîte kûrîîjagwa o ntukû îîu kîgongwana kîu kîritagwa.

¹⁶Îndî muntû akëeja kûrita kîgongwana kîa thîîrî naani nîkenda oojûria mîciîtio îrîa eekanîîrîte naani kana kîgongwana gîa gûciendera, nyama cia kîgongwana kîu ciarega kûthira ntukû îîu no irîîwe rûûneene.

¹⁷Nyama iu ikëeja gûkinyia ntukû ya ithatû itîthiri, no mwanka ciakîîrue.

¹⁸Nyama cia kîgongwana kîu gîa gûcwaa thîîrî ikëeja gûkinya ntukû ya ithatû na ikarîîwa nî muntû, ntîîtîkîîria kîgongwana kîa muntû ûu. Kîgongwana gîkeethîrwa gîkûgîa mûgiro na gîtîtarwa kîrî kîgongwana. Nawe muntû ûrîa ûgaakîrûma akoona agaakanûkua.

¹⁹“Nayo nyama ya kîgongwana kîu, îkëeja kûringithua nî gîntû gîtîtheri, itîbuîrîte kûrîîwa. Nyama îîu îbuîrîte kwîthîîrua. Nyama iu ingî ciomba kûrîîwa nî antû babatheru akî.

²⁰Antû batîtheri bakëeja kûrîa nyama cia kîgongwana kîu gîa gûcwaa thîîrî, antû bau batîûmba gûtaranîrua na antû baakwa kaîrî.

²¹Ningî muntû akëeja kûringithia gîntû kîrî na mûgiro kiumeenie na muntû kana nyomoo, na muntû ûu akarîa nyama cia kîgongwana kîu gîa gûcwaa thîîrî, atîbuîrîte gûtaranîrua na antû baakwa.”

²²Ningî MWATHANI nî aarîrie Musa aramwîra atîrî,

²³“Arîria antû ba Israeli ûbeere atî batîbuîrîte kûrîa maguta jaumîte kîrî ng'ombe, kana ng'ondu, kana kîrî mbûri.

²⁴Nyomoo ya ndîîthia îgäkua îtîûragi kana îkooragwa nî nyamû ya kîthaka, antû no bûtumîre maguta jaayo, o ûrîa bakwenda, îndî batîbuîrîte kûrîa maguta jau.

²⁵Muntû ûrîa ûkaarîa maguta ja nyomoo îrîa îriti kîrî ni MWATHANI îrî kîgongwana, muntû ûu agaatiga gûtaranagîrua na antû baakwa.

²⁶ Antû ba Israeli batîbuîrîte kûrîîjaga tharike ya nyomoo kana ya nyoni, o gûntû kûrîa bakethagîrwa barî.

²⁷Muntû kinya ûrîku ûrîa ûkaarîa tharike atîcoka gûtaranagîrua na antû baakwa.”

²⁸Ningî MWATHANI nî aarîrie Musa aramwîra atîrî,

²⁹“Arîria antû ba Israeli ûbeere atî, rîrîa muntû akaarita kîgongwana kîa thîîrî naani, no mwanka arite gîchunchî kîmwe kîrî kîgongwana kîa mwanya kîrî ni MWATHANI.

³⁰Abuîrîte kûndeetera kîgongwana kîu wengwa. Nakîo nî maguta ja nyomoo îîu na kîbara kîaayo. Nawe muntû ûu agîûkîîrie akîrite kîrî ni MWATHANI kîrî kîgongwana gîa gûkîîria.

³¹Mûthînjîri-Mûrungu agaakîîria maguta jau kîritîroone kîa igongwana, îndî nyama ya kîbara ya nyomoo îîu îkaarîîwa nî athînjîri-Mûrungu.

³²Naku kûgûrû kwa nyuma kwa ûrîo, kwa nyomoo îîu gûkaanenkagîrwa mûthînjîri-Mûrungu kuumania na kîgongwana kîu gîa gûcwaa thîîrî.

³³Mûthînjîri-Mûrungu ûrîa ûkaaritaga tharike na maguta ja nyomoo ya kîgongwana kîa thîîrî naani, nîwe ûkaanenkagîrwa kûgûrû kwa nyuma kwa ûrîo, kwa nyomoo îîu kûrî îriinga.

³⁴Nkweejana nyama ya kîbara na kûgûrû kwa ûrîo kwa nyuma, kwa nyomoo îîu îriti nî antû ba Israeli îrî kîgongwana kîa thîîrî kîrî athînjîri-Mûrungu. Iu nîcio nyama cia kîgongwana kîu ikanenkanagîrwa athînjîri-Mûrungu nî antû ba Israeli magiita jonthe.

³⁵Kîu nîkîo gîchunchî kîrîa Aaroni na ataana baawe baagaîîrwe ntukû îrîa baathuurîrwe na baraathûrwa nîkenda bantumîkagîra ûûni MWATHANI barî athînjîri-Mûrungu.

³⁶Ntukû îîu nîrîo ndeerîre antû ba Israeli banenkagîre athînjîri-Mûrungu gîchunchî kîu gîa kîgongwana kîa thîîrî naani. Waatho bûu, bûbuîrîte kûthingatagwa magiita jonthe.

³⁷Ûu nîu gûkaathithagua mantûûne jegiî igongwana bia gwakîîria, na igongwana bia irio, na igongwana bia kûthiria meeyia, na igongwana bia kûthiria maatia, na igongwana bia gûcwaa thîîrî naani na igongwana birîa biritagwa athînjîri-Mûrungu bakîthuurwa.

³⁸Ûu nîu ndeerîre Musa, kûu kîrîmeene gîa Sinai. Rîu nîrîo ndeerîre antû ba Israeli baanditîre igongwana ûûni MWATHANI.”