Read KIMERU BIBLE PROTESTANT EDITION Ala 9 Bible Online

Ala 9 - KIMERU BIBLE PROTESTANT EDITION bible

Ala 9

¹Ntukû ya inyaanya kuuma mambura jakûthira ja kwathûra Aaroni na ataana baawe, Musa nî abeetîre amwe na atongeeria ba Israeli.

²Areera Aaroni atîrî, “Jûkia kareegwa ûkarite karî kîgongwana gîa kûthiria meeyia, na ûjûkie ntûrûme ûmîrite îrî kîgongwana gîa gwakîîria au mbere ya MWATHANI. Nacio nyomoo iu ciîthîrwe itî na antû athûûku noo amwe.

³Îîra antû beetû ba Israeli bareete nthenge ya kîgongwana gîa kûthiria meeyia. Ningî bareete kareegwa na gatûrûme ka mwaka jûmwe gatî na antû athûûku noo amwe. Kareegwa kau na gatûrûme kau nî bia kîgongwana gîa gwakîîria.

⁴Ningî bareete ndeegwa na ntûrûme ya kîgongwana kîa thîîrî. Nyomoo iu iritwe irî kîgongwana kîrî MWATHANI. Nacio iritanîrue na kîgongwana kîa irio kiungeenue na maguta. Babuîrîte kûthithia ûu nîûntû MWATHANI agacionania kîrî tuî.”

⁵Nabo nî baikîrie into birîa Musa aabeerîrîte, au mbere ya îema rîa gûtirimanîra. Kîûthûrano kîa antû ba Israeli kîroothûrana mbere ya MWATHANI.

⁶Musa arauga atîrî, “Mantû jau nîjo MWATHANI augîîte jathithue nîkenda bwona mwago jwa MWATHANI.”

⁷ Rîu Musa areera Aaroni atîrî, “Îta kîritîroone kîa igongwana ûrite kîgongwana gîa kûthiria meeyia jaaku na kîgongwana gîa gwakîîria gîaaku. Ûcooke ûrite kîgongwana gîa gwakîîria, nîkenda meeyia jaaku na ja antû ba Israeli jathirua. Ûrite igongwana nîûntû bwa kûthirîria antû meeyia. Nabio ûbirite o ta ûrîa MWATHANI aaugîîte.”

⁸Tontû bûû, Aaroni areeta kîritîroone kîa igongwana; arooraga kareegwa karî kîgongwana gîa kûthiria meeyia jaawe.

⁹Ataana baawe baramûnenkera tharike. Nawe aratombeka kîara ku, aratheera kooneene cio-inya cia kîritîro kîa igongwana. Aracoka areetûûrîria tharike îrîa yaatigeere kîritîroone kîa igongwana nthîgûrû.

¹⁰Rîu araîîthîîria maguta, na mpigo, na antû arîa eega a îtema au kîritîroone kîa igongwana, o ta ûrîa MWATHANI eerîte Musa.

¹¹Naju mûgûûta na nyama iu ingî arabiakîrîîria oome ya kambî.

¹²Ningî Aaroni arooraga ntûrûme ya kîgongwana gîa gwakîîria. Nabo ataana baawe baramûnenkera tharike ya ntûrûme îîu. Nawe aramîminya nteere cio-inya cia kîritîro kîa igongwana.

¹³Baramûnenkera kîgongwana gîa gwakîîria; o gîchunchî o gîchunchî amwe na mûtwe jwa ntûrûme îîu. Nawe arabiakîrîîria kîritîroone kîa igongwana.

¹⁴Arathambia into bia kîu na mathagiro. Arabirîkîîra îgûrû rîa kîgongwana gîa gwakîîria arabiakîrîîria o au kîritîroone kîa igongwana.

¹⁵Nyuma ya ûu, Aaroni nî aajûkîrie mbûri aramîrita îrî kîgongwana gîa kûthiria meeyia ja kîrîndî. Aramîûraga na arathithia o ûrîa aathithîtie na kîgongwana kîa kûthiria meeyia jaawe wengwa.

¹⁶Ningî ararita kîgongwana gîa gwakîîria, o ta ûrîa kîaabuîrîte kûritwa.

¹⁷Aracoka ararita kîgongwana kîa irio. Arakumbata mûtu arajwîthîrîîria au kîritîroone kîa igongwana. Kîgongwana kîu kîaarî gîa kwongeera kîgongwana gîa gwakîîria kîrîa kîaaritagwa o rûkîîrî o rûkîîrî.

¹⁸ Aaroni nî ooragîre ndeegwa na ntûrûme birî igongwana bia thîîrî nîûntû bwa antû. Nabo ataana baawe baramûnenkera tharike yaacio. Nawe aramîminya nteere cio-inya cia kîritîro kîa igongwana.

¹⁹Najo maguta ja ndeegwa îîu na kînyanya gîa ntûrûme îîu, na mpigo na antû arîa eega a îtema,

²⁰birarîîkîîrwa nyameene îrîa ya kîbara, arabiîthîrîîria au kîritîroone kîa igongwana.

²¹Îndî arookîîria nyama îrîa ya kîbara na kûgûrû kwa nyuma kwa ûrîo birî kîgongwana gîa gûûkîîria kîrî MWATHANI o ta ûrîa Musa aamwîrîte.

²² Aaroni aratharima antû ookîîrîîtie njara. Arakinya nthîgûrû kuuma kîritîroone kîa igongwana arîa aaritagîra igongwana bia kûthiria meeyia na bia gwakîîria na bia thîîrî.

²³Musa na Aaroni baratonya îemeene rîa gûtirimanîra. Rîrîa baumagarîre, baratharima antû. Naju mwago jwa MWATHANI jûracionania kîrî antû bonthe.

²⁴MWATHANI aratûma mwanki, jûreenama jûraîîthia kîgongwana kîu gîa gwakîîria amwe na maguta jarîa jaarî kîritîroone kîa igongwana. Rîrîa antû bonthe boonere mantû jau, baraturia maru bareenamîîria barathaathayia MWATHANI bakîriingaga gîtuma mono.