Read KIMERU BIBLE PROTESTANT EDITION Jer 1 Bible Online

Jer 1 - KIMERU BIBLE PROTESTANT EDITION bible

Jer 1

¹Iji nî nteto cia Jeremia mûtaana wa Hilikia. Jeremia aarî ûmwe wa athînjîri-Mûrungu barîa baatûûraga Anathothi nthîgûrûûne ya Benjamini.

² MWATHANI nî aarîîrie Jeremia mwakeene jwa îkûmi na îthatû jwa waathani bwa Josia mûnene wa Juda. Josia aarî mûtaana wa Amoni.

³ Ningî MWATHANI nî aamwarîîrie kaîrî matukûûne ja waathani bwa mûnene wa Juda Jehoiakimu mûtaana wa Josia. Nî amwarîîrie jamaingî mwanka mwakeene jwa îkûmi na jûmwe jwa waathani bwa mûnene wa Juda Zedekia mûtaana wa Josia. Mweriine jwa îtaano jwa mwaka jûu nîrîo antû ba Jerusalemu baataîrwe baraikua kîthamîrioone.

⁴MWATHANI nî aambarîîrie arambîîra atîrî,

⁵“Mbere ya nkûûmbîra ndeene ya kîu kîa nyakwe, nî ndaakwijî. Mbere ya ûciarwa nî ndaakwathûrîre ndakûthuura ûrî kîroria nîûntû bwa mîgongo.”

⁶Naani ndîramwîra atîrî, “Itû MWATHANI Mûrungu ûûni rî, ntiijî kwaria ûûni ndî mwana mûnyi.”

⁷Îndî MWATHANI arambîîra atîrî, “Tiga kuuga, ‘Ndî mwana mûnyi’ nîkwîthîrwa ûgeeta kîrî barîa bonthe ngagûtûma. Ningî no mwanka uuge jarîa jonthe ngaakwîra.

⁸Menya ûbakîra, nîkwîthîrwa nkethagîrwa ndî amwe naagwe nkwonokagie, nîu ni MWATHANI kuuga.”

⁹Rîu MWATHANI aratambûrûkia njara yaawe arandingithia kanyua. Aracoka arambîîra ûjû, “Atîrî, ngwîkîra nteto ciaakwa kanyueene gaaku.

¹⁰Raithîîria, naarua ngûgwîka îgûrû rîa mîgongo na moonene, nîkenda ûkûûraga na ûtharagia, ûthiragie buru na ûgarûranagie, waakage na waandage.”

¹¹Ningî MWATHANI nî aambarîîrie arambûûria, “Jeremia, nîmbi ûkwona?” Naani ndîrauga, “Ndîona rwang'i rwa mûtî-mûciûku.”[1]

¹²MWATHANI aracoka arambîîra, “Ûkwona bwega, nîûntû ngaakaria mwanka mbone nteto ciaakwa ikûûjûra.”

¹³MWATHANI nî aambarîîrie rîa jaîrî arambûûria, “Nîmbi ûkwona?” Naani ndîramwîra, “Ndîona nyongû îkûtherûka îtegeete ûjû yumîte bwa ûrîo.”

¹⁴Rîu MWATHANI arambîîra atîrî, “Ûthûûku bûkauma bwa ûrîo bûtegûkîre antû barîa bonthe batûûraga nthîgûrû îîjî.

¹⁵Tontû rî, nî mbîtîîte mîîrîga yonthe ya moonene ja bwa ûrîo, nîu MWATHANI augîîte. Nabo beeja bonthe bakaarûngîka ndûriga ciaao au mpingîroone cia Jerusalemu, na kûthiûrûkîra nthingo ciaayo cionthe, na baithûkîre ntûûra ingî cionthe cia Juda.

¹⁶Naani ngaatûmîîria ûrîa ngiitîrîte antû baakwa îgamba, nîûntû bwa ûthûûku bwaao bwa kûmbîrûkîra. Nî baîthîtie ubaani nîûntû bwa mîrungu îngî na bathaathayia into birîa bathithîtie na njara ciaao.

¹⁷Îndî gwe nandî ithuranîre wikundîke kauna ûbeere jonthe jarîa ngaakwîra. Ûkaamakua nîbo mbîja gûkûmakîria kîrî bo nkûrûki.

¹⁸Ûûni ningwa rî, nî ni ngaakweethia ntûûra îmbirigîre na nkweethie gîtugî kîa chuuma na nthingo cia îturutia bia kûrwaa na nthîgûrû yonthe, na anene ba Juda, na atongeeria baayo, na athînjîri-Mûrungu baayo na antû ba nthîgûrû.

¹⁹Nabo bakaarwa naagwe, îndî batîkûûmba nîûntû nkethagîrwa ndî amwe naagwe, nkwonokagie,” nîu MWATHANI augîîte.