Read KIMERU BIBLE PROTESTANT EDITION Jer 10 Bible Online

Jer 10 - KIMERU BIBLE PROTESTANT EDITION bible

Jer 10

¹Thikîreeni buî antû ba Israeli nteto irîa MWATHANI akûbwarîria.

²MWATHANI ariuga ûjû, “Bûkáiritaneeni mîîtîre ya mîgongo îngî kana bûtemûrwa nî ndwano cia îgûrû kinya këethîra mîgongo îngî nî îmakagua nîcio.

³Ndini cia mîgongo îîu nî cia ûtheri; bagiitaga mûtî mwitûûne nabo atea ba mîtî baakajûjîyia.

⁴Antû nabo bakajûgemia na fetha na thaabu. Bagacoka bakaajûûrîra mîchumaarî na nyondo nîkenda jûtîkaagwe.

⁵Mîrungu îîu ya mîng'uanano îkari ta iragara bia kûrira muunda, na îtîûmba kwaria. No mwanka îkamatwe nîûntû îtîûmba gwîta na magûrû jaayo. Bûkámîkîreni, nîûntû gûtî ûntû bûbûûî yûûmba kûbûthithîria na kinya kûthithia wega îtîûmba.”

⁶Gûtî ûngî ta MWATHANI Gwe Ûrî inya na riîtwa rîaaku rîrî îgweta rîrînene.

⁷ Nûû ûtîgûkîraga gwe mûnene wa mîgongo? Gwe nî ûbuîrîte gûkîragwa. Nîkwîthîrwa kîrî antû barîa boome ba mîgongo, mîgongoone yaao yonthe, gûtî ûngî ta ûûgwe.

⁸Nabo bonthe nî biaa bitî ûûme mooritani jaao jaumaga kîrî mîrungu yaao ya mîng'uanano ya ûtheri.

⁹Fetha împûûre mma îreetagwa kuuma Tarishishi na thaabu îkareetwa kuuma Ufazi. Nayo mîrungu ya mîng'uanano îkathithua nî atea ba mîtî, na ba thaabu, nayo îîkagîrwa nguû cia rangi ya wiirû bwa îgûrû na rangi ya mûkû. Îîu yonthe îthithîtue nî atea na njara.

¹⁰Îndî MWATHANI nî Mûrungu wa mma. Nî Mûrungu ûrîa ûtwîre mwoyo na mûnene wa kenya na kenya. Nthîgûrû iinainagua nî mûthûûro jwaawe, na mîgongo îtîûmîîria marûrû jaawe.

¹¹Tontû bûû, ûbeere ûjû; “Mîrungu îrîa îtoombîre îgûrû na nthîgûrû, îkathira buru kuuma nthîgûrûûne na kuuma rungu rwa îgûrû.”

¹²Mûrungu nîwe woombîre nthîgûrû na inya yaawe aramîîka arîa îrî na ûûme bwaawe na aratambûrûkia îgûrû na ûmenyo bwaawe.

¹³Agondokaga rûûjî rûkaambîrîria kûringana kûu îgûrû; atûmaga matu joothûrana kuuma ituri bionthe bia nthî; nîwe ûreetaga ndweeni rîrîa gûkuura, na akarekeeria ruuo kûrîa arwîkaga.

¹⁴Antû bonthe nî biaa bitî ûûme aturi ba thaabu beekîrithagua nthao nî mîrungu yaao ya mîng'uanano yaao, nîûntû mîng'uanano îîu ya chuuma tî mîrungu ya mma na îtî mwoyo.

¹⁵Mîrungu îîu ya mîng'uanano nî ya ûtheri buru na nî ngûgî ya gûciayia bongwa; nayo rîrîa îgaatuîrwa îkaathirua buru.

¹⁶Îndî we ûrîa Mûrungu wa Jakubu atîkarî ta yo, nîkwîthîrwa nîwe woombîre into bionthe na Israeli nî antû baawe barîa aithuurîrîte. Riîtwa rîaawe nî MWATHANI Mweneinya.

¹⁷Ûthûranieni mîrigo yeenu bûmîîkîre ituro buî bûtwîre bûcîgîrîtue

¹⁸Nîkwîthîrwa MWATHANI ariuga ûjû, “Atîrî, îgiita rîrî ngakuruthûra atûûri ba nthî îîjî mbarite ku na mbareetere mîthangîko, mwanka bamenye ndî û.”

¹⁹Wûi ndîgûkua nî mûrimo! Ironda biaakwa bitîûmba kwora. Îndî ndîrauga, “Nî mma gûkû nîku kûthangîka, na no mwanka mpûmîîrie.”

²⁰Îema rîaakwa nî rîtharîtue na mîrigi îrîa îrîgwete yagiitangwa. Aana baakwa nî baantigîte beeta buru, gûtî we ûtigeere wa kwamba îema rîaakwa kaîrî kana wa gûcuuria itambaa biarîo.

²¹Nîkwîthîrwa arîîthi nî batuîkîte biaa; batîrombaga MWATHANI kîrîra. Nîkîo gîtûmîte mantû jaao jarega kûbua; na ndîîthia ciaao inyagua.

²²Thikîîreeni, kûrî mantû jakwarua! Kûrî na kîrûngûjû gîkînene, kiumîte nthîgûrû ya bwa ûrîo, kîîjîte kûethia ntûûra cia Juda maganjo na imamo bia mbîrwa.

²³MWATHANI, nî mbijî ûtûûro bwa muntû bûtî njareene ciaawe wengwa na to mwanka gûkarîke ûrîa muntû eendaga gûkarîka.

²⁴Itû MWATHANI, nkanûkia îndî tî nkûrûki ya kîthimi, ûgánkanûkia na mûthûûro, ûtîkeeje kûnthiria buru.

²⁵Tûrîkîria mîgongo îrîa îtîkwijî mûthûûro jwaaku na antû barîa batîkûthaathagia. Tontû nî baithûkîrîte Jakubu bamûthiria buru na batiga nthîgûrû yaawe îrî maganjo.