Read KIMERU BIBLE PROTESTANT EDITION Jer 11 Bible Online

Jer 11 - KIMERU BIBLE PROTESTANT EDITION bible

Jer 11

¹MWATHANI nî aarîrie Jeremia aramwîra atîrî,

²“Thikîîra nteto ijî cia kîrîkanîro gîkî, wîre antû ba Juda na barîa batwîre Jerusalemu.

³Ûbeere atîrî, MWATHANI Mûrungu wa Israeli ariuga ûjû: Muntû ûrîa ûkaarega kwathîkîra nteto cia kîrîkanîro gîkî nî ûmûrume.

⁴Kîu nî kîrîkanîro kîrîa ndeekîre na biûjûjû bieenu rîrîa ndaabiritîre nthîgûrûûne ya Misri, îrîa baathangîkîte ta baarî mwankiine jwa gûkerura chuuma. Ndîrabiîra atîrî, bwathikîîra kajû gaakwa na bwathithia jarîa jonthe mbwîrîte bûkaa antû baakwa, naani mpee Mûrungu weenu.

⁵Rîu nkoojûria mûciîtio jûrîa ndaaciîtîîrie biûjûjû bieenu atî nkabiaa nthîgûrû îrîa nthongi na îrî mûthetu jûmûnoru na ûtonga bûbwingî îrîa bûrî nandî.” Naani ndîramûcokeria, “Kûrokara o ûu MWATHANI.”

⁶MWATHANI arambîîra atîrî, “Tûmîîria nteto iji ntûûreene cia Juda na njîreene cia Jerusalemu uuge ûjû, ‘Thikîîreeni nteto cia kîrîkanîro gîkî na bwithingate.’

⁷Nîkwîthîrwa nî ndeerîre biûjûjû bieenu ûrîa bibuîrîte kwathîkîra kajû gaakwa rîrîa ndaabiritîre nthîgûrûûne ya Misri, na no mbwîraga u magiita jonthe mwanka ntukû ya naarua.

⁸Îndî amwe na bûu bataathîkîîre, kana bathikîîra. Tontû bwa ûûmo bwa nkoro ciaao nî baathingatîre mairîrîîria jamaaî ja nkoro ciaao. Tontû bûû, ndîratûma makanûkia jarîa jeerîri kîrîkanîroone gîkî jabeejîîra, kîrîa ndaabeerîre boojûragie îndî batîûjûrie.”

⁹Ningî MWATHANI nî aambîrîre atîrî, “Antû ba Juda na barîa batwîre Jerusalemu nî bareganîte naani.

¹⁰Nî bacokeete kûthithia meeyia jarîa jaathithagua nî biûjûjû biaao birîa biaaregere kwathîkîra rûteto rwaakwa, nabio nî biacokeete gûtumîkagîra mîrungu îngî. Antû ba Israeli na ba Juda nî bathûûkîtie kîrîkanîro kîrîa ndeekanîîre na biûjûjû biaao.

¹¹Tontû bûû, MWATHANI ariuga, ‘Atîrî, nkaabareteera ûthûûku batîûmba kûmatûka. Ningî kinya bankaîra ntîbathikîîra.

¹²Antû ba ntûûra cia Juda na atûûri ba Jerusalemu bageeta barîrîre mîrungu îrîa baîîthagîîria ubaani, îndî nayo îtîûmba kûboonokia rîrîa barî thîîneene.

¹³Nîkwîthîrwa buî antû ba Juda mîrungu yeenu iingîîte yang’ana ûrîa ntûûra cieenu ing'ana. Ningî bûthithîtie mûrungu jûrîa jûbûreetagîra nthao jwa Baali iritîro bia ubaani bibingî o ta njîra cia Jerusalemu.

¹⁴“Tontû bûû, menya ûrombera antû baba, kana ûûkia kajû ûkîbeerencanîîra kîrî Mûrungu na maromba, nîkwîthrwa ntîbathikîîra rîrîa bagankaîra barî thîîneene.

¹⁵Acoore baakwa, antû ba Juda batîbuîrîte kwîthîrwa barî nyomba yaakwa, nîûntû nî bathithîtie mantû jamathûûku. Ka bakûthûgaania mîciîtio yaao na igongwana biaao bikaarigîîria ûthûûku bûbeejîîra?

¹⁶Kûrî îgiita ûûni MWATHANI ndaabeetaga ‘Mûzeituni jûmwîthî, jûmûthongi jûrî na matuunda.’ Îndî nandî nkaajwîthia na mwanki jûrî na kîrûngûûjû gîkînene, na mpang'i ciaaju ithirue buru.

¹⁷Ûûni MWATHANI Mweneinya ûrîa waabaandîre mbugîîte atî nkaathiria antû ba Israeli na Juda nîûntû bwa meeyia jarîa bo bathithîtie, baaîthîria Baali ubaani baanthûûria.”

¹⁸MWATHANI nî aamenyithîrie ndaamenya mîbango îmîthûûku îrîa antû baarî nayo.

¹⁹Ni ndakari ta kang'ondu gaikîtue kîthînjîroone. Ntaamenyaga nî ni babangîrîte ûthûûku rîrîa baugaga: “Ga tûkûûre mûtî amwe na maciara jaaju ga tûmûthirie buru aume nthîgûrûûne ya barîa barî mwoyo, nîkenda riîtwa rîaawe rîûrîria buru.”

²⁰Îndî itû MWATHANI Mweneinya gwe ûgambanagîra ûrîa kwagîrîte gwe ûmenyaga bûrîa bûrî nkoroone na mathûgaanioone, îtîkîîria mbone ûkiirîrîria kîrî bo nîkwîthîrwa nî nkûnenkerete mantû jaakwa jonthe.

²¹Tontû bûû, MWATHANI nî akwaria îgûrû rîa antû ba Anathothi barîa bakwenda gûkûrita mwoyo bakîmwîraga, “Menya ûroria na riîtwa rîa a MWATHANI tûtîkeeje gûkûûraga.”

²²MWATHANI Mweneinya ariuga ûjû, “Nî mma nkaabakanûkia. Antû baao babeethî bagakuîra ndweene, na twaana twaao tûûragwe nî mpara.

²³Nîkwîthîrwa nkaareetera antû ba Anathothi ûthûûku rîrîa nkabakanûkia na gûtî noo ûmwe waao ûgatigara.”