Read KIMERU BIBLE PROTESTANT EDITION Jer 13 Bible Online

Jer 13 - KIMERU BIBLE PROTESTANT EDITION bible

Jer 13

¹MWATHANI nî aambîrîre atîrî, “Îta ûgûre mûcibi jwa bamba jwa kwoga kauna, naagwe ûjwoge kauna îndî ûkájûtongithia na rûûjî.”

²Tontû bûû, ndîragûra mûcibi jwa bamba o ta ûrîa MWATHANI aambîîrîte, ndîrajwoga kauna.

³MWATHANI nî aambarîîrie rîa jaîrî arambîîra atîrî,

⁴“Jûkia mûcibi jwa bamba jûrîa ûgûrîte na wajwoga kauna. Ithuranîre wîîte mûuroone jwa Eufurate ûjwithe rwatueene rwa iiga.”

⁵Tontû bûû, ndîreeta ndîrajwitha rûteere rwa mûuro jwa Eufurate o ta ûrîa MWATHANI aambîrîte.

⁶Nyuma ya ntukû inyingî mma, MWATHANI nî aambîrîre atîrî, “Ithuranîre wîîte mûuroone jwa Eufurate, ûjûkie mûcibi jwa bamba jûrîa ndaakwîrîre withe naao.”

⁷Naani rîu ndîreeta Mûuroone jwa Eufurate ndîraithûra mûcibi jwa bamba arîa ndaajwithîte. Naju rî, nî jwaarî jûkûthûûka, ûntû jûtîngîûmba gûtumîrwa kaîrî.

⁸Rîu MWATHANI arambarîria arambîîra atîrî,

⁹“Ûûni MWATHANI ndiuga ûjû: Ûu nîu nkeenyangia rwikumio rwa antû ba Juda na rwikumio rûrûnene rwa antû ba Jerusalemu.

¹⁰Antû baba bathûûku baregeete kûthikîîra rûteto rwaakwa na boomia mîtwe bathingatîte mairîrîîria ja nkoro ciaao. Ningî nî bathingataga mîrungu îngî bakîmîtumîkagîra na kûmîthaathayia. Nabo bagaakara ta mûcibi jwa bamba jûu jûtîûmba gûtumîrwa kaîrî.

¹¹O ta ûrîa mûcibi jwa bamba jwoogaga kauna ka muntû jûkarikia, nîo u ndaatûmîre antû ba Israeli bonthe na ba Juda bonthe bangwata bandikia, nîkenda baa antû baakwa baandeetera nkûma, na ûkumio, na bambîkîra îgweta. Îndî bo batámbathîkîîre.”

¹²Naagwe ûbeere nteto iji: “MWATHANI Mûrungu wa Israeli ariuga ûjû, ‘Ithiri bionthe nî biûjûrue ndibei.’ Nabo antû bagagûcokeria atîrî, ‘Nîka tûtiijî atî no mwanka ithiri bionthe biûjûrue ndibei?’

¹³Rîu naagwe ûbeere atîrî, ‘Ûûni MWATHANI ndiuga ûjû, nkaanyuithia antû bonthe ndibei boogite, barîa batwîre nthîgûrû îîjî, nabo anene ba rûrîîjo rwa Daudi, na athînjîri-Mûrungu, na iroria, na barîa bonthe batwîre Jerusalemu.

¹⁴Naani nkaabarwîthania; ndwîthanie aana na beethe, nîu ûûni MWATHANI nkuuga. Ntîbarekera, kana mbacaîîra, kana mbaigîîrua kîaao, ntiga kûbathiria.’”

¹⁵MWATHANI nî aarîîtie, thikîîreeni bwigue ûrîa augîîte, bûtige gwikumia.

¹⁶Kumieni MWATHANI Mûrungu weenu mbere ya areeta muundu na mbere ya magûrû jeenu jagiitarîra irîmeene bikunîki nî muundu. Buî bwîrîgîrîte weerû nawe akaaethia weerû bûu muundu abweethie muundu jûmûnene mono.

¹⁷Ningî bwarega kûthikîîra buru ûûni nkaarîra withoone nîûntû bwa rwikumio rweenu. Nkaarîra mwanka meethori jeetîke nîûntû antû ba MWATHANI nî baataîtwe

¹⁸Îîra mûnene na kinya ng'ina wa mûnene mantû jaja: “Umeeni itîîne bia ûnene nîkwîthîrwa thirû cieenu inthongi nî iriti mîtwe yeenu.

¹⁹Ntûûra cia Juda irîa irî bwa ûmotho ikaaingwa na gûtî we ûkoomba gûcirugûra. Juda yonthe îgaikua kîthamîrioone igaikua kîthamîrioone yonthe buru.

²⁰Jerusalemu, ciûkia meetho woone anthû barîa baumîte bwa ûrîo. Barîkû antû barîa ûmenyagîîra? Barîkû barîa wikumagia nîûntû bwaao?

²¹Bûkauga atîa rîrîa barîa bûthûgaanagia atî nî acoore beenu bakabûtaa babwathe? Tîka bûkagwatwa nî rwakaî ta rwa mûka akîewa mwana?

²²Ningî bwooria nkoroone cieenu atîrî, ‘Nîkî tontû twîjîîri nî mantû jaja?’ Bûmenye nîûntû bwa meeyia jeenu kwingîa nîkîo gîtûmîte bûguûrua nguû na bûmamwa naabuî kwa inya.

²³Muntû oomba kûgarûra gîkonde kîaawe kana nkarî îgarûra matûmba jaayo? Kinya buî no u bûtîûmba kûthithia wega nîûntû bûmenyeretie kûthithia ûthûûku akî?

²⁴Nkaabûnyagia o ta maûngo jarîa janyagagua nî ruuo rwa kuuma rwanda.

²⁵Rîu nîrîo îringa rîeenu, nîkîo kiigai kîrîa mbûgaîrîte, nîu ûûni MWATHANI nkuuga. Nîkwîthîrwa nî bûûrîrîîtue nî ni bweetîkia mîrungu ya mîng'uanano.

²⁶Nî ni ningwa nkaabûguûria nguû bwonwe kîthûnû kîeenu.

²⁷Nî ndîîkîîtie kwona mantû jamathûûku jarîa bûthithîtie; najo nî kûthaathayia mîrungu ya mîng'uanano kûu irîmeene na bûûrîîne. Wûi kîrî gwe Jerusalemu! Nî mwanka rî ûgaakara ûtîtheri?”