Read KIMERU BIBLE PROTESTANT EDITION Jer 14 Bible Online

Jer 14 - KIMERU BIBLE PROTESTANT EDITION bible

Jer 14

¹MWATHANI nî aarîîrie Jeremia mantû jegiî ngai kûûra îgiita rîrîraaja aramwîra atîrî,

²“Juda nî iithikîîrîte na ntûûra ciaayo nîka ikunyamaara nabo antû baayo baitugutîîtie nthî bakîrîraga, nayo Jerusalemu nî îkûrîrîra MWATHANI.

³Antû ba Israeli barîa anene batûmaga nthûûmba ciaao gûtaa rûûjî, îndî beeta matangiine bakeethîra gûtî rûûjî bagacoka na mîtûngi îmîtheri. Nabo barigaraga bakaigua bûbûûî mono bagakunîkîra mîtwe yaao nîûntû bwa nthao.

⁴Tontû bwa ûrîa nthî yûûmagari nîûntû bwa kwaga ngai, arîmi baikunîkaga mîtwe nîûntû bwa nthao.

⁵Kinya nkûrûngû nî ikwîrûkîra biaana biaacio ithakeene nîûntû gûtî na nyaki.

⁶Ntigiri cia kîthaka îrîrûngama tûrîmeene tûtûtheri ikîeenaga ta mbîrwa. Nacio itîkwona nî kwaaga gîa kûrîa.

⁷Itû MWATHANI, kinya këethîra meeyia jeetû nî jagûtûgambithia; nîûntû bwa riîtwa rîaaku akî ûtûteethie. Tontû nî tûkwîrûkîrîte jamaingî na twakwîîria.

⁸Itû gwe nîgwe wîrîgîîro bwa Israeli, nîgwe Mwonokia waao magiiteene ja thîîna. Nîkî îndî tontû ûkari ta mûgeni nthîgûrûûne îîjî, ta mûgeendi ûrî rûgendoone ûrîa ûraaraga kîraaro kîmwe akî?

⁹Nîkî ûntû gwe ûkari ta muntû ûkirimanîtue, ta nchamba înene îtîkûûmba kwonokia? Gwe MWATHANI nî tûkûmenya ûrî gatîgatîîne geetû; na tontû nî tûgwetanagîrua na riîtwa rîaaku ûgaatwîrûkîra.”

¹⁰MWATHANI ariuga ûjû mantû jegiî antû baba, “Beendeete gûtomia njîra o ûu ûtheri batiunaga magûrû. Tontû bûû, ûûni MWATHANI ntîkûbeenda, na nkaaririkana meeyia jaao mbakanûkîrie jo.”

¹¹Ningî MWATHANI nî aambîrîre atîrî, “Ûkárombera antû baba bëeja kwona wega.

¹²Kinya baciata kûrîa biakûrîa, ntîthikîîra gûkaya kwaao. Kinya barita igongwana bia gwakîîria na bia irio ntîbeetîkîîria baa baakwa kaîrî. Îndî nî kûthiria nkaabathiria na ndwaa, na mpara, na mîrimo.”

¹³Naani ndîrauga atîrî, “Nandî MWATHANI Mûrungu, nî ûkûmenya iroria biaao birîbeera atîrî, ‘Gûtî kûûragwa bûkooragwa, kana bûgîa na mpara, îndî nî thîîrî ya gûtûûra MWATHANI akabwaa gûntû gûkû.’”

¹⁴MWATHANI arambîîra atîrî, “Iroria birîroria mantû ja ûrongo na riîtwa rîaakwa. Ûûni ntîîthagîrwa mbitûmîte, na gûtî ûntû mbîthagîrwa mbiîrîte, kana mbiarîrîîtie. Bio bibaroragîria mantû ja ûrongo riîtweene rîaakwa na kûbwonera bîoneki bitî bia mma biumeenie na waayia bwa mathûgaanio jaao.

¹⁵MWATHANI ariuga ûjû mantûûne jegiî iroria birîa biroragia na riîtwa rîaakwa kinya ndëethîrwa ntîbitûmîte: bio biugaga atîrî, ‘Gûtî ndwaa kana mpara nthîgûrûûne îîjî.’ Iroria bimwe bikooragîrwa ndweene na bingî biûragwe nî mpara buru.

¹⁶Nabo antû barîa biroragîria nteto cia ûrongo bagaatewa kûu njîreene cia Jerusalemu barî ntungu ciûragi nî mpara, na ndwaa, na gûtî muntû ûkaathika ntungu iu, kana athika aka baao, kana ataana baao, kana aarî baao. Nîkwîthîrwa ngatûma bacokerwa nî ûthûûku bwaao.”

¹⁷MWATHANI nî aambîrîre mbîîre antû ndî na kwithikîîra. Mbeere atîrî, “Ndîkara nkîrîraga meethori ûtukû na mûthenya ntîgûkira nîûntû antû beetû nî beekîri ngûma inene, nacio nî iringîrwa bibinene biûmba kûûraga.

¹⁸Ndeeta bûûrîîne, nîu biimba birîa biûragîri ndweene biûjûri. Ndatonya ntûûreene, nîu antû booragi nî mpara. Iroria na athînjîri-Mûrungu ka beetîte na mbere na ngûgî ciaao nthîgûrûûne ta gûtî u gûgûkarîka.”

¹⁹MWATHANI, ka ûteejanîrîtie antû ba Juda? Ka wathûûra Zaiûni buru? Nîkî ûntû ûtûringîte ûrîa tûtîûmba kworua? Tuî tûcwaga thîîrî îndî gûtî wega twonaga; ningî twîrîgagîîra kworua îndî nî kûmakua tûmakagua.

²⁰Itû MWATHANI, nî tûkuumbûra meeyia jeetû na ja biûjûjû bieetû, twinthe nî twîîtie kîrî gwe.

²¹Tontû bwa riîtwa rîaaku, menya ûtûteejanîria, menya ûmenithia mûnene na ntûûra ya Jerusalemu arîa mûnene aathanaga arî. Ririkana kîrîkanîro gîaaku naatuî na ûgátûthûûkia.

²²Kûrî mûrungu jwa mûng'uanano jûûmba kuurithia ngai? Kana rî, îgûrû na bwa rîo rîomba kuurithia ngai? Anga tuî tî kîrî gwe twîkîte wîrîgîîro bweetû gwe MWATHANI Mûrungu weetû? Nîkwîthîrwa nîgwe ûthithagia mantû jaja jonthe.