Read KIMERU BIBLE PROTESTANT EDITION Jer 15 Bible Online

Jer 15 - KIMERU BIBLE PROTESTANT EDITION bible

Jer 15

¹ MWATHANI nî aambarîîrie arambîîra atîrî, “Kinya Musa na Samueli bakarûngama aja bakîerencanîîra antû ba Juda, ntîbaigîîrua kîaao. Beenge baume mbere yaakwa, beete buru!

² Nabo bakûûria, ‘Nîkû tweeta?’ Beere, ‘MWATHANI ariuga ûjû, Barîa bagiitîri kûthirua nî mûrimo bathirue nî mîrimo, barîa bagiitîri kûthirua nî ndwaa bathirîrue ndweene barîa bagiitîri kûûragwa nî mpara booragwe nî mpara barîa bagiitîri gwikua kîthamîrioone baikue kîthamîrioone.’

³Naani nkaabathuurîra into bina bia kûbathiria. Nabio nî rûchiû rwa kûbooraga, na kurû cia kûbatambûranga, na nyoni, na nyamû cia kîthaka irîa ikaabarîa ibathirie.

⁴ Naani nkaabaethia gîntû gîa kûmakania kîrî mîgongo yonthe ya nthî nîûntû bwa ûrîa Manase mûnene wa Juda, ûrîa waarî mûtaana wa Hezekia aathithîrie arî Jerusalemu.

⁵Itû Jerusalemu, nûû ûgaakwigîîrua kîaao? Kana nûû ûkaithikîîra nîûntû bwaaku? Nûû ûkooria ciaaku?

⁶Buî nî bûndegeete, na bûkaraga bûgîcokaga na nyuma nîu ûûni MWATHANI nkuuga. Tontû bûû, nî ntaambûrûkîîtie njara na ndaabûthiria buru nîûntû nî nogeete nî kwigwata ntîrabûkanûkia.

⁷Mbûgûrûkîtie o ta ûrîa maûngo jagûrûkagua nî ruuo ntûûreene cionthe cia nthîgûrû yeenu, na ndaabûûragîra twaana, ndathiria antû baakwa buru, nîûntû bataatiga mîîtîre îmîthûûku.

⁸Nî ntûmîte aka ntigwa beenu baingîa nkûrûki ya mûthanga. Nî ndeeteerete bang'ina ba nthaka thîîna riûa rîrûngi; tontû nî mbûragîte nthaka ciaao. Nî ntûmîte boojûrwa ntûti nî kîmako na kwithikîîra.

⁹Mûka ûrîa ûcieere aana mûgwanja ka akûgirîka na nîka akweena. Riûa rîaawe rîthwîte kûrî mûthenya gatîgatî, nawe nî eekîrithîtue nthao, aconorwa. Antû barîa bagaatigara bakooragîrwa ndweene nî anthû, nîu ûûni MWATHANI nkuuga.”

¹⁰Wûi naanû! Nîkî ûntû maama aanciarîre ni muntû ûtetaga na kûrwaa na antû bangî nthîgûrûûne kunthe? Gûtî muntû mpeete îrandû kana ni ndoomba îrandû. Ningî amwe na jau ka antû bakûnduma.

¹¹MWATHANI, irumi biaao birorîa, ndîkwîthîrwa ntîbarombagîra wega na ndîkwîthîrwa ntîrombagîra anthû magiita ja thîîna na ja mîthangîko!

¹²Kûrî muntû ûûmba anthû ba kuuma bwa ûrîo barîa bakari ta îturutia kana chuuma?

¹³Ningî MWATHANI arambîîra atîrî, “Nkaanenkanîra ûtonga bwa antû baakwa na mîthithû kîrî anthû bamîtae îtî na îrîi nîûntû bwa meeyia jonthe ja antû baakwa nthîgûrûûne yaao kunthe.

¹⁴Ngaatûma batumîkîre anthû baao nthîgûrûûne îrîa batiijî, nîkwîthîrwa mûthûûro jwaakwa jûkari ta mwanki, naju jûgaakana kenya.” Naani Jeremia ndîrauga atîrî,

¹⁵“Gwe MWATHANI nî wiijî mantû. Ndirikana wîje ûndaîthe, na ûndîîrie kîrî barîa banthangîkagia. Mpûûmagîîria rûmena nîûntû bwaaku.

¹⁶Rîrîa wambarîrie nî ndaathikîrîre nteto ciaaku cionthe nacio iratûma ngwîrua mono, nîûntû nî ngwetanagîrua na riîtwa rîaaku, gwe MWATHANI Mûrungu Mweneinya.

¹⁷Ûûni ntaakara nthî ngwîranîrua na antû bangî, kana noo ngwîrua ningwa. Îndî ndaakaraga ndî ninka nîkenda nkwathîkîra naagwe ûrambûjûria mûthûûro.

¹⁸Nîkî tontû ûrûrû bwaakwa bûtîkûthira? Nîkî tontû nkûûjî yaakwa îtîkwora? Nîka gwe ûgûmpaîria ta kamûuro karîa koonanagia karî na rûûjî na gatî naru?”

¹⁹Tontû bûû, MWATHANI aracokeria Jeremia aramwîra atîrî, “Wacoka kîrî ni ngaakwaambîrîria ûtue gûntumîkagîra. Watua kwaragia nteto irî gîtûmi itî cia ûtheri gwe ûkaaragia antûûne aakwa. Antû bagacoka kwîjaga kîrî gwe îndî gwe ûtîîthîrwa ûrî na ûbatu bwa gwîta kîrî bo.

²⁰Naagwe meethoone ja antû baba ngaakweethia ta rûthingo rûrikîîtue rwa îturutia, nabo bakarwaa naagwe îndî batîkorokûûmba, nîûntû ndî amwe naagwe ngûtunyûkagie na nkwonokagie, nîu ûûni MWATHANI nkuuga.

²¹Ûûni ngaagûtunyûkia njareene cia barîa baaî ngûkûûre njareene cia barîa batî kîaao.”