Read KIMERU BIBLE PROTESTANT EDITION Jer 16 Bible Online

Jer 16 - KIMERU BIBLE PROTESTANT EDITION bible

Jer 16

¹MWATHANI nî aambarîîrie arambîîra atîrî,

²“Menya ûgûrana kana ûgîa na aana gûntû gûkû.

³Nîkwîthîrwa ûu nîu ûûni nkuuga mantûûne jegiî aana barîa baciarîri gûntû gûkû, na aciari baao.”

⁴Bakaathirua nî mîrimo îmîthûûku na batîrîrîrwa, kana bathikwa. Biimba biaao bikoojûra nthîgûrûûne kunthe ta ûrîa ntaka yûûjûraga kunthe. Nabo bakaathirîrua ndweene, na bathirue nî mpara, nabio biimba biaao birîîwe nî nyoni na nyamû cia kîthaka.

⁵Nîkwîthîrwa ûûni MWATHANI ndiuga ûjû: “menya ûtonya nyomba îrî na kîrîro, kana ûbarîrîra. Tontû nî mbatunyîte thîîrî yaakwa na kîaao gîaakwa kîrîa gîtîthiraga.”

⁶Antû bagaakua bëethîrwa barî nkîa kana itonga nthîgûrûûne îîjî na batîona wa kûbathika. Gûtî muntû ûkaithikîîra kana acienja kîongo kwonania kwithikîîra nîûntû bwaao.

⁷Gûtî we ûkaarîjanîra kana anyunyanîra na muntû ûkuîri akîmûboreria, kinya ëethîrwa akuîri nî îthe kana ng'ina.

⁸Gwe menya wîja gûtonya nyomba irî na kîatho, ûkara nthî ûrîîjanîra na antû kana ûnyunyanîra nabo.

⁹ Nîkwîthîrwa ûûni MWATHANI Mweneinya Mûrungu wa Israeli ndiuga ûjû: atîrî, ngaakiria kajû ga nkerû na ga kûgwîrua gûntû gûkû. Ningî nkirie kajû ga gûkûngwîra mambura ja mûranû. Mantû jaja jakathithîka ûtûûroone bweenu bûkîonaga.

¹⁰“Naagwe weera antû baba nteto iu cionthe, bagaakûûria atîrî, ‘Nîkî tontû MWATHANI atûtuîra ûthûûku bûng'ana ûjû? Meeyia jeetû nî jarîkû? Gatûthithîrîtie MWATHANI Mûrungu weetû meeyia jarîkû?’

¹¹Rîu naagwe ûbacokerie ûbeere ûûni MWATHANI ndiuga ûjû: ‘Bîujûjû bieenu nî biambîrûkîîre biathingata mîrungu îngî biatua kûmîtumîkagîra na kûmîthaathayia. Nabo nî baantiganîîrie buru batiga kwathîkîra Waatho bwaakwa.

¹²Buî nî bûthithîtie ûthûûku bûbûnene nkûrûki ya bwa biûjûjû bieenu, nîûntû bwa ûûmo bwa nkoro cieenu. Bwathingata mairîrîîria jamaaî ja nkoro cieenu, bwarega kûmbathîkîra.

¹³Tontû bûû, ndîbûkuruthûra mbûrite nthîgûrû îîjî, mbwikie nthîgûrû îrîa buî kana biûjûjû bieenu bûtaijî. Kûu nîkû bûgaatumîkagîra mîrungu îngî ûtukû na mûthenya, nîûntû ntîbwigîîrua kîaao.’”

¹⁴MWATHANI ariuga atîrî, “Îgiita nî rîîjîte, rîrîa antû bagaatiga gûciîtagia bakiugaga, ‘Nî ngûciîtia riîtweene rîa MWATHANI ûrîa ûrî mwoyo, ûrîa waaritîre antû ba Israeli kuuma nthîgûrûûne ya Misri.’

¹⁵Îndî bagatua gûciîtagia bakiugaga atîrî, ‘Nî ngûciîtia riîtweene rîa MWATHANI ûrîa ûrî mwoyo, ûrîa waaritîre antû ba Israeli kuuma nthîgûrû ya bwa ûrîo na kuuma nthîgûrû cionthe irîa aabanyaganîtie.’ Nîkwîthîrwa nkaabareeta nthîgûrûûne yaao yongwa îrîa ndaaere biûjûjû biaao.”

¹⁶MWATHANI ariuga atîrî, “Ni ntûmanîrîte agwatia makûyû babaingî, nîkenda bagwatia antû. Ningî ngatûmanîra athogi nîkenda bathooga antû bau kuuma irîmeene bionthe na tûrîmeene tunthe, na ikurunguune bia maiga.

¹⁷Nîkwîthîrwa nî mbonaga mantû jonthe jarîa bathithagia na batiithîka, ningî kinya meeyia jaao, jatiithîka kîrî ni.

¹⁸Naani nkaabakanûkia mainda jaîrî nîûntû bwa meeyia jaao nîkwîthîrwa nî boojûrîîtie nthîgûrû yaakwa mîrungu ya mîng'uanano. Nayo mîrungu îîu yeekîra nthîgûrû yaakwa mûgiro.”

¹⁹Jeremia araromba arauga atîrî, “Itû MWATHANI nîgwe inya yaakwa na giiciitho gîaakwa. Nîgwe giitiiro gîaakwa îgiita rîa thîîna. Nî kîrî gwe mîgongo îkaamatûkaga kuuma nthîgûrû yonthe îgîkwîraga atîrî, ‘Biûjûjû bieetû biaigwatîrîte mîrungu ya ûtheri ya ûrongo akî, mîrungu îtî umithio.

²⁰Muntû oomba kwithithîria mîrungu yaawe? Îîu îtîîthîrwa îrî mîrungu ya mma.’” MWATHANI ariuga atîrî,

²¹“Tontû bûû rî, ngatûma bamenye inya yaakwa na mma, na bamenye jarîa mpûûmba kûthithia. Nabo rîu bakaamenya riîtwa rîaakwa nî MWATHANI.”