Read KIMERU BIBLE PROTESTANT EDITION Jer 17 Bible Online

Jer 17 - KIMERU BIBLE PROTESTANT EDITION bible

Jer 17

¹MWATHANI ariuga atîrî, “Meeyia ja antû ba Juda jaandîki na kîandîki gîa chuuma. Najo jaandîki nkoroone ciaao ûrîa jatîûmba kwangûka ta ûrîa mantû jaandîkagwa maigeene kana ngoji cia iritîro bia igongwana na kamûthia ga chuuma ya alumasi.

²Nchiarwa ciaao nî ithaathagîria iritîroone biaao bia igongwana, na itugîîne bia mûrungu jwa mûng'uanano jwa Ashera, na mîtîîne îriibîte, na tûrîmeene,

³na irîmeene bûûrîîne. Naani nkaanenkanîra ûtonga bweenu na mîthithû yeenu yonthe bitawe nthîgûrûûne yonthe birî îrîi rîa meeyia jeenu.

⁴Bûkaanenkanîra nthîgûrû irîa ndaabwere na ntûme bûtumîkîre anthû beenu nthîgûrûûne bûtiijî. Nîkwîthîrwa nî bûtûmîte mûthûûro jwaakwa jwaabûtûrîkîra na jûtîthira mwanka kenya.”

⁵MWATHANI ariuga ûjû, “Nî ûmûrume muntû ûrîa ûtigaga kûmbîtîkia ageeka wîrîgîîro bwaawe kîrî muntû, akaeethia muntû ûngî inya yaawe.

⁶Muntû ûu akari ta mûtî jûrî rwanda nawe gûtî wega oonaga. Atûûraga gûntû gûkûûmo rwanda nthî îrîa îrî mwonyo îrîa gûtî kîmera kîûûmba gûkûra ku.

⁷Kîtharimo nî kîrî muntû ûrîa ûmbîtîkagia, ûrîa wîkaga wîrîgîîro bwaawe kîrî ni.

⁸ Muntû ûu akari ta mûtî jûrî rûteere rwa rûûjî, jûrîa jûtonyithagia mîri yaaju rûûjîîne. Naju jûtîkîraga mûû jweeja nîûntû mabûûra jaaju jakaraga jariibîte. Ningî jûtiigagua ûguaa rîrîa ngai yûûrîte nîûntû gûtî rîo jûtigaga gûciara.

⁹Nkoro ya muntû îrî waayia nkûrûki ya into bingî bionthe kûrî na inya îgîteetheka. Nûû ûûmba kûmenya mantû jaayo?

¹⁰ Ni MWATHANI nî ni nthûûjaaga mathûgaanio na nkageria nkoro cia antû. Ntuujagîra muntû kûringana na mîîtîre yaawe, na kûringana na mathithio jaawe.

¹¹Muntû ûrîa ûcwaga ûtonga na njîra itîagîrîte, akari ta nyoni îguîkîte nkara itî ciaayo. Agîkinyia ûkûrû bwaawe gatîgatî ûtonga bûu bûkamûthirîra na mûthieene oonekaga araarî kîaa.”

¹²Kuuma kîambîrîriene kîûrû gîeetû gîtwîre gîûkîrîtue ta rûriga rwa mwago.

¹³Gwe MWATHANI nîgwe wîrîgîîro bwa Israeli nabo bonthe barîa baakwîrûkagîra ka bacokagîrwa nî nthao. Barîa bagûtiganagîria baakaraga ta antû baandîki mariîtwa tîîriine nîûntû ka beerûkîrîte MWATHANI, we kîthima kîa rûûjî rwa mwoyo.

¹⁴MWATHANI wamboria, ûûni nkoora na wambonokia, nkoonoka, nîkwîthîrwa ngaagûkaathaga.

¹⁵Atîrî, antû barîmbûûria, “Irîkû nteto irîa MWATHANI augîîte? Nî ciûjûre!”

¹⁶Ni gûtî rîo ndaagûkinyîîria ûbareetera ûthûûku kana noo ndiirîrîîria ntukû ya wûûî îkinya na ûûgwe nî wiijî ûu, jarîa jonthe mbarîîtie nî ûjaijî.

¹⁷Menya ûtûma ngûkîra. Gwe nîgwe kîmatûko gîaakwa îgiita rîa thîîna.

¹⁸Barîa banthangîkagia barocokerwa nî nthao îndî ni menya ncokerwa nî nthao. Bo baroojûragwa nî kîmako îndî ni nkoromaka. Bareetere thîîna ûbathirie kaîrî na kaîrî.

¹⁹MWATHANI nî aambîrîre atîrî, “Îta ûrûngame mpingîroone îrîa îtagwa Mpingîro ya Antû, îrîa anene ba Juda bakûrûkaga na kuumagara nayo. Ningî ûrûngame mpingîroone cionthe cia Jerusalemu.

²⁰Naagwe uuge ûjû: Buî anene ba Juda, na antû ba Juda, na barîa batwîre Jerusalemu bonthe; buî bûkûrûkaga na mpingîro iji, thikîîreeni rûteto rwa MWATHANI.

²¹ MWATHANI ariuga ûjû: Imenyeereeni këethîra nî bûkwenda gûtûûra mwoyo bûgákamataga mîrigo ntukû ya sabatû kana bûkûrûkîîra na mîrigo îîu mpingîroone cia Jerusalemu.

²² Ningî bûgákamataga gîntû kinya kîrîku kuuma nja cieenu ntukû ya sabatû, kana bûrita ngûgî noo îrîkû. Îndî jûkagieni ntukû ya sabatû îrî întheru o ta ûrîa ndeerîre biûjûjû bieenu.

²³Îndî bo bataanthikîrîre, nî ka boomîrie mîtwe bararega kûmbathîkîra kana gwîtîkîîria ûritani.

²⁴“Îndî buî bwämbathîkîra na bwarega gûkûrûkîîria mîrigo mpingîroone cia ntûûra îîjî ntukû ya sabatû, ningî bwäjûkagia ntukû ya sabatû îrî întheru bwethîrwa gûtî ngûgî bûkaaritaga,

²⁵rîu anene beenu bakethagîrwa barî na ûnene ta bwa Daudi. Anene bau amwe na atongeeria beenu, na antû ba Juda na barîa batûûraga Jerusalemu bagakûrûkagîîra mpingîroone cia Jerusalemu barî ngaarîîne cia ndwaa na beetithîtie mbarathi. Nayo ntûûra îîjî îgaatûûragwa mwanka kenya.

²⁶Nabo antû baakaumaga ntûûreene cia Juda, na kuuma tûtûûreene tûrîa tûthiûrûkîrîte Jerusalemu. Ningî bakaumaga nthîgûrûûne ya Benjamini, na kuuma mûgwanthîîne na nthîgûrûûne ya irîma na rwanda rwa bwa ûmotho bwa Juda bareetete igongwana bia gwakîîria na igongwana bia irio, na ubaani, na biewa bia gûcokia nkaatho, babireetage nyomba ya MWATHANI.

²⁷Îndî bwarega kûmbathîkîra bûjûkagia ntukû ya sabatû îrî întheru, na bwarega gûkamataga mîrigo bûkûrûka nayo mpingîroone cia Jerusalemu ntukû ya sabatû, naani nkaagwatia mwanki mpingîroone cia Jerusalemu. Nabio ikaro bia anene birîa birî Jerusalemu bikaîîthua, naju mwanki jûu jûtîkarîorua.”