Read KIMERU BIBLE PROTESTANT EDITION Jer 18 Bible Online

Jer 18 - KIMERU BIBLE PROTESTANT EDITION bible

Jer 18

¹MWATHANI nî aambarîîrie ûûni Jeremia arambîîra atîrî,

²“Ithuranîre wîte nyomba ya mûûmbi wa nyongû, naagwe ûrî kûu ngatûma wigue rûteto rwaakwa.”

³Tontû bûû, ndîreeta nyomba ya mûûmbi wa nyongû na ndîramwîthîra akîûmbaga nyongû.

⁴Nyongû îrîa oombaga îrathûûka îrî o njareene. Aramîûmbûra na aroomba nyongû îngî îrîa oonaga yaagîrîte kûûmbwa na ntaka îîu ya yûûmba.

⁵MWATHANI arambarîria arambîîra atîrî,

⁶“Buî antû ba Israeli, ka ûûni ntîûmba kûthithia naabuî ûrîa mûûmbi ûûjû wa nyongû athithia? Atîrî, o ta ûrîa ntaka ya yûûmba îrî njareene cia mûûmbi wa nyongû no ta u buî antû ba Israeli bûrî njareene ciaakwa.

⁷Îgiita kinya rîrîku nkëeja kuuga mantû jegiî mûgongo kinya jûrîkû, kana ûnene kinya bûrîkû atî nkabwinainia mbwaraganie na mbûthirie buru;

⁸naju mûgongo jûu mbarîîtie bwaaju jûgatigana na ûthûûku bwajû; ngaatigana na ûthûûku bûrîa ndîngî kûjûthithîria.

⁹Ningî îgiita kinya rîrîkû nkëeja kuuga mantû jegiî mûgongo kinya jûrîkû, kaana ûnene kinya bûrîkû atî nkaajwaanda na njwake,

¹⁰naju mûgongo jûu kana ûnene bûu, bûkëeja kûthithia ûthûûku mbere yaakwa, jûkarega kûnthikîîra, ngaatigana na wega bûrîa ndîngî kûjûthithîria.

¹¹Tontû bûû, nandî îîra antû ba Juda na barîa batûûraga Jerusalemu ûjû, ‘Ni mbûbangîrîte mûbango jwa kûbûkanûkia. Garûkeeni o muntû atîgane na ûthûûku bwaawe, athongomie mîîtîre yaawe na mathithio jaawe.’

¹²Îndî bo bariuga atîrî, ‘Gûtî gîtûmi gîa kûthithia ûu! Tuî tûkaathithagia mantû ja ûtûrîka na jamathûûku o ûrîa tûkwenda.’”

¹³Tontû bûû, MWATHANI ariuga atîrî, “Ûrithîrieni mîgongoone këethîra kûrî muntû waigua ûntû ta bûu. Antû ba Israeli nî bathithîtie ûntû bûbûthûûku mono.

¹⁴Kûrî rîo nkamia ya Lebanoni îthiraga maigeene ja irîma biaayo? Kûrî rîo tûrûûjî twa mpio tûtigaga kwînama kuuma irîmeene?

¹⁵Îndî antû baakwa bo nî boorîrîîtue nî ni bacoka kwîthagîria mîrungu ya mîng'uanano ubaani. Nî bagiitarîte baatigana na njîra irîa babuîrîte kûthingata, batiga gwîta na njîra irîa cia tene batua gwîtaga na tûjîra twa nchangiri.

¹⁶Nabo nî baethetie nthîgûrû yaao gîntû gîkîthûûku buru, gîntû gîa kûmeneerua mwanka kenya. O muntû wonthe ûrîa ûkûrûkagîîra kîrî yo nî amakaga akainainia kîongo.

¹⁷Naani nkaabanyagia mbere ya anthû baao, o ta ûrîa ruuo rwa bwa gaiti rûnyagagia tîîri. Naani nkaabautatîra, ntîbateethia rîrîa bakeethîrwa barî thîîneene.”

¹⁸Rîu antû barauga atîrî, “Njûûni twîîke nkireba nîûntû bwa Jeremia! Nîkwîthîrwa gûtî rîo Waatho bûkaûra kuumania na athînjîri-Mûrungu, kana kîrîra kîûra kuumania na barîa boome, kana rûteto rûûra kuumania na iroria. Njûûni tûmûthitange tûrege kûthikîîra nteto ciaawe kinya irîkû.”

¹⁹Jeremia araromba arauga atîrî, “Igua îromba rîaakwa itû MWATHANI, thikîîra ûrîa anthû baakwa bakwaria.

²⁰Ka wega bûrîagwa na ûthûûku? Îndî bo no marinya bagûmpînjîra mbûrîra ku. Ririkana ûrîa ndûngamaga mbere yaaku nkîbaaragîîria boona wega nîkenda mûthûûro jwaaku jûtîkaberekere.

²¹Îndî nandî rekeeria aana baao bathirue nî mpara; rekeeria bathirîrue ndweene, na aka baao bakuîrwe nî aana na akûrû baao, batuîke ntigwa. Arûme baao barooragwa nî mîrimo na nthaka ciaao ikathirîrua ndweene.

²²Kîrîro kîroigîîgua nyomba ciaao rîrîa ûkareeta aithûki ntûti îtî thau. Nîkwîthîrwa nî bampînjîrîte marinya na baankûmîra mîtego ngwatwa magûrû.

²³Gwe MWATHANI nî wiijî mîbango yonthe îrîa bambangîrîte ya kûmbûraga. Ûkabarekera maatia jaao kana wangûra meeyia jaao. Ûtûme boombwe buru ûbakanûkie na mûthûûro.”