Read KIMERU BIBLE PROTESTANT EDITION Jer 2 Bible Online

Jer 2 - KIMERU BIBLE PROTESTANT EDITION bible

Jer 2

¹MWATHANI nî aambarîîrie arambîîra

²“Îta warîrie antû ba Jerusalemu ûbeere MWATHANI ariuga ûjû: Nînkûririkana nî waarî mwîtîkua ûrî ûmwîthî, na wendo bwaaku rîrîa waarî mûchiere, ûrîa waanthingataga rwanda gûntû gûtaandwa kaîrî.

³Israeli yaarî întheru kîrî MWATHANI ningî yaarî maciara ja mbere ja maketha jaawe. Nabo bonthe barîa baathûûkagia Israeli ûthûûku nî bwabeejagîîra, nîu MWATHANI akuuga.”

⁴Thikîîreeni bwigue rûteto rwa MWATHANI antû ba mûciî jwa Jakubu, buî mîîrîga yonthe ya Israeli.

⁵MWATHANI ariuga ûjû: “Nî ûthûûku bûrîkû biûjûjû bieenu bioonere kîrî ni, tontû biambîrûkîîre, biratua kûthingataga mantû ja ûtheri na kinya bio biongwa biaa bia ûtheri?

⁶Bio gûtî rîo noo biooria, ‘Arîkû MWATHANI ûrîa waatûritîre nthîgûrû ya Misri? Ûrîa watûtongeererie rwanda, nthîgûrû înjûmo na ya marinya, nthîgûrû ya mpara na mîthangîko, nthîgûrû îtîgiitagîîrwa nî muntû kana noo îtûûrwa nî muntû.’

⁷Nî ni ndaabûreetere nthîgûrû înoru, nîkenda bûgwîrîrua maciara jaayo, na into biaayo bibithongi. Îndî buî rîrîa bwatonyere ku nî bweekîîre nthîgûrû yaakwa mûgiro bwatûma nthîgûrû yaakwa yaa gîntû gîkîthûûku.

⁸Athînjîri-Mûrungu gûtî rîo booria, ‘Nîkû MWATHANI arî?’ Barîa bamenyagîîra Waatho bataambijî. Arîîthi nî baaregere kûmbathîkîra. Nabio iroria biatua kûroragia na Baali biatua kûthingatanaga na mantû jatî umithio.” MWATHANI ariuga atîrî,

⁹“Nkaabûgambithia, ningî ngambithie aana ba aana beenu.

¹⁰Tontû kinya ûkagiitania îria, ûgeeta bwa Saiprasi[2] gûtega bwega kana ûgatûmana Kedari kûthûûja bwega woona gûtî ûntû ta bûu bwakarîka.

¹¹Kûrî mûgongo jwerûkîra mîrungu yaaju jwîta kîrî mîrungu îngî kînya yëethîrwa tî mîrungu ya mma? Îndî antû baakwa nîu beerûkîrîte Mûrungu waao bathingata mîrungu îtî umithio.

¹²Ûrigara gwe îgûrû nîûntû bwa ûntû bûu ûteeteme nî kûmaka,” nîu ûûni MWATHANI kuuga.

¹³“Tontû antû baakwa nî bathithîtie mantû jaîrî jamathûûku mono; najo nî kûmbîrûkîra ni kîthima kîa rûûjî rwa mwoyo; na gûciînjîra ithima bikobokangi bitîûmba gûkara na rûûjî.” MWATHANI ariuga atîrî,

¹⁴“Nîka Israeli îrî nkombo? Nîka îrî nkombo ya gûciarîrwa nja ya muntû tontû anthû baayo bakwenda kûmîthiria?

¹⁵Ngatûnyi injanake nî iruumîte nîûntû bwaayo, ciaruma na kajû gakanene nacio ithûûkîtie nthîgûrû ya Israeli buru; ntûûra ciaayo ciatigwa irî maganjo jatîtûûri.

¹⁶Ningî kinya antû ba Memufisi na Tahapanehesi nî barîîkîtie gûkûrita thirû yaaku.

¹⁷Tî o buî bwingwa bwiretereete mantû jau, na njîra ya kwîrûkîra MWATHANI Mûrungu weenu, o rîrîa we atwîre abûtongeretie na njîra înjega?

¹⁸Nandî gwîta kweenu Misri kûnyua rûûjî rwa Naili, gûkaabûguna atîa? Kana nîatîa bûkaagunwa nî gwîta Asîria kunyua rûûjî rwa Eufurate?

¹⁹Ûthûûku bweenu nîbu bûkaabûkanûkia na gûtiga gwîtîkia Mûrungu kweenu nîku gûkaabûritana. Thûgaanieni bûmenye nî ûntû bûbûthûûku na bwa ûrûrû mono, baabuî kwîrûkîra MWATHANI Mûrungu weenu nîûntû buî bûtînkîraga, nîu ni MWATHANI Mûrungu Mweneinya ndauga.” MWATHANI ariuga atîrî,

²⁰“Nîkwîthîrwa buî nî bwatigîre kûmbathîkîra o tene, gwe ûrauga, ‘Ntîgûtumîkîra!’ Îî, gwe ûringîrîte ûmaraya irîmeene bionthe na rungu rwa mîtî îriibîte yonthe.

²¹Buî ndaabwaandîre bûrî mîzabibû îmîthongi kuumania na mbeeû îrîa njega buru. Nîatîa îndî tontû bûgarûkîte bwacoka kwaa mîzabibû ya kîthaka?

²²Kinya ûkathamba na sabuni kana ûgatumîra sabuni inyingî atîa, no nkoona rûko rwa meeyia jaaku, nîu ni MWATHANI Mûrungu kuuga.

²³Ka-ûûmbîkia kûmbîîra, ‘Ntî na mûgiro, ntathingata mîrungu ya Baali?’ Tega mantû jarîa ûthithîrîtie mîguuruune; ûciûkîrwe nîjo. Ûkari ta nkamîîra nka îgûcwa ndûme.

²⁴Ûkari ta ntigiri ya kîthaka îrîa îkaraga rwanda, rîrîa îrûngami îkîenda ndûme nûû ûûmba kûmîgiria îtîgeete? Ntigiri ndûme îrîa îkûmîenda kinya îtîkaithîînie nîûntû îkamîona îgiita rîaayo rîa kûrûngama rîakinya.

²⁵Weerwa menya wîta mwanka iraatû bithira magûrû, naju mûmero jwaaku jûûmagara nî nyoonta. Gwe ûriuga, ‘Nî ûtheri gûnkaania nîûntû nî mpendeete mîrungu îngî na nîyo nkwenda kûthingata!’

²⁶O ta ûrîa mwamba eekagîrwa nthao agwatwa, nîu antû ba Israeli bageekîrithua nthao, amwe na anene baao, na atongeeria baao, na athînjîri-mûrungu baao, na iroria biaao.

²⁷Tontû bo beeraga mûtî, ‘Nîgwe baaba,’ na bakeera iiga, ‘Nîgwe waanciarîre.’ Nîkwîthîrwa bo bambutatîrîte na batîntegaga na meetho îndî îgiita rîa thîîna, bakambîîra, ‘Njû itû ûtûteethie!’

²⁸Nandî rî, îrîkû mîrungu îîu yaaku îrîa withithîrîtie? Û-nandî nî îîje îgûteethie îgiiteene rîa thîîna. Nîkwîthîrwa gwe Juda o ûrîa ntûûra ciaaku ing'ana, nîu mîrungu yaaku îng'ana.

²⁹Nîmbi îtûmîte bûciindana naani? Buî bwinthe nî bûregeete kûmbathîkîra, nîu ni MWATHANI kuuga.

³⁰Nî ûtheri nkanûkîtie nchiarwa cieenu nîûntû bûu bûtaabateethia. Nchiû cieenu ciongwa nîcio ithirîtie iroria bieenu o ta ûrîa ngatûnyi îthiranagia.

³¹Buî rûrîîjo rwa Israeli, thikîîreeni rûteto rwa MWATHANI. Nîka nkarîte ta rwanda kîrî antû ba Israeli kana ta nthîgûrû ya muundu kîrî bo? Nîkî îndî antû baakwa bakuuga, ‘Ga tûkathithagia ûrîa tûkwenda, tûtîcoka kîrî we kaîrî?’

³²Mwarî karaiti oomba kûûrîrua nî into bia kwigemia nabio? Kana mûiki oorîrua nî nguû ciaawe cia mûranû? Antû baakwa bo bantiganîrîtie matukû jamaingî mma kinya jatîûmba gûtarîka.

³³Gwe nî wiijî gûcwa anyaanya baaku na kinya aka barîa baaî nî ûbaritanaga mîîtîre yaaku.

³⁴Nguû ciaaku irî na tharike ya nkîa îtî na maatia, antû ciîthîrwa îrî na tharike ya atunyani. Ûthithagia mantû jau jonthe,

³⁵ûgacoka kuuga ‘Ntî na maatia; na nî mma mûthûûro jwaawe jûtîntûrîkîra.’ Atîrî, ngaakûgambithia nîûntû bwa kuuga ‘Ntîthithîtie wîyia.’

³⁶Nîkî tontû wendaga kûgarûra mîîtîre yaaku ûjû? Ûgeekîrithua nthao nî Misri, o ta ûrîa weekîrithîrue nthao nî Asîria.

³⁷Îî, ûkauma gûntû kûu wînîkîte mûtwe nî nthao. Nîkwîthîrwa MWATHANI nî areganîte na barîa wîtîkîtie mono, na ningî mîgongo îîu îtîkûguna noo atîa.”