Read KIMERU BIBLE PROTESTANT EDITION Jer 20 Bible Online

Jer 20 - KIMERU BIBLE PROTESTANT EDITION bible

Jer 20

¹Pashuri mûtaana wa Imeri nîwe waarî mûthînjîri-Mûrungu ûrîa waarûngamîrîte kîûrû. We nî aaigîrue Jeremia akîroria mantû jau.

²Pashuri nî aaûrithîrie kîroria Jeremia na aramûtheekithia ikongoroone[3] birîa biaarî mpingîroone ya Benjamini ya rûgûrû kîûrûûne.

³Rûûneene rîrîa Pashuri aarekererie Jeremia kuuma au atheeki, Jeremia nî aamwîrîre atîrî, “MWATHANI atîkwenda gûgwîta Pashuri îndî arîgwîta ‘Kîmakania gîa nteere cionthe.’”

⁴Nîkwîthîrwa MWATHANI ariuga atîrî, “Ngaatûma wee kîmakania kîrî gwe gwengwa na kîrî acoore baaku bonthe. Bo bakooragîrwa ndweene nî anthû baao ûtegeete. Ningî nkaanenkanîra Juda yonthe kîrî mûnene wa Babiloni. Akaabajûkia barî atae abaikie kîthamîrioone Babiloni na abooragîre ku.

⁵Nkûrûki ya jau, nkaanenkanîra ûtonga bwa ntûûra bunthe, na mpongeeri cionthe irîa yoonaga, na into biaayo bia goro bionthe, na mîthithû yonthe ya anene ba Juda, kîrî anthû baao. Nabo anthû bagaataa into biaao, na babagwate babaikie Babiloni.

⁶Naagwe Pashuri na bonthe barîa batwîre nja yaaku bûgaikua Babiloni kîthamîrioone. Kûu nîku ûgaakuîra amwe na acoore baaku barîa ûroragîria ûrongo, na nîku bûkaathikwa.”

⁷Gwe itû MWATHANI nî ûmpaîîrîtie naani ndaîîrîka. Gwe nîgwe ûrî inya nkûrûki yaakwa na nî ûmpûmbîte. Nî mpeete gîntû gîa gûtinda kûthekerwa antû bonthe no kûnthekera.

⁸Nîkwîthîrwa rîrîa nkwaria mbaragia na kajû gakanene. “Gûkeethîrwa kûrî na kwînyangua na kûthirua buru.” Îndî rûteto rwa MWATHANI nîru rûtûmîte menwa na ntindaga kûthekerwa.

⁹Naani ndauga, “Ntîgweta MWATHANI kaîrî, kana mbaria mantû riîtweene rîaawe,” nteto ciaaku ikaraga ta mwanki jûgwakana nkoroone yaakwa na marûitûûne jaakwa. Naani ngeragia mono gûciîka ndeene yaakwa îndî ntîûmbaga.

¹⁰Nî mbigîîtue gûkîarua na kîoe atî nteere cionthe kûrî na imakania! “Tûmûthitangeeni kîrî atongeeria.” Kinya acoore baakwa bonthe Ka beetereete boona nkîgwa. Bariuga, “Kwombîka akaaîrua naatuî tûkamûgwatithania, tûkairîîria.”

¹¹Îndî MWATHANI arî amwe naani nawe nî nchamba îtîûmîîrîka. Tontû bûû, anyamaaria bagaatirikama na batîmpûûmba. Bagacokerwa nî nthao mono nîûntû batîûmbana. Nacio nthao iu ciaao itîkoroorîria igakara o mwanka kenya.

¹²Gwe MWATHANI Mweneinya gwe ûgeragia barîa baagîru, gwe woonaga jarîa jarî nkoroone na mathûgaanioone, tûma mbone ûkirîîria kîrî anthû baakwa, nîkwîthîrwa nî nkûnenkerete mantû jaakwa jonthe.

¹³Inîreeni MWATHANI, kumieni MWATHANI, nîkwîthîrwa nî atunyûkîîtie barîa bainyîîrîîtue kuuma kîrî barîa baaî.

¹⁴ Ntukû nî îndume îrîa ndaaciarîrwe! Ntukû îrîa maama aanciarîre, îkorootharimwa.

¹⁵Arî na kîrumi muntû ûrîa wareeteere baaba nteto aramwîra, “Ûgûciarîrwa kaîjî,” aratûma agwîrua mono.

¹⁶Muntû ûu, arokara ta ntûûra irîa MWATHANI aathirîrie atî na kîaao. Aroigagua kajû ga kîrîro rûkîîrî na mûthenya akaigua gîtuma kîa ndwaa.

¹⁷Nîkwîthîrwa atambûragîre mbere ya ûûni nchiarwa; maama nîwe ûrîngî kwîthîrwa arî mbîrîra yaakwa, naani ngakara ndî kîu kîaawe kenya na kenya.

¹⁸Nîmbi yaatûmîre mpuuma kîu kîa maama mbîja kûrîîjaga thîîna na kûgîîjaga kîeba na ntûûraga ûtûûro bwa nthao?