Read KIMERU BIBLE PROTESTANT EDITION Jer 22 Bible Online

Jer 22 - KIMERU BIBLE PROTESTANT EDITION bible

Jer 22

¹MWATHANI nî aambarîîrie ûûni Jeremia arambîîra atîrî, “Îta nja ya mûnene wa Juda uuge nteto iji:

²Thikîîra rûteto rwa MWATHANI gwe wa rûrîîjo rwa Daudi, gwe waathaga Juda. Ûthikîîre gwe na nthûûmba ciaaku, na antû baaku barîa bakûrûkaga na mpingîro îîjî.

³MWATHANI arîbwîra atîrî, thithagieni mantû ja îota na mantû jarîa jaagîrîte. Bûtunyûkagie barîa baithûkîri baatunywa into biaao. Bûbatunyûkagie kuuma kîrî barîa babainyagîîria. Ningî bûkáthithîria mûgeni, kana aana barîa batî na aciari, kana ntigwa ûntû bûbûthûûku bûtîagîrîte, kana bûûraga muntû ûtî na yaatia, gûntû gûkû.

⁴Bwathithia ûu bwathîkîra rûteto rwaakwa, bûkethagîrwa bûrî na anene ba rûrîîjo rwa Daudi ba kûbwathaga. Nabo bagaakûrûkagîîra mpingîroone cia gîkaro kîa mûnene barî ngaarîîne cia ndwaa barî mbarathine, amwe na atongeeria bangî, na antû baao.

⁵ Îndî bwarega kûthithia mantû jau, ûûni MWATHANI nî ngûciîtia atî gîkaro gîkî kîa mûnene gîkaathirua buru nîu MWATHANI akuuga.”

⁶MWATHANI ariuga ûjû mantûûne jegiî gîkaro kîa mûnene wa Juda: “Gîkaro kîa mûnene wa Juda nî kîu kîthongi ta nthîgûrû ya Gileadi kana tûthûmbî twa irîma bia Lebanoni. Amwe na jau ngatûma gîkare ta rwanda gûntû gûtîtûûri nî antû.

⁷Ngaatûma aithûki beeje baithûkîre ntûûra îîjî, bonthe barî na mathaga jaao ja ndwaa. Nabo bakaarîîka mîtarakwa îrîa mîega bamîgere mwankiine.

⁸“Nabo antû ba mîgongo îmiingî bakûrûkîrîîte aja ntûûreene îîjî bagatua kûûranagia, ‘Nîkî tontû MWATHANI athithîrîtie ntûûra îîjî nene mantû jaja?’

⁹Nabo antû bangî bakabacokagîria, ‘Tontû nî beerûkîîre kîrîkanîro kîa MWATHANI Mûrungu waao nabo batua gûtumîkagîra na kûthaathagia mîrungu ya mîng'uanano.’”

¹⁰Bûkárîrîra muntû ûkuîte[4] kana bwithikîîra nîûntû bwaawe; îndî rîreeni mono nîûntû bwa ûrîa wikîîtue kîthamîrioone[5] nîkwîthîrwa atîkorocoka kaîrî kwona nthîgûrû yaao îrîa aciarîri.

¹¹ Nîkwîthîrwa MWATHANI ariuga ûjû nîûntû bwa Jehoahazi[6] ûrîa ûkwaathana antûûne a îthe Josia. Josia ûrîa waumîre gûntû gûkû. “Josia atîcoka gûkû kaîrî.

¹²Îndî agaakuîra gûntû kûrîa bamûthamîrîtie arî mûtae, nawe atîcoka kwona nthîgûrû îîjî kaîrî.”

¹³“Wûi kîrî muntû ûrîa waakaga nyomba yaawe kuumania na waayia, na agaaka tûnyomba twa ngoroba kuumania na ûtuunyani. We ûritithagia antû bangî ngûgî gûtîkîo bakwona kana abarîaa mûchaara.

¹⁴We aciîraga, ‘Ngaciakîra nyomba înene, îrî tûnyomba twa îgûrû tûtûnene.’ We amîthithagîria ndiricha, na akamîgemia na mbaaû cia mîtarakwa, na akamîaka rangi întuune.

¹⁵Ûrîthûgaania waaka nyomba na mîtarakwa nîku kwaa mûnene? Ka-abaagu ataarîjaga na akanyua o akîthithagia mantû ja îota na jarîa ja waagîru? We aatûûraga bwega mono.

¹⁶We aagiitagîra nkîa na barîa barî ûbatu magamba bwega, mantû jaawe jaakaraga bwega. Anga kûu tî ku kûmenya MWATHANI? Ûu nîu ûûni MWATHANI nkûûria.

¹⁷Îndî gwe ûrîona na kûthûgaanîria mantû jaaku akî; ûrîa ûkoona into na njîra itî cia mma, na njîra ya kûûraga antû batî na maatia, na kwinyîîria bangî na gûtuunyana.”

¹⁸ Tontû bûû, MWATHANI ariuga ûjû mantûûne jegiî Jehoiakimu mûnene wa Juda, mûtaana wa Josia: “Antû batîmûrîrîra bauga, ‘Wûi mûtaana wa chiaa’ kana ‘Wûi mwarî wa chiaa.’ Ningî batîmûrîrîra bauga, ‘Wûi mwathi waakwa,’ kana ‘Wûi mûnene waakwa.’

¹⁹Agaakururua ateewe oome ya ntûûra ya Jerusalemu athikwe ta kiimba gîa ntigiri.”

²⁰“Buî antû ba Jerusalemu îteeni bûkarîre bûrî Lebanoni, bûûkîîrie tûjû bûrî Bashani, na bûrîre bûrî irîmeene bia Moabu nîkwîthîrwa acoore beenu bonthe nî bathirîtue.

²¹Ndaabwarîîrie bûthinyarîte naabuî bûrauga, ‘Tûtîthikîîra!’ Ûu nîu bûtwîre bûkîthithagia kuuma wîthî bweenu bûtîathîkagîra kajû gaakwa.

²²Atongeeria beenu bakauruutwa nî ruuo, amwe na acoore beenu, baikue kîthamîrioone. Rîu nîrîo bûgaacokerwa nî nthao bûrigare nîûntû bwa ûthûûku bweenu bunthe.

²³Wûi gwe ûkaraga kiindajî nyomba îmbake na mîtarakwa ya Lebanoni, rîrîa ûkagwatwa nî rwakaî ûgaikaîra o ta mûka ûkweewa mwana!”

²⁴ MWATHANI ariuga atîrî, “Nî ngûciîtia ni Mûrungu ûrîa ûtwîre mwoyo atî, kinya këethîra Jehoiakini mûnene wa Juda, mûtaana wa Jehoiakimu, nîwe kîmata kîrî na mûûri kîrî kîareene gîaakwa, nîka mûrita nkamûta.

²⁵Nkaamûnenkanîra njareene cia barîa bacwaga kûmûraga, barîa akîraga, nkaamûnenkanîra kîrî Nebukadineza mûnene wa Babiloni na kîrî Ababiloni.

²⁶Ûûgwe na nyakwe ûrîa wagûciarîre nkaabûta nthîgûrûûne îngî îrîa bûtîciarîri, na kûu nîku bûgaakuîra.

²⁷Îndî bûtîkorocoka nthîgûrûûne îrîa bûkeethîrwa bûnyonterete gûcoka.” Naani Jeremia ndîrooria atîrî,

²⁸“Nîka muntû ûûjû Jehoiakini[7] akari ta nyongû îkuîte? Akara ta gîntû gûtî muntû ûkwenda gûgîtumîra? Nîmbi îtûmîte we na aana baawe bakuruthûrwa batewa nthîgûrû batiijî?

²⁹Îî nthîgûrû, îî gwe nthîgûrû, nthîgûrû ya Juda thikîîra rûteto rwa MWATHANI.”

³⁰MWATHANI ariuga ûjû: “Andîka mantû ja muntû ûûjû ûkari ta muntû ûtî mwana muntû gûtî rîo akoombana ûtûûroone bwaawe bunthe nîûntû gûtî wa nchiarwa ciaawe ûkoombana aa mûnene atua kwathaga Juda ta Daudi.”