Read KIMERU BIBLE PROTESTANT EDITION Jer 23 Bible Online

Jer 23 - KIMERU BIBLE PROTESTANT EDITION bible

Jer 23

¹MWATHANI nî augîre atîrî, “Wûi kîrî arîîthi barîa booragaga na kûnyagia ng'ondu cia ndîîthia yaakwa!”

²Tontû bûû, MWATHANI Mûrungu wa Israeli ariuga ûjû mantû jegiî arîîthi barîa barîîthagia antû baawe: “Buî bûnyagîîtie ng'ondu ciaakwa bwaciîngîîria kîthakeene na bûtiimenyagîîra. Atîrî, nkaabûkanûkia nîûntû bwa mathithio jeenu jamathûûku, nîu ûûni MWATHANI nkuuga.

³Ningî naani nkoothûrania matigari ja ng'ondu ciaakwa kuuma nthîgûrûûne cionthe kûrîa nciîngîîrîtie, ncicokie nkanateene ciaacio. Nacio igaciaarana ithegee mono.

⁴Ncoke nthuure arîîthi ba kûmenyagîîra ng'ondu iu. Nacio ng'ondu itîkîra kaîrî, kana imakua, kana noo îmwe yûûra, nîu ûûni MWATHANI nkuuga.

⁵ “Atîrî, îgiita nî rîîjîte rîrîa nkaathuura ûmwe wa nchiarwa cia Daudi, ae mûnene. Mûnene ûu akaathanaga na ûûme na agitanagîre magamba nthîgûrûûne na îota na waagîru.

⁶Rîrîa akeethîrwa akîathanaga, Juda îkoonokua, na Israeli îtûûre na thîîrî. We agatua gwîtagwa, ‘MWATHANI nîwe ûtûgambagîra na îota.’”

⁷Tontû bûû, rî, MWATHANI ariuga atîrî, “Îgiita nî rîîjîte rîrîa antû bagaatiga gûciîtagia bakiugaga, ‘Nî ngûciîtia riîtweene rîa MWATHANI ûrîa ûrî mwoyo, ûrîa waaritîre antû ba Israeli kuuma nthîgûrûûne ya Misri.’

⁸Îndî bagaatua gûciîtagia bakiugaga atîrî, ‘Nî ngûciîtia riîtweene rîa MWATHANI ûrîa ûrî mwoyo, ûrîa waaritîre antû ba Israeli kuuma nthîgûrû ya bwa ûrîo na kuuma nthîgûrû cionthe irîa aabanyaganîtie.’ Rîu antû ba Israeli bagaakara nthîgûrûûne yaao.”

⁹Nkoro yaakwa nî yaagîte inya buru nîûntû bwa iroria, na kinya marûitû jaakwa jonthe jainaina. Nkarîte ta muntû woogiti, ta muntû woogitîîtue nî ndibei nîûntû bwa MWATHANI na nteto ciaawe intheru.

¹⁰Nîkwîthîrwa nthîgûrû yûjûrîte antû batîîtîkîtie na nîûntû bwa kîrumi kîa MWATHANI. Nthîgûrû nî kîrîroone îrî na ithaka bia kûrîîthia rwanda bioma buru. Antû batwîre ûtûûro bûbûûî na batumagîra inya yaao ûrîa gûtîagîrîte.

¹¹MWATHANI ariuga atîrî, “Iroria amwe na athînjîri-Mûrungu bonthe nî batigîte kûnthaathayia na kinya kîûrûûne gîaakwa kîongwa nî mboneete bakîthithîria ûthûûku ku.” Nîu ûûni MWATHANI nkuuga.

¹²Tontû bûû, njîra ciaao igakara ta njîra intenderu muunduune nabo bakeengîîrwa ku na bakagûjaga. Nîkwîthîrwa nkabaretera ûthûûku mbakanûkie îgiita rîaao rîakinya. Nîu ûûni MWATHANI nkuuga.

¹³“Nî mboneete ûntû bûbûthûûku mono kîrî iroria bia Samaria. Biroragia na mûrungu jwa mûng'uanano jwa Baali, bigaatithia antû baakwa ba Israeli njîra.

¹⁴ Ningî kîrî iroria bia Jerusalemu nî mboneete ûntû bûbûthûûku nkûrûki. Iroria biu bithithagia ûthûngîîri na kwaria ûrongo na gûteethia barîa bathithagia ûthûûku mwanka gûkeethîrwa gûtî muntû ûgaatigana na ûthûûku bwaawe. Bonthe meethoone jaakwa bakari ta antû ba Sodomu, barîa batwîre nthîgûrûûne, kana barîa batwîre Gomora.”

¹⁵Tontû bûû, MWATHANI Mweneinya ariuga ûjû mantû jegiî iroria, “Atîrî, Ngatûma barîa biakûrîa bibithûûku na banyua rûûjî rûrî na ûrogi. Nîkwîthîrwa antû baregeete gwîtîkia Mûrungu nthîgûrûûne kunthe nîûntû bwa iroria bia Jerusalemu.”

¹⁶Rîu MWATHANI Mweneinya ariuga atîrî, “Bûkáthikîîreeni nteto irîa iroria bikûbûroreria, bikîbwîkagîra wîrîgîîro bwa ûtheri. Biaragia mantû jarîa mîtwe yaabio biongwa îbiîrîte îndî tî jarîa biîri nî MWATHANI.

¹⁷Bikaraga bikîîraga antû barîa bamenagîîria rûteto rwa MWATHANI rîonthe, ‘Mantû jeenu jakaabua.’ Bikeera barîa boomîtie nkoro ciaao na bathingataga mathûgaanio jaao bongwa, ‘Gûtî ûthûûku bûkabwîjîîra.’

¹⁸Tontû rî, nî ûrîkû waabio waamenya mathûgaanio ja MWATHANI aigua na amenya rûteto rwaawe? Kana nûû waabio waigua rûteto rwa MWATHANI na arwathîkîra?

¹⁹Atîrî, mûthûûro jwa MWATHANI tîju jûu jûkari ta ngai înene ta kîbubani gîkuurutana gîkaringa barîa baaî.

²⁰Naju mûthûûro jwa MWATHANI jûtîthira mwanka athithie na oojûrie ûrîa athûgaanîtie; naabuî bûkaamenya mantû jau bwega rîrîa rîkeeja.

²¹Ni gûtî rîo ndaatûma iroria îndî bio bimaatûkaga kuuga nteto. Kinya këethîra ntaabiarîria, bio no biroragia riîtweene rîaakwa.

²²Îndî këethîra nî biijî mathûgaanio jaakwa birîngî kwîra antû baakwa nteto ciaakwa. Birîngî kûbagarûra bakauma mîtîreene yaao îmîthûûku na bagatiga mathithio jaao jamathûûku.

²³“Nika ndî Mûrungu ûrî akuî naabuî kana ka ndî Mûrungu ûrî kûraaja naabuî? Nîu MWATHANI akuuria.

²⁴Muntû oomba gwiciitha nkaremwa nî kûmwona? Anga ni ntî kunthe îgûrû na nthî? Nîu MWATHANI akûûria.

²⁵Nî ndîîkîîtie kwigua ûrîa iroria biroretie ûrongo riîtweene rîaakwa bikîîraga antû nî birootete irooto.

²⁶Nî mwanka rî bigakara bikîroragia mantû jaao jarîa bithûgaanîrîtie biongwa?

²⁷Iroria biu bithûgaanagia atî biera antû irooto biu, antû bakoorîrua nî ni, o ta ûrîa biûjûjû biaao bioorîîrue biratua kûthaathagia mûrungu jwa mûng'uanano jwa Baali.

²⁸Kîroria kîrîa gîkwenda kwîrana irooto biaakîo nî kîîrane, îndî kîroria kîrîa gîkûmenya nteto ciaakwa nî kîîrane cio na njîra ya gwîtîkîka. Tontû ûûni MWATHANI ndiuga atîrî, ga gûtî mwanya jwa rûûa na nkano?

²⁹Anga rûteto rwaakwa rûtîkari ta mwanki na ta nyondo îrîa yûûraga maiga jakathuthurûka? Nîu ûûni MWATHANI nkûûria.

³⁰Tontû bûû, rî, ni MWATHANI nî ndeganîte na iroria birîa biaragia nteto ciaakwa irîa biigîîtue kuuma kîrî iroria bingî.

³¹Atîrî, nî ndeganîte na iroria birîa biaragia nteto ciaabio biongwa rîu bikauga, uu nîu MWATHANI akuuga.

³²Ningî rî, nî ndeganîte na iroria bionthe birîa biîranaga irooto bia ûrongo, na bikaîria antû baakwa na kûbaatithia njîra, o rîrîa ni ntîbitûmîte kana mbiarîria. Bio gûtî u bigunaga antû baba. Nîu ûûni MWATHANI nkuuga.”

³³MWATHANI nî aarîîrie Jeremia aramwîra atîrî, “Rîrîa ûmwe wa antû baba, kana kîroria, kana mûthînjîri-Mûrungu agaakûûria ‘Nîatia MWATHANI augîîte?’ Naagwe ûmûcokerie ûmwîre atîrî, ‘Buî bûrî mûrigo kîrî MWATHANI, nawe akaabûringa nthî. Nîu MWATHANI akuuga.’

³⁴Ningî kîroria, kana mûthînjîri-Mûrungu, kana ûmwe wa kîrîndî akëeja kuuga biugo bibi, ‘Ndî na rûteto rwa MWATHANI,’ muntû ûu nkaamûkanûkia amwe na nja yaawe.

³⁵Naagwe wîre antû ûjû, muntû nî ooragie mûtûûri waawe kana mûtaana wa ng'ina atîrî, ‘MWATHANI atwîrîte atîa?’ Kana ‘Nî macokio jarîkû atweete?’

³⁶Îndî bûkorogweta kaîrî biugo bibi, ‘Ndî na rûteto rwa MWATHANI,’ nîûntû muntû ûrîa ûkabigweta, ngatûma rûteto rwaakwa rwee mûrigo kîrî we. Nîkwîthîrwa buî nî bûkaraga bûkîgarûraga na kûthûûkia rûteto rwa Mûrungu ûrîa ûrî mwoyo, MWATHANI Mweneinya, Mûrungu weenu.

³⁷Naagwe ûûragie iroria atîrî, ‘MWATHANI abuîrîte atîa? Kana nî macokio jarîkû abweete?’

³⁸Bo bauga biugo bibi, ‘Tûrî na rûteto rwa MWATHANI,’ ûbeere MWATHANI ariuga ûjû, ‘Tontû bûkuuga biugo: Tûrî na rûteto rwa MWATHANI,’ o rîrîa mbiîrîte bikabigweta,

³⁹nî mma nkaabookîîria mbate kûraaja kuuma kîrî ni; bo amwe na ntûûra îrîa ndaaeete biûjûjû biaao.

⁴⁰Ningî nkabiîkîra nthao irîa itîkorothira, na bigîe îgi rîrîa rîtîkoroûrîria kinya rî.”