Read KIMERU BIBLE PROTESTANT EDITION Jer 24 Bible Online

Jer 24 - KIMERU BIBLE PROTESTANT EDITION bible

Jer 24

¹ Nebukadineza mûnene wa Babiloni nî aajûkîrie Jehoiakini mûnene wa Juda mûtaana wa Jehoiakimu kuuma Jerusalemu, amwe na atongeeria ba Juda, na atîa na aturi arabaikia kîthamîrioone Babiloni. Nyuma ya ûu MWATHANI nî aambonerie ikabû biîrî biaarî na nkûû biîki au mbere ya kîûrû.

²Gîkabû kîmwe kîaarî na nkûû inthongi mono, ciaakari ta nkûû irîa iguundaga mbere. Îndî gîkabû kîngî kîaarî na nkûû inthûûku buru, ûntû itîngîrîîka.

³MWATHANI arambûûria atîrî, “Nîmbi ûkwona Jeremia?” Naani ndîramwîra, “Ndîona nkûû. Nkûû irîa nthongi nî inthongi mono, na nkûû nthûûku nî inthûûku buru ûntû itîûmba kûrîîka.”

⁴MWATHANI nî aambarîîrie arambîîra atîrî,

⁵“Ûûni MWATHANI Mûrungu wa Israeli ndiuga ûjû: Antû barîa baataîrwe kuuma nthîgûrû ya Juda baraikua Babiloni bakari ta nkûû iji nthongi.

⁶Nkaabamenyagîîra bwega na mbacokie nthîgûrû îîjî. Nkaabaaka na ntîbatharia. Nkaabaanda na ntîbakûûra.

⁷Ngaatûma bamenye atî ni, nî ni MWATHANI. Nabo bakaa antû baakwa naani nkaa Mûrungu waao, nîkwîthîrwa bagaacoka kîrî ni buru.

⁸“Îndî Zedekia mûnene wa Juda, na atongeeria baawe, na antû ba Jerusalemu barîa batigeere nthîgûrûûne ya Juda na barîa batwîre nthîgûrû ya Misri, nkabathithîria o ta ûrîa nkûû irîa nthûûku buru ithithagîrua.

⁹Naani nkaabaethia gîntû gîkîthûûku mono meethoone ja mîgongo îngî yonthe ya nthîgûrû na bae gîntû gîa kûmenagîîrua, na gîa gûkurungagwa na gîa gûcikûûragwa, na bae antû ba kûrumagwa gûntû kunthe kûrîa nkaabeengîîria.

¹⁰Ningî ngatûma bathirue nî ndwaa, na mpara, na mîrimo îmîthûûku mwanka bathirue buru kuuma nthîgûrûûne îrîa ndaabaeere na ndîraa biûjûjû biaao.”