Read KIMERU BIBLE PROTESTANT EDITION Jer 25 Bible Online

Jer 25 - KIMERU BIBLE PROTESTANT EDITION bible

Jer 25

¹ MWATHANI nî aarîîrie Jeremia mwakeene jwa îna jwa waathani bwa Jehoiakimu mûnene wa Juda, mûtaana wa Josia mantûûne jegiî antû ba Juda bonthe. Mwaka jûu nîju jwaarî jwa mbere jwa waathani bwa Nebukadineza mûnene wa Babiloni.

²Nacio nteto iu nîcio irîa kîroria Jeremia aarîîrie antû ba Juda na barîa batûûraga Jerusalemu bonthe arabeera atîrî,

³“Mîaka mîrongo îîrî na îthatû nî îthirîte, kuuma mwakeene jwa îkûmi na îthatû jwa waathani bwa Josia mûnene wa Juda mûtaana wa Amoni mwanka naarua tûrî. Îgiita rîu MWATHANI atwîre kûmbarîria, naani nî mbwîraga ûrîa auga magiita jonthe, îndî buî bûtîthikagîîra.

⁴Kinya këethîra MWATHANI nî abûtûmagîra nthûûmba ciaawe iroria magiita jonthe, bûtîthikagîîra kana bwathîka.”

⁵Iroria biu nabio bibwîraga, “Itû garûkeeni bwinthe bûtigane na mîîtîre yeenu îmîthûûku na bûtige kûthithagia mantû jamaaî, nîkenda bwîta na mbere gûtûûra nthîgûrû îrîa MWATHANI aabwere na araa biûjûjû bieenu kuuma tene mwanka kenya na kenya.

⁶Tigeeni kûthingataga mîrungu îngî. Bûkámîtumîkîra kana bûmîthaathayia, bûnthûûria bûkîrombaga into birîa bithithîtue nî antû. Rîu naani gûtî ûthûûku nkaabûthithîria.”

⁷Îndî MWATHANI ariuga, buî bûtîmûthikagîîra, no kûmûthûûria bûmûthûûragia na kûthaathayia into birîa bithithîtue nî antû, naabuî bûkaireeteera îkanûkia.

⁸“Tontû bûû, MWATHANI Mweneinya ariuga atîrî, Nîkwîthîrwa nî bûregeete kwathîkîra nteto ciaakwa,

⁹naani rî, ngaatûmanîra antû ba bwa ûrîo bonthe, na ntûmanîre nthûûmba yaakwa Nebukadineza mûnene wa Babiloni. Bonthe mbareete baithûkîre nthîgûrû îîjî na barîa batûûraga ku, na mîgongo îrîa yonthe îbathiûrûkîrîte. Nkaabathiria buru bae ta gîntû gîkîthûûku gîa kûmenagîîrua, na mbeekîre îgi rîtîkorothira.

¹⁰ Ningî rî, ngaakiria kajû ga nkerû, na ga kûgwîrua. Nkirie kajû ga gûkûngwîra mambura ja mûranû. Gûtîîthîrwa kûrî na gîa kûthia kana maguta ja taa kwîthîrwa kûrî na weerû.

¹¹ Nthîgûrû îîjî yonthe îkaa îgaanjo gûntû gûtîtûûri na nthîgûrû iu ingî igaatumîkîra mûnene wa Babiloni mîaka mîrongo mûgwanja.

¹²Nayo mîaka mîrongo mûgwanja yaathira, ngaakanûkia mûnene wa Babiloni na antû ba mûgongo jwa Babiloni nîûntû bwa meeyia jaao. Naani nkaathiria nthîgûrû îîu mîethie maganjo kenya. Nîu ûûni MWATHANI nkuuga.

¹³Naani ngatûma mantû jonthe jarîa mbarîîtie jegiî nthîgûrû îîu, na jarîa jonthe jaandîki yukuune rîrî jarîa Jeremia aarorerie jegiî mîgongo yonthe joojûre.

¹⁴Nîkwîthîrwa nkaarîaa antû ba Babiloni nîûntû bwa mantû jarîa bathithîtie. Nabo bakaaeethua nkombo nî mîgongo îngî amwe na anene baayo.”

¹⁵MWATHANI Mûrungu wa Israeli nî aambîrîre atîrî, “Jûkia gîkombe kîrîa ngweete kîa ndibei ya mûthûûro jwaakwa, ûnyuithie mîgongo yonthe îrîa ngaagûtûma kîrî yo.

¹⁶Nabo baanyua bakoogita batang'atang'e bathûûke mîtwe nîûntû bwa ndwaa îrîa mbîtîte kûbareetera.”

¹⁷Rîu naani ndîrajûkia gîkombe kîrîa kîaarî njareene ya MWATHANI ndîranyuithia mîgongo yonthe îrîa MWATHANI aantûmîte kîrî yo.

¹⁸Ndîranyuithia Jerusalemu, na ntûûra cia Juda, na anene baacio, na atongeeria baacio, nîkenda mbaeethia gîntû gîkîthûûku, na nkorogoncha, na gîa kûmeneerua, na gîkîrume, o ta ûrîa gûkari kinya naarua tûrî.

¹⁹Ningî ndîranyuithia Farao mûnene wa Misri, na barîa baamûtumîkagîra, na atongeeria baawe, na antû baawe bonthe,

²⁰na ageni bonthe barîa batûûraga gatîgatîîne kaao. Ndîracoka ndîranyuithia anene bonthe ba nthîgûrû ya Uzi, na anene bonthe ba nthîgûrû ya Afilisti ba ntûûra ya Ashikeloni, na ya Gaza, na ya Ekironi, na barîa baatigeere ntûûreene ya Ashidodi.

²¹Ningî ndîranyuithia antû ba Edomu, na ba Moabu, na nchiarwa cia Amoni.

²²Ndîranyuithia anene bonthe ba Tiro, na anene bonthe ba Sidoni, na anene ba nthîgûrû cionthe irîa irî rûteere rwa îria rîa Mediterania.

²³Ndîracoka ndîranyuithia ntûûra ya Dedani, na ya Tema, na ya Buzi, na barîa bonthe beenjaga mîthia ya mîtuundu yaao.

²⁴Ndîranyuithia anene bonthe ba Arabia, na anene bonthe ba mîgongo îrîa yungene îrîa îtûûraga rwanda.

²⁵Ndîracoka ndîranyuithia anene ba Zimuri bonthe, na anene ba Elamu bonthe, na anene ba Media bonthe.

²⁶Ningî ndîranyuithia anene ba bwa ûrîo bonthe; ba akuî na ba kûraaja, bathingateene. Ndîranyuithia moonene jonthe ja nthîgûrû. Nyuma ya bau, kinya mûnene wa Babeli akanyuithua.

²⁷MWATHANI aracoka arambîîra atîrî, “Îîra antû ûjû: Ni MWATHANI Mweneinya, Mûrungu wa Israeli ndiuga ûjû: Nyueni mûthûûro jwaakwa, mwanka bwogite na bûtaîke, bûgwe nthî bûremwe nî gûûkîîra kaîrî, nîûntû nî mbûreeterete ndwaa.

²⁸“Nabo barega kûjûkia gîkombe kîa mûthûûro jwaakwa kîrîa ûkaabanenkera, rîu ûbeere ûjû: Ûûni MWATHANI Mweneinya ndiuga atîrî, no mwanka bûnyue.

²⁹Nîkwîthîrwa rî, ni ndeeteereete ntûûra ya Jerusalemu îrîa îgwetanagîrua na riîtwa rîaakwa thîîna. Nîka bûkûthûgaania buî bûtîkanûkua? Bûtîkara bûtîkanûkîtue nîûntû nî ndeeteereete antû barîa batwîre nthîgûrû kûnthe ndwaa, nîu ûûni MWATHANI Mweneinya nkuuga.

³⁰Tontû bûû, ûbarorerie nteto iji ûbeere atîrî, ‘MWATHANI akaagondoka kuuma îgûrû arî gîkaroone kîaawe gîkîtheru, agatûma kajû kaawe kaigiigue. Akaagondokera ndîîthia yaawe aringe gîtuma ta gîa akinyangi ba nzabibû. Nabo bonthe barîa batwîre nthîgûrûûne bakamwigua.

³¹Kajû kaawe nako gakaigîîgua mwanka mîthia ya nthî, nîkwîthîrwa MWATHANI arî na îgamba na mîgongo, na akaagambithia antû bonthe, na barîa baaî abatuîre kûûragwa, nîu ûûni MWATHANI nkuuga.’”

³²MWATHANI Mweneinya ariuga ûjû: “Atîrî, ûthûûku bûgûtaamba kuuma nthîgûrû îmwe gwîta îngî na kîbubani gîkînene nî gîkuurutana kiumîte mîthieene ya nthîgûrû.

³³Nabo antû barîa MWATHANI akooraga ntukû îîu, bakoojûra nthîgûrû kunthe kuuma mûthia jûmwe jwa nthî gwîta jûngî. Nabo batîona wa kûbarîrîra, kana wa kûboothûrania, kana wa kûbathika. Nabo batîona biimba biaao bikoojûra nthîgûrûûne kunthe ta ûrîa ntaka yûûjûraga kunthe.

³⁴Ugeeni mbu buî arîîthi naabuî atongeeria ba ndîîthia bûrîre na bwigaragarie mûjuune. Nîkwîthîrwa îgiita rîeenu rîa kûûragwa na rîa kûnyaganua kunthe rîgûkinya. Naabuî bûkaathînjwa ta ntûrûme înoru.

³⁵Arîîthi batîona giiciitho nabo atongeeria ba ndîîthia batîona a kûmatûka.

³⁶Igueni kîrîro kîa arîîthi na îkaya rîa atongeeria ba ndîîthia. Tontû MWATHANI akûthûûkangia kûrîa barîîthagia.

³⁷Nthîgûrû yaao ya thîîrî îthirîtue nî mûthûûro jûmûnene jwa MWATHANI.

³⁸MWATHANI eerûkîrîte antû baawe ta ûrîa ngatûnyi îthaamaga kîmamoone kîaayo. Nîkwîthîrwa nthîgûrû yaao nî yeete îgaanjo nîûntû bwa kwithûkîrwa nî anthû na mûthûûro jûmûnene jwa MWATHANI.”