Read KIMERU BIBLE PROTESTANT EDITION Jer 27 Bible Online

Jer 27 - KIMERU BIBLE PROTESTANT EDITION bible

Jer 27

¹ MWATHANI nî aarîîrie Jeremia rîrîa Zedekia mûtaana wa Josia aambîrîîrie kwaathana Juda,

²aramwîra atîrî, “Ithithîrie nthaara na gîchooki wîkîre nkingo yaaku.

³Ûtûmane kîrî mûnene wa Edomu, na wa Moabu, na mûnene wa nchiarwa cia Amoni, na wa Tiro, na wa Sidoni. Ûtûme atûmwa ba anene bau barîa bareejîre Jerusalemu batûmi kîrî Zedekia mûnene wa Juda.

⁴Naagwe ûbeere beere anene baao atî, MWATHANI Mweneinya, Mûrungu wa Israeli ariuga ûjû:

⁵Nî ni ndoombîre nthîgûrû, na antû baayo, na nyomoo irîa irî ku, na inya yaakwa înene na njara ciaakwa. Naani mînenkanagîra kîrî ûrîa nkwenda.

⁶Nandî nkûnenkanîra nthîgûrû iji cionthe kîrî nthûûmba yaakwa Nebukadineza mûnene wa Babiloni. Ningî nî mûnenkerete kinya nyamû cia kîthaka imûtumîkagîre.

⁷Nayo mîgongo yonthe îgaatumîkagîra Nebukadineza na îtumîkagîre mûtaana waawe, na kinya mwana wa mûtaana waawe, mwanka rîrîa îgiita rîgaakinya rîa Babiloni gûtumîkîra mîgongo îngî. Rîu mîgongo îmiingî na anene babanene bakaethia antû ba Babiloni nkombo ciaao.

⁸“Îndî antû ba mûgongo kana ba waathani bûrîa bûkarega kwathîkîra Nebukadineza, mûnene wa Babiloni, nkaabakanûkia na ndwaa, na mpara, na mîrimo îmîthûûku mwanka rîrîa Nebukadineza akaabathiria. Nîu ûûni MWATHANI nkuuga.

⁹Tontû bûû, bûkáthikîreeni iroria bieenu, kana aringia beenu, kana barîa babûtaûragîra irooto kana barîa baranagîria na roho cia antû barîa baakuîre na aragûri beenu, barîa bakûbwîra, ‘Bûtîtumîkîra mûnene wa Babiloni.’

¹⁰Nîkwîthîrwa bo nî mantû ja ûrongo bakûbûroreria, najo jagaatûma bûthaamue nthîgûrûûne yeenu. Ndabwînga nthîgûrûûne buru, bûkaathirua.

¹¹Îndî antû ba mûgongo jûrîa jûgeetîkîîria gûtumîkîra mûnene wa Babiloni, nkaabeetîkîîria batûûre nthîgûrûûne yaao, bakîrîmaga. Nîu ûûni MWATHANI nkuuga.”

¹²Naani Jeremia, nî ndeerîre Zedekia mûnene wa Juda mantû jau jongwa jarîa MWATHANI aambîîrîte atîrî, “Athîkagîreeni mûnene wa Babiloni na bûtumîkagîre antû baawe, naabuî bûgatûûra mwoyo.

¹³Kûrî na gîtûmi kîrîkû ûûgwe na antû baaku bûûragîrwa na ndweene, kana bûthirua nî mpara, na mîrimo îmîthûûku? Ûu nîu MWATHANI augîîte gûgaakara kîrî barîa bakaarega gûtumîkîra mûnene wa Babiloni.

¹⁴Buî bûkáthikîreeni ûrîa bûkwîrwa nî iroria atî, ‘Bûtîtumîkîra mûnene wa Babiloni,’ nîûntû nîka bikûbwaîria.

¹⁵Ni ntîtûmîte iroria biu. Îndî bio no kûroria bikûroria mantû ja ûrongo riîtweene rîaakwa. Tontû bûû, nkaabûthaamia nthîgûrûûne, naabuî amwe na iroria birîa bibûroragîria mantû ja ûrongo bûkaathira. Nîu ûûni MWATHANI nkuuga.”

¹⁶Rîu naani nî ndaarîîrie athînjîri-Mûrungu na antû bau bonthe ndîrabeera, “Ûûni MWATHANI ndiuga ûjû: Bûkáthikîîra nteto cia iroria bieenu birîa bikûbûroreria bikauga, ‘Nandî into bia kîûrû bikaaretwa kuuma Babiloni îgiita rîtî kûraaja.’ Nîkwîthîrwa bo nî ûrongo bakûbûroreria.

¹⁷Buî bûkábathikîîra. Îndî tumîkagîreeni mûnene wa Babiloni naabuî bûgatûûra mwoyo. Kûrî na gîtûmi kîrîkû ntûûra îîjî yeethua îgaanjo?

¹⁸Këethîra bo nî iroria na mma, na këethîra nî ni mbarîîtie nî bambereence ni MWATHANI Mweneinya nîkenda into birîa bitigeere kîûrûûne, na gîkaro kîa mûnene wa Juda, na Jerusalemu bitîgaikue Babiloni.

¹⁹Nîkwîthîrwa ûûni MWATHANI Mweneinya ndiuga atîrî, mantûûne jegiî itugî, na gîtangi kîrîa kînene, na mîînjîro, na into bingî bionthe birîa biaatigîrwe ntûûreene.

²⁰Nabio nîbio into birîa Nebukadineza mûnene wa Babiloni aatigîre rîrîa aikîrie Jekonia mûnene wa Juda, mûtaana wa Jehoiakimu, na atongeeria bangî ba Juda, na ba Jerusalemu kîthamîrioone kûu Babiloni.

²¹Ûûni MWATHANI Mweneinya, Mûrungu wa Israeli ndiuga atîrî, mantûûne jegiî into birîa biatigîrwe kîûrûûne, na gîkaroone kîa mûnene wa Juda, na Jerusalemu:

²²Into biu bigaikua Babiloni bikare nao, mwanka ntukû îrîa nkaathûgaania bwaabio. Rîu nîrîo nkaabicokia gûntû gûkû. Ûu nîu ûûni MWATHANI nkuuga.”