Read KIMERU BIBLE PROTESTANT EDITION Jer 29 Bible Online

Jer 29 - KIMERU BIBLE PROTESTANT EDITION bible

Jer 29

¹ Kîroria Jeremia arî Jerusalemu nî aandîkîîre akûrû, na athînjîri-Mûrungu, na iroria, na antû bonthe barîa baataîtwe nî Nebukadineza kuuma Jerusalemu gwîta Babiloni barûga.

²Barûga îîu aamîandîkîre nyuma ya mûnene Jekonia, na nchaama ciaawe na ng'ina, na atongeeria ba Juda, na atîa na aturi kûthaamua Jerusalemu.

³Elasa mûtaana wa Shafani, na Gemaria mûtaana wa Hilikia barîa mûnene wa Juda Zedekia aatûmîre Babiloni kîrî Nebukadineza mûnene wa Babiloni, nîbo baatûmîrwe baikia barûga îîu. Barûga nayo yaugaga atîrî,

⁴“MWATHANI Mweneinya, Mûrungu wa Israeli ariuga ûjû kîrî atae bonthe barîa aarekererie baratawa kuuma Jerusalemu baraikua Babiloni.

⁵‘Akageeni nyomba bûtûûrage ku. Ningî aandageni miuunda na bûrîjage maciara jaayo.

⁶Gûranageeni na bûgîîjage na aana. Ningî bûgûranagîre ataana beenu, na bwendagie aarî beenu, nîkenda nabo bakethagîrwa barî na aana. Thegeeni bwingîe bûrî nau, na menya bûnyiia.

⁷Cwaageni wega bwa ntûûra irîa mbwikîtie bûrî atae. Ningî bûrombagîre ntûûra iu nîûntû ciona wega, kinya buî bûkoona wega.

⁸Nîkwîthîrwa ûûni MWATHANI Mweneinya, Mûrungu wa Israeli ndiuga ûjû: menya bûrekeeria iroria bieenu, na aringia beenu babwaîria. Menya bûthikîîra irooto birîa barootaga.

⁹Bo nî nteto cia ûrongo babûroragîria riîtweene rîaakwa. Ni ntîîthagîrwa mbatûmîte. Nîu ûûni MWATHANI nkuuga.’”

¹⁰ MWATHANI ariuga atîrî, “Mîaka mîrongo mûgwanja yaathira Babiloni îkîathanaga, rîu nkaabûriûngîra na mbûjûrie mîciîtio îrîa mbûciîtîrîtie na mbûcokie gûntû gûkû.

¹¹Nîkwîthîrwa ni nî mbijî mîbango îrîa mbûbangîrîte. Mîbango ya kûbûreetera wega na tî ûthûûku. Mîbango ya kûbwaa ûtûûro bûbwega bwa nyumeene na wîrîgîîro, nîu ûûni MWATHANI nkuuga.

¹²Rîu naabuî bûgaankaîra na bwandomba nkaigua maromba jeenu.

¹³ Bûgancwaa bûmbone, rîrîa bûgaancwaa na nkoro cieenu cionthe.

¹⁴Bûgancwaa bûmbone naani mbûcokerie mawega jarîa bwaarî najo. Ningî nkabûûthûrania kuuma mîgongoone yonthe na gûntû kunthe kûrîa ndaabûnyaganîtie. Nkaabûreeta gûntû gûkû ndaabûritîre ndîrabwikia kîthamîrioone. Nîu ûûni MWATHANI nkuuga.

¹⁵“Nîkwîthîrwa buî nî buugîîte atîrî, ‘MWATHANI nî atweete iroria gûkû tûrî Babiloni.’

¹⁶MWATHANI ariuga ûjû mantûûne jegiî mûnene ûrîa ûkwaathana wa rûrîîjo rwa Daudi, na jegiî antû bonthe barîa batûûraga ntûûreene îîjî; antû ba ndûgû cieenu barîa bateetîre kîthamîrioone.

¹⁷Ûûni MWATHANI Mweneinya ndiuga atîrî, nkaabûreetera ndwaa, na mpara, na mîrimo îmîthûûku, bûkare ta nkûû inthûûku, irîa ithûûki ûrîa itîûmba kûrîîwa.

¹⁸Nkeengana nabo mbareetere ndwaa, na mpara, na mîrimo îmîthûûku na ntûme bae ta gîntû gîkîthûûku kîrî moonene jonthe ja nthîgûrû. Nabo bagakara ta kîrumi na ta gîntû gîkîthûûku, na gîntû gîa kûmenagîîrua nî mîgongo yonthe îrîa ndaabeengîrîîrie.

¹⁹Mantû jau najo jakabeejîîra nîûntû bataathikîrîîre nteto ciaakwa irîa ndaatûmaga nthûûmba ciaakwa iroria ibeera magiita jonthe. Îndî bo bataambathîkîra. Nîu ûûni MWATHANI nkuuga.

²⁰Buî atae bonthe barîa ndaathaamîrie kuuma Jerusalemu ndîrabwikia Babiloni igueni rûteto rwaakwa.

²¹MWATHANI Mweneinya, Mûrungu wa Israeli ariuga ûjû mantûûne jegiî Ahabu mûtaana wa Kolaia, na Zedekia mûtaana wa Maaseia, barîa bakûbûroreria mantû ja ûrongo riîtweene rîa MWATHANI. Ûûni MWATHANI, nkaabanenkanîra kîrî Nebukadineza mûnene wa Babiloni, nawe aboorage.

²²Tontû bwa iroria biu, antû bonthe ba Juda barîa baarî kîthamîrioone Babiloni, bakîrumana bakaugaga atîrî, ‘MWATHANI arotûma ûkara ta Zedekia na Ahabu barîa mûnene wa Babiloni aaîthîrie na mwanki.’

²³Ûu nîu bagakara nîûntû nî baathithîtie mantû jamathûûku ndeene ya Israeli. Nî bathithîtie ûthûngîîri na aka baitha, na baaria mantû ja ûrongo riîtweene rîaakwa. Nî ni nkûmenya ûrîa bathithîtie na ndî mûkûûjî waajo. Nîu ûûni MWATHANI nkuuga.”

²⁴Ningî MWATHANI Mweneinya nî aantûmîre kîrî Shemaia wa kuuma ntûûreene ya Nehelamu. Ntûmwa îîu ya

²⁵MWATHANI Mweneinya, Mûrungu wa Israeli yaaugaga atî Shemaia nî aarî agûtûma barûga kîrî antû bonthe barîa barî Jerusalemu, na kîrî mûthînjîri-Mûrungu Zefania mûtaana wa Maaseia, na kîrî athînjîri-Mûrungu bangî bonthe. Nayo barûga îîu yaaugaga atîrî,

²⁶“MWATHANI nî akwethetie mûthînjîri-Mûrungu antûûne a Jehoiada nîkenda ûmenyagîîra mantû ja kîûrû. Muntû ûrîa ûkairita nthû acieethie kîroria, ûmûtheeke ikongoroone na ûmûtheeke nkingo na nyororo.

²⁷Kîroria Jeremia wa kuuma ntûûreene ya Anathothi nî abûroragîria. Nîkî ûntû ûtîramûthithîria mantû ta jau?

²⁸Nîkwîthîrwa nîwe ûtûmanîîte kîrî tuî Babiloni akiugaga: ‘Bûgaakara kîthamîrioone îgiita rîrîraaja. Akageeni nyomba bûtûûrage ku, na bwandage miuunda yeenu bûrîîjage maciara jaayo.’”

²⁹Mûthînjîri-Mûrungu Zefania nî aathomere barûga îîu kîroria Jeremia akiigagua.

³⁰MWATHANI nî aarîîrie Jeremia aramwîra atîrî,

³¹“Tûmana kîrî atae bonthe uuge atîrî, ‘MWATHANI ariuga ûjû mantûûne jegiî Shemaia wa kuuma ntûûreene ya Nehelamu: Nîkwîthîrwa Shemaia nî abûroreretie kinya këethîra MWATHANI atîmûtûmîte, na nî atûmîte bûgeetîkia mantû ja ûrongo,

³²MWATHANI akaamûkanûkia amwe na nchiarwa ciaawe. Gûtî muntû wa antû baao ûgatûûra mwoyo eeja kwona wega bûrîa MWATHANI akaretera antû baawe, nîûntû nî aritanîîte antû kûrega kwathîkîra MWATHANI. Ûu nîu MWATHANI akuuga.’”