Read KIMERU BIBLE PROTESTANT EDITION Jer 3 Bible Online

Jer 3 - KIMERU BIBLE PROTESTANT EDITION bible

Jer 3

¹MWATHANI ariuga atîrî, “Muntû akëeja kwînga mwekûrû waawe nawe mwekûrû ûu akauma kîrî we akaa mûka wa muntû ûngî rî, mûkûrû waawe wa mbere oomba gûcokeera mûka ûu kaîrî? Ûntû bûu tîka bwîkîra nthîgûrû mûgiro buru? Gwe Israeli nî ûringîte maraya na anyaanya baaku babaingî; nooka ûkwenda gûcoka kîrî ni kaîrî? Ûu nîu MWATHANI akûûria.

²Ciûkia meetho ûraithîrie irîmeene îgûrû woone këethîra kûrî o ûtaamamwa naagwe. Gwe ûkaraga nthî rûteere rwa njîra weetereete anyaanya baaku, o ta Mûarabu ûrî rwanda. Gwe wîkîrîte nthîgûrû mûgiro na ûmaraya bwaaku bûbûûi.

³Tontû bûû, ngai nî îrigîîrîtue îtîkaure nayo ngai ya mûratho îtîreeja. Amwe na bûu mwonekere jwaaku nî jwa mûmaraya, nî ûregeete buru kwigua nthoni.

⁴Gwe nandî ûrîmbarîria ûkîmbîraga, ‘Baaba, ûtwîre ûmpendeete kuuma ndi mwana.

⁵Nîka gwe ûgaakara ûthûûri mwanka kenya ûkare waakanîri nî mûthûûro mwanka mûthia?’ Atîrî, Israeli ûu nîu uugîîte îndî gwe waacoka wathithia mantû jamathûûku o ûrîa ûkûûmba.”

⁶ MWATHANI nî aambarîîrie matukûûne ja waathani bwa mûnene Josia arambûûria atîrî, “Israeli nî mûka ûtîgwîtîkîka. Ûkwona ûrîa Israeli aathithîtie? We amamîte tûrîmeene tunthe na rungu rwa mîtî îriibîte yonthe akîringa maraya.

⁷Nyuma ya kûthithia mantû jau jonthe ndaaugaga agaacoka kîrî ni! Îndî we ataacokere. Kinya mwagi-nthoni tawe, mwarî wa ng'ina Juda nî oonere mantû jau.

⁸Juda nî oonere nkîînga Israeli na nkîmwaa barûga ya kûmwînga nîûntû bwa ûmaramari bwaawe bunthe. Îndî bûu bûtaatûma mwarî wa ng'ina ûu ûtîmwîtîkua Juda akîra. Nooka kinya we eetîre na mbere kûringa maraya.

⁹Ningî rî, nîûntû we atoonaga ûmaramari bwaawe ta bûrî ûntû bûbûnene, nî eetîre na mbere gwîkîra nthîgûrû mûgiro na kûringa maraya na njîra ya kûthaathayia maiga na mîtî.

¹⁰Ningî kûnarî ûu mwarî wa ng'ina ûu ûtîmwîtîkua Juda aathithîrie ta ka ancokeera, îndî ataancokeera na nkoro yaawe yonthe, nîu MWATHANI akuuga.”

¹¹MWATHANI nî aambîrîre atîrî, “Nî kaaba Israeli îtîkûnthaathayia nkûrûki ya Juda îtîgwîtîkîka.

¹²Nthiî ûtûmîîrie nteto iji rûteereene rwa bwa ûrîo uuge atîrî, Gwe Israeli ûntiganîrîtie, ncokeera, nîu MWATHANI akuuga. Ni ntîkûthûûrîîra, nîûntû ndî wa kîaao, nîu MWATHANI akuuga. Ni ntîîka mûthûûro mwanka kenya na kenya.

¹³Bunka akî îtîkîîria mathûûkia jaaku, atî nî ûregeete kwathîkîra MWATHANI Mûrungu waaku, na atî nî ûthaathaîrîtie mîrungu îngî, rungu rwa mîtî îrîa îriibîte yonthe, na atî nî ûregeete kwathîkîra kajû gaakwa nîu MWATHANI akuuga.

¹⁴Buî aana ndemi, cokeeni kîrî ni nîu MWATHANI akuuga. Nîkwîthîrwa ni nî ni Mwathi weenu. Naani nkaarita o ntûûra muntû ûmwe, na ndite o mwîrîga antû baîrî, mbwikie Zaiûni.

¹⁵“Naani nkaabûnenkera arîîthi barîa bakaathithagia wendi bwaakwa, ningî babûrerage na kîrîra na ûûme.

¹⁶Rîrîa bûkäthegea bwingîe nthîgûrûûne îgiita rîu rîkeeja antû batîtua kuugaga, ‘Îthandûkû rîa kîrîkanîro kîa MWATHANI,’ nîu MWATHANI akuuga. Ningî batîkororîthûgaanîria, kana barîririkana, kana boona ta ka bataûkîri nî gîntû. Nîkwîthîrwa Îthandûkû rîtîkorothithua kaîrî.

¹⁷Îgiita rîu Jerusalemu îgeetagwa rûriga rwa MWATHANI. Nayo mîgongo yonthe îkoothûranaga ku, îgeeta kîrî MWATHANI Jerusalemu. Ningî antû batîkoomia nkoro bathingata mairîrîîria jaao jamaaî kaîrî.

¹⁸Matukûûne jau antû ba Juda bakagwatana na antû ba Israeli, nabo baume nthîgûrû îîu îrî rûteere rwa bwa ûrîo, bacoke nthîgûrû îrîa ndaeere biûjûjû biaao yaa rûgai rwaao.” MWATHANI ariuga atîrî,

¹⁹“Ûûni ndaugaga, ndeenda gûkûjûkia ta mwana waakwa, ngakwaa nthîgûrû înthongi, nayo nî ngwato înjega nkûrûki ya nthî cia mîgongo yonthe. Ningî ndaugaga ûkaambîta baaba na ûtîgarûka ûntiganîria.

²⁰Nî mma o ta ûrîa mûka ûtî mwîtîkua atigaga mûkûrû waawe, nîu buî antû ba Israeli bûtigîte kwaa eetîkua kîrî ni, nîu ni MWATHANI kuuga.

²¹Kajû nî gakwigîîgua irîmeene, nako nî ga antû ba Israeli bagîkaya nîûntû mîîtîre yaao nî îmîthûûku na nî boorîrîtue nî MWATHANI Mûrungu waao.

²²Buî aana ndemi, cokeeni kîrî ni, naani nkabûrekera îrema rîeenu.” Naabuî bûramûcokeria atîrî, “Tûkwîja kîrî gwe; nîûntû nîgwe MWATHANI Mûrungu weetû.

²³Nî mma kûrîa tûreetaga irîmeene kûthaathayia mîrungu ya mîng'uanano tûtîrateethekaga. Wonokio bwa Israeli nî mma nî kîrî MWATHANI Mûrungu weetû bûrî.

²⁴“Kuuma wîthî bweetû mîrungu îîu ya mîng'uanano îreetaga nthao nî îtûthirîrîtie rûmaatho rwa biûjûjû bieetû, rwa mbûri, na ng'ondu, na ng'ombe, na aarî beetû na nthaka cieetû.

²⁵Ga tûûjûrwe nî nthao, ga tûrîîwe nî nthoni. Nîkwîthîrwa nî twîîrîtie MWATHANI Mûrungu weetû, tuî na biûjûjû bieetû kuuma tûrî babeethî mwanka naarua tûrî. Tuî tûtîathîkîrîte kajû ka MWATHANI Mûrungu weetû.”